سماجی رابطوں کی مقبول ترین ایپ ٹوئٹر کا متبادل بلیو اسکائی کی مقبولیت میں بے حد اضافے کے بعد نئے صارفین کیلئے نئے سائن اپ کو غیر فعال کردیا۔
رپورٹ کے مطابق ٹوئٹر کی جانب سے ٹوئٹس کی تعداد کی حد متعارف کرانے کے ایک دن کے بعد بلیو اسکائی ایپ کو مسائل کا سامنا کرنا پڑرہا تھا اسے حل کرنے کے لیے نئے صارفین کے سائن اپس کو روک دیا گیا ہے۔
اگرچہ بلیو اسکائی ایپ کو استعمال کرنے کے لیے کوڈ کی ضرورت ہوتی ہے، اس کے باوجود یہ نئی ایپ کچھ صارفین کی آمد سے ہی مسائل کا سامنا کررہی ہے۔
بلیو اسکائی نے ایک پوسٹ میں اس حوالے سے لکھا کہ’ ہم عارضی طور پر بلیو اسکائی سائن اپس کو روک رہے ہیں جبکہ ہماری ٹیم موجودہ مسائل کو حل کرنے کی مسلسل کوشش کررہی ہے‘۔
’ جیسے کی انوائٹ کوڈز کو دوبارہ فعال کیا جائےگا ہم آپ کو اپ ڈیٹ کردیں گے، ہم جلد ہی اپنی ایپ پر مزید صارفین کا استقبال کرنے کے لیے پُرجوش ہیں۔
بلیو اسکائی ایپ رواں سال فروری میں آئی او ایس پر لانچ ہوئی تھی لہذا آئی فون صارفین کے لیے پہلے ہی دستیاب ہے، اس ایپ کے خالق جیک ڈروسی نے پہلی بار 2019 میں بلیو اسکائی بنانے کا اعلان کیا تھا۔
سوشل میڈیا صارفین کیلیے خوشخبری، ٹوئٹر کا متبادل میدان میں آگیا
اس ایپ کا تصور چار سال قبل پیش کیا گیا تھا اور طویل عرصے بعد بالآخر یہ اینڈرائیڈ صارفین کو ڈاؤن لوڈ کرنے کے لیے دستیاب تھی۔ تاہم مکمل رسائی کے لیے ابھی بھی انوائٹ کوڈ کی ضرورت پڑتی ہے۔
واضح رہے کہ جب سے ایلون مسک نے سوشل میڈیا پلیٹ فارم ٹوئٹر کو خریدا ہے، تب سے مسلسل تبدیلیاں کی جارہی ہیں، غیر واضح تبدیلیوں کی وجہ سے افراتفری کا ماحول پیدا ہو جاتا ہے۔
حال ہی میں تمام صارفین کے لیے ٹوئٹس دیکھنے کی حد مقرر کی گئی تھی۔ ایلون مسک کی جانب سے یکم جولائی کو اعلان کیا گیا تھا کہ اب تصدیق شدہ اکاؤنٹس والے صارفین ایک دن میں 6000 جبکہ غیر تصدیق شدہ اکاؤنٹس 600 پوسٹس دیکھ سکتے ہیں اور نئے غیر تصدیق شدہ اکاؤنٹس صرف 300 پوسٹس دیکھ سکتے ہیں۔
مسک نے 12 گھنٹے کے اندر دو بار حد بڑھانے کی بھی اطلاع دی، جس کے بعد اس وقت تصدیق شدہ، غیر تصدیق شدہ اور نئے غیر تصدیق شدہ اکاؤنٹ کے لیے ایک دن میں پوسٹس دیکھنے کی حد بالترتیب 10 ہزار، 5 ہزار اور 500 ہے۔
