بھارتی نیوز چینل این ڈی ٹی وی کا رپورٹر ادارتی پالیسیوں پر بھڑک اٹھا اور لائیو ٹرانسمیشن میں نیوز اینکر کو کھری کھری سنادی۔
بھارتی فوج میدان جنگ میں پاک فوج کا سامنا نہ کرسکی تو مودی سرکار کو اپنی ہی عوام کو بے وقوف بنانے کے لیے فیک نیوز اور پروپیگنڈے کا سہارا لینا پڑا، جس کا فوراً جواب دیتے ہوئے پاکستانیوں نے بھارتی میڈیا کو آڑے ہاتھوں لیا۔
تاہم اب بھارتی نیوز چینل کا رپورٹر بھی اپنی ادارتی پالیسیوں سے تنگ آگیا اور لائیو ٹرانسمیشن پر اینکر پر بھڑک اٹھا جس کی ویڈیو سوشل میڈیا پر وائرل ہورہی ہے۔
این ڈی ٹی وی کے رپورٹر نے کہا کہ پہلے خود جھوٹی خبریں چلواتے ہیں پھر کہتے ہیں فیک نیوز کیوں دی، رپورٹر کو سچ بولتا دیکھ کر نیوز اینکر نے فوراً بریک لے لی۔
واضح رہے کہ پاک فضائیہ کے ہاتھوں 3 رافیل سمیت 5 جنگی طیاروں کی تباہی کے بعد بھارت کو شدید خفت کا سامنا تھا، عسکری میدان میں جب بھارت کو ناکامی ہوئی تو بھارت میڈیا نے جھوٹ کا سہارا لے لیا۔
8 مئی کو تمام بھارتی نیوز چینلز پر براہ راست نشریات جاری تھیں جن میں دعویٰ کیا جا رہا تھا کہ پاکستان کی جانب سے بھارت میں حملہ کیا گیا جس کے بعد بھارت نے شدید جوابی حملہ کردیا ہے اور بھارتی فوج پاکستان کے بڑے شہروں میں اندر تک گھس گئی ہے اور وہاں قبضہ کرلیا۔
فیکٹ چیک: بھارتی میڈیا جھوٹی خبریں پھیلانے لگا، حقیقت یکسر مختلف
ایسی بے سروپا اور جھوٹی خبریں دینے میں بھارت کے تمام بڑے نیوز ٹی وی چینلز اور معروف صحافی اور اینکر شامل تھے۔
بھارتی میڈیا پر سوشل میڈیا سے لی گئی پاکستانی شہروں کی تباہی کی بے بنیاد خبریں چلائی گئیں، کراچی پورٹ ٹرسٹ کی تباہی سے لیکر پاکستانی ایف 16 کو گرانے اور پاکستان کی جانب سے عالمی اداروں سے مالی امداد طلب کرنے کی جھوٹی خبریں چلائی گئیں۔
بھارتی میڈیا نے اپنی اس غیر زمہ دارانہ رپوٹنگ سے دنیا بھر میں اپنی جگ ہنسائی کرائی، بھارتی میڈیا نے یہ بھی خبر چلائی کہ بھارتی فوج کے حملے سے کراچی تباہ ہوچکا ہے۔
