Tag: ایپ متعارف

جنوبی کوریا کی ٹیک کمپنی سام سنگ اپنی ٹرائی گلیکسی ایپ کے لیے ایک منفرد اپ ڈیٹ کے ساتھ ایپل کے صارفین کو ہدف بنا رہی ہے، جس سے آئی فون صارفین دو آئی فونز کو ساتھ رکھ کر سام سنگ گلیکسی زیڈ فولڈ استعمال کرنے کے تجربے سے لطف اندوز ہوسکیں گے۔

یہ فیچر اینڈرائیڈ فونز پر بھی دستیاب ہے، لیکن سام سنگ نے ابھی آئی فونز پر کام کرنے کے لیے ٹرائی گلیکسی ایپ کی استعدادِ کار میں اضافہ کیا ہے۔

یہ اپ ڈیٹ سام سنگ کی جانب سے اپنے تازہ ترین فولڈ ایبل فونز، گلیکسی زیڈ فلپ 5 اور گلیکسی زیڈ فولڈ 5 کو گزشتہ ماہ جنوبی کوریا کے دارالحکومت سیول میں ایک ہائی پروفائل ایونٹ میں لانچ کرنے کے بعد سامنے آئی ۔

آپ کے آئی فون پر ایپ استعمال کرنے میں سا م سنگ سے کیو آر کوڈ اسکین کرنا شامل ہے، جو کمپنی کی پریس ریلیز میں دستیاب ہے۔ ایسا کرنے سے آپ سام سنگ کی ٹرائی گلیکسی ایپ میں آئی فون کی ہوم اسکرین پر شارٹ کٹ شامل کر سکیں گے۔

شارٹ کٹ لانچ کرنے سے سام سنگ کے ون یوزر انٹرفیس اینڈرائیڈ سافٹ ویئر کی نقل تیار ہو جاتی ہے۔ لیکن جن صارفین کے پاس دو آئی فونز ہیں وہ ان کو ایک ساتھ استعمال کر سکتے ہیں تاکہ یہ دیکھا جاسکے کہ یہ سافٹ ویئر سام سنگ کے گلیکسی زیڈ فولڈ پر کیسا نظر آئے گا۔

اس موڈ میں آزمانے کے لیے چند مختصر ڈیمو دستیاب ہیں، جس میں ایک ایئر ہاکی گیم اور ایک سمندری منظر کی متحرک ویڈیو شامل ہے جس میں وہیل اور دیگر آبی مخلوقات کو تیرتے ہوئے دکھایا گیا ہے۔

یہ ڈیمو اس بات کی عکاسی نہیں کرتے ہیں کہ حقیقت میں گلیکسی زیڈ فولڈ کو استعمال کرنا کیسا ہوگا، لیکن سام سنگ واضح طور پر اپنے صارفین کو یہ بتانا چاہتا ہے کہ ڈبل ڈسپلے میں ایپس کیسی نظر آئیں گی۔