Tag: این سی او سی

اسلام آباد: صدر مملکت ڈاکٹر عارف علوی نے کرونا سے نمٹنے کے لیے این سی او سی کے بروقت اقدامات کی تعریف کی ہے۔

تفصیلات کے مطابق صدر مملکت ڈاکٹر عارف علوی نے نیشنل کمانڈ اینڈ آپریشن سینٹر کا دورہ کیا جہاں این سی او سی سربراہ لیفٹیننٹ جنرل حمود الزمان نے ان کا استقبال کیا۔

این سی او سی کی جانب سے جاری اعلامیے کے مطابق صدر مملکت عارف علوی کی زیر صدارت این سی او سی میں اجلاس ہوا جس میں اسدعمر،فخر امام، نور الحق قادری،ظفرمرزا،صوبائی چیف سیکریٹریز نے بذریعہ ویڈیولنک شرکت کی۔

اجلاس میں چیئرمین این ڈی ایم اے لیفٹیننٹ جنرل محمد افضل،سرجن جنرل پاکستان لیفٹیننٹ جنرل نگار جوہر نے بھی شرکت کی۔

اعلامیے میں کہا گیا ہے کہ وفاقی وزیر اسد عمر نے صدر مملکت کو کرونا صورتحال، حکومتی اقدامات پر بریفنگ دی۔صدر مملکت کو کرونا سے متعلق وفاق اور صوبوں کے مابین رابطوں سے متعلق بھی بتایا گیا۔

اعلامیے کے مطابق ڈاکٹر عارف علوی نے کرونا سے نمٹنے کے لیے این سی او سی کے بروقت اقدامات کی تعریف کرتے ہوئے کہا کہ این سی او سی کی کرونا ایس او پیز، گائیڈ لائن قابل ستائش ہیں۔

کراچی: وزیراعلیٰ سندھ مراد علی شاہ نے کہا ہے کہ عیدالاضحیٰ، محرم اور ربیع الاول سے متعلق خصوصی تیاری کرنا ہوگی۔

تفصیلات کے مطابق وفاقی وزیر اسد عمر کی زیرصدارت این سی او سی کا خصوصی اجلاس ہوا جس میں وزیراعلیٰ سندھ نے بطور میزبان اجلاس میں خصوصی شرکت کی۔

اس موقع پر مراد علی شاہ کا کہنا تھا کہ صوبائی دارالحکومتوں میں اجلاس کا انعقاد این سی او سی کا اچھا فیصلہ ہے،وبا کو کنڑول کرنے میں این سی او سی نے بہت اہم کردار ادا کیا ہے۔

وزیراعلیٰ سندھ نے بریفنگ کے دوران بتایا کہ شروع میں کچھ مشکلات درپیش تھیں،وفاق،صوبوں نے مل کر بھرپور کام کیا،اس وقت اسپتالوں اور دیگرمقامات پر انتظامات بہتر ہیں۔مراد علی شاہ کا کہنا تھا کہ عیدالاضحیٰ، محرم اور ربیع الاول سے متعلق خصوصی تیاری کرنا ہوگی۔

وفاقی وزیر اسد عمر نے کہا کہ مویشی منڈیوں میں احتیاطی تدابیر کے ساتھ مانیٹرنگ کا نظام ضروری ہے،فیس ماسک اور احتیاطی تدابیر کو ہر صورت یقینی بنانا ہوگا۔انہوں نے بتایا کہ اجلاس کے مقاصد اہم ایشوز پر مشاورت اور صوبوں کی کارکردگی کو سراہنا ہے۔

اسد عمر نے کہا کہ کرونا کیسز اور اموات میں کمی واقع ہو ئی ہے،ہمیں احتیاط کا دامن نہیں چھوڑنا، زیادہ احتیاط کی ضرورت ہے تاکہ دوبارہ کیسزکی تعداد میں اضافہ نہ ہو۔

وفاقی وزیر کا کہنا تھا کہ تمام صوبوں میں ڈاکٹرز، قانون نافذ کرنے والے اداروں نے اچھا کام کیا۔این سی او سی فورم نے سندھ کے ٹیسٹنگ اور ٹریس سسٹم کی تعریف کی۔

اجلاس کے دوران وفاقی وزیر داخلہ نے بتایا کہ غیرقانونی مویشی منڈیوں کے خلاف کریک ڈاؤن جاری ہے،مویشی منڈیوں میں احتیاطی تدابیر کو ہر صورت یقینی بنایا جائےگا۔

اعجاز احمد شاہ کا کہنا تھا کہ مویشی منڈیوں اور عیدا لاضحیٰ سےمتعلق ہدایات جاری کر دی گئی ہیں،محرم کے حوالے سے بھی پلان مرتب کر رہے ہیں،محرم کے حوالے سے حفاظتی تدابیر پر مشاورت جاری ہے۔

کراچی: شہر قائد کے عوام نے نیشنل کمانڈ اینڈ آپریشن سینٹر (این سی او سی) کے مویشی منڈیوں سے متعلق اوقات کار کو مسترد کردیا۔

اے آر وائی نیوز کی رپورٹ کے مطابق کراچی کے عوام نے این سی او سی کے مویشی منڈیوں سے متعلق اوقات کار کو مسترد کردیا، این سی او سی کی جانب سے عید الاضحیٰ کے لیے ملک بھر میں لگائی جانے والی مویشی منڈیوں کے اوقات صبح 6 سے شام 7 بجے تک رکھے گئے ہیں۔

شہریوں نے شکوہ کیا ہے کہ دفتری اوقات میں مویشی منڈی جاکر قربانی کا جانور کیسے خریدیں گے، نئے اوقات کے مطابق منڈی کیسے جائیں ہمارے دفتری اوقات ہی شام تک ہے۔

شہریوں کا کہنا ہے کہ صبح 6 سے شام 7 بجے تک مویشی خریدنے کی اجازت سمجھ سے بالاتر ہے، حکومت نے خریداروں کے لیے کم وقت مقرر کیا تو رش زیادہ بڑھ جائے گا۔

مزید پڑھیں: ملک بھر میں مویشی منڈیوں کے اوقات کار کیا ہوں گے؟ اسد عمر نے بتا دیا

واضح رہے کہ وفاقی وزیر اسد عمر نے این سی او سی اجلاس سے خطاب کرتے ہوئے کہا تھا کہ کورونا کا پھیلاؤ روکنے کیلئے مویشی منڈیوں کا درست انتظام ضروری ہے، ملک بھرمیں مویشی منڈیاں شہروں سے باہر قائم کی جائیں گی، شہروں کے اندر کسی کو مویشی منڈی قائم کرنے کی اجازت نہیں۔

اسد عمر کا کہنا تھا کہ انتظامیہ مویشی منڈیوں سےمتعلق گائیڈ لائنز پرعملدرآمد یقینی بنائے، ملک بھر میں منڈیوں کے اوقات صبح 6 سےشام 7 تک ہوں گے اور منڈیوں میں داخلے سےقبل ماسک پہننا لازم ہو گا۔

وفاقی وزیر کا کہنا تھا کہ مویشی منڈیوں کا ایس اوپیزکے تحت اہتمام بہت ضروری ہے، دیہی ایریا سے شہر میں جانور فروخت کرنے کے لئے لوگ آتے ہیں، مویشی منڈیوں سے متعلق ہیلتھ پروٹوکول، گائیڈلائنز سب سے شیئر ہوں گی۔

اسلام آباد: وزیراعظم عمران خان نے کہا ہے کہ این سی او سی نے جن مشکل حالات میں کام کیا قوم کو اس پر فخر ہے۔

تفصیلات کے مطابق وزیراعظم عمران خان نے نیشنل کمانڈ اینڈ کنٹرول آپریشن سینٹر کا دورہ کیا۔آرمی چیف،وفاقی وزرا ودیگرحکام بھی اس موقع پر موجودتھے۔

این سی او سی کی جانب سے جاری اعلامیے میں کہا گیا ہے کہ وزیراعظم عمران خان کو دورے کے دوران کرونا صورتحال سے متعلق آگاہ کیا گیا،وزیراعظم کو کرونا صورت حال پر تفصیلی بریفنگ دی گئی۔

اعلامیے کے مطابق وزیراعظم نے اسمارٹ لاک ڈاؤن کے مثبت اثرات کو سراہتے ہوئے ایس اوپیز پر سختی سے عملدرآمد کی ہدایت کی۔

اس موقع پر وزیراعظم عمران خان کا کہنا تھا کہ نیشنل کمانڈ اینڈ آپریشن سینٹر (این سی او سی) نے جن مشکل حالات میں کام کیا قوم کو اس پر فخر ہے۔

کرونا وبا کے خلاف جنگ، این سی او سی کے قیام کو 100 روز مکمل

اے آر وائی نیوز کے مطابق ملک میں کرونا وائرس کے کیسز کا ڈیٹا مرتب کرنے اور دیگر اقدامات کرنے کے سلسلے میں قائم کیے جانے والے قومی کمانڈ آپریشن سینٹر کو 100 روز مکمل ہو گئے۔

این سی او سی نے کرونا کا بہادری اور عقل مندی سے مقابلہ کرنے پر قوم، بالخصوص ڈاکٹرز، نرسز اور پیرا میڈیکل اسٹاف کو خراج تحسین پیش کیا۔ادارے کی جانب سے کہا گیا کہ ہیلتھ کیئر ورکرز نے وبا کے دوران جرات و بہادری سے فرائض انجام دیے۔