لاہور: این سی اوسی کی جانب سے ریچ ایوری ڈور ویکسینیشن مہم کے تحت پنجاب میں زیادہ ویکسینیشن کی شرح والے علاقوں میں پابندیوں میں نرمی کا فیصلہ کر لیاگیا ہے۔
اے آر وائی نیوز کے مطابق پنجاب میں 55 فی صد سے زائد والے علاقے بہترین، 45 سے زائد والے بہتر قرار دے دیے گئے، جب کہ 45 فی صد سے کم ویکسینیشن شرح کے شہروں کو تیسرا درجہ دے دیا گیا۔
محکمہ صحت نے نوٹیفیکشن جاری کر دیا، نوٹیفیکیشن کا اطلاق 16 سے 31 دسمبر تک ہوگا۔
بہترین
نوٹیفیکیشن کے مطابق 55 فی صد سے زائد ویکسینیٹد شرح والے علاقوں میں معمولات زندگی مکمل طور پر بحال کرنے کی اجازت دی گئی ہے۔
55 فی صد سے زائد ویکسینیشن شرح والے شہروں میں منڈی بہاؤالدین، نارووال، جہلم، روالپنڈی، میانوالی، ڈیرہ غازی خان، حافظ آباد اور لودھراں شامل ہیں، جہاں سماجی سرگرمیاں، ڈائننگ، شادی کی تقریبات، کاروباری و دفتری اوقات، کھیل، جم، سینما اور مذہبی تقریبات بھی معمول کے مطابق چلیں گی۔
ان علاقوں میں انٹرا سٹی ٹرانسپورٹ 100 گنجائش کے ساتھ چل سکے گی، ریل گاڑی 100 فیصد گنجائش کے ساتھ چل سکے گی، مکمل ویکسینیٹد افراد کے ساتھ کنٹرول ٹورزم کی اجازت ہوگی، اور تعلیمی ادارے معمول کے اوقات میں 100 فی صد تعداد کے ساتھ کھلے رہیں گے۔
بہتر
این سی او سی کے مطابق 45 سے 55 فیصد ویکسینیشن شرح والے علاقوں میں پابندیاں عائد رہیں گی، سیکریٹری عمران سکندر بلوچ کا کہنا ہے کہ 45 سے 55 فیصد ویکسینیشن شرح والے شہروں میں لاہور، گوجرانولہ، ملتان، سرگودھا، گجرات، سیالکوٹ، چکوال، اوکاڑہ، وہاڑی، رحیم یار خان، شیخوپورہ، اٹک، خوشاب، لیہ، ٹوبہ ٹیک سنگھ، بھکر، خانیوال، پاکپتن، راجن پور، مظفرگڑھ اور چنیوٹ شامل ہیں۔
ان علاقوں میں تمام کاروباری سرگرمیاں رات 10 بجے تک جاری رہ سکیں گی، انڈور تقریبات کی 500 افراد کی گنجائش کے ساتھ اجازت ہوگی، آؤٹ ڈور تقریبات 1000 افراد کی گنجائش کے ساتھ ہو سکیں گی۔
انڈور ڈائننگ 70 فی صد جب کہ آؤٹ ڈور ڈائننگ 100 فی صد گنجائش کے ساتھ رات 11:59 تک جاری رہے گی، انڈور شادی کی تقریبات 500 جب کہ آؤٹ ڈور تقریبات 1000 افراد کی گنجائش کے ساتھ رات 11:59 تک جاری رہیں گی۔
سینما گھر، دفاتر، مزار اور جمز مکمل ویکسینیٹڈ افراد کے لیے معمول کے مطابق کھلے رہیں گے، تمام تفریحی مقامات، پولز اور پارکس 70 فی صد گنجائش کے ساتھ کھلے رہیں گے۔
تیسرا درجہ
45 فیصد سے کم ویکسینیشن شرح والے علاقوں میں پابندیوں کی تفصیلات بھی جاری کی گئی ہیں، ان شہروں میں بہاولنگر، بہاولپور، فیصل آباد، جھنگ، قصور، ننکانہ صاحب اور ساہیوال شامل ہیں، جہاں تمام کاروباری سرگرمیاں رات 10 بجے تک ہو سکیں گی۔
ان ڈور تقریبات 300 افراد کی گنجائش کے ساتھ، آؤٹ ڈور تقریبات 500 افراد کی گنجائش کے ساتھ جاری رہیں گی، انڈور ڈائننگ 50 فیصد جب کہ آؤٹ ڈور ڈائننگ 100 فیصد گنجائش کے ساتھ رات 11:59 جاری رہے گی۔
سینما گھر، جمز اور مزار مکمل ویکسینیٹڈ افراد کے لیے معمول کے مطابق کھلے رہیں گے، تمام تفریحی مقامات، پولز اور پارکس 50 فی صد گنجائش کے ساتھ کھلے رہیں گے، تمام سرکاری ونجی دفاتر اور تعلیمی ادارے معمول کے اوقات میں کھلے رہیں گے۔
سیکریٹری عمران سکندر بلوچ کے مطابق صوبہ بھر میں ان باونڈ پیسنجرز پالیسی نافذ رہے گی، ڈومیسٹک پروازوں میں رفرشمنٹس کی اجازت ہوگی، جب کہ 12 سال سے زائد عمر کے تمام افراد کی مکمل ویکسینیشن کروانے کی جامع منصوبہ کی گئی ہے، حکومتی احکامات کے مطابق صرف ویکسینیٹڈ افراد کو عوامی سروس اسٹیشنز پر سہولت فراہم کی جائیں گی۔
انھوں نے کہا کہ منڈی بہاؤالدین، نارووال، جہلم، روالپنڈی، میانوالی، ڈیرہ غازی خان، حافظ آباد اور لودھراں کے علاقوں نے ویکسینیشن مہم میں بہترین کارکردگی دکھائی ہے، باقی اضلاع بھی اپنی کارکردگی میں بہتری لائیں۔
