Tag: ایڈمنسٹریٹرز

کراچی: سابق بلدیاتی نمائندوں سے سرکاری گاڑیاں واپس نہ لی جا سکیں، ان کے خلاف سرکاری گاڑیاں واپس نہ کرنے پر مقدمات بھی درج نہیں کیے جا سکے۔

تفصیلات کے مطابق کراچی کےسابق بلدیاتی نمائندوں سے سرکاری گاڑیوں کی ریکوری کے معاملے میں ڈھائی ماہ بعد بھی حکومتی احکامات پر عمل درآمد نہ ہو سکا۔

6 اضلاع کے ایڈمنسٹریٹرز نے حکومتی احکامات ہوا میں اڑا دیے، ایڈمنسٹریٹرز کو 16 اکتوبر کو گاڑیوں کی واپسی کی ہدایت کی گئی تھی۔

گاڑیاں واپس نہ کرنے والوں کے خلاف مقدمے کا اندراج بھی نہیں کیا جا سکا، ریجنل ڈائریکٹر لوکل گورنمنٹ نے ڈیڑھ ماہ قبل مقدمے کے احکامات دیے تھے۔

بلدیاتی نمائندوں سے گاڑیاں فوری واپس لینے کا حکم جاری

معلوم ہوا ہے کہ بعض بلدیاتی نمائندوں کی جانب سے واپس کی گئی سرکاری گاڑیوں پر ضلعی انتظامیہ قابض ہو گئی ہے، سابق چیئرمین ضلع وسطی اور شرقی کی سرکاری گاڑیاں سینٹرل وہیکل پول نہ پہنچ سکیں۔

ذرایع محکمہ بلدیات کا کہنا ہے کہ سابق چیئرمین ضلع ملیر اور جنوبی سے سرکاری گاڑیاں ریکور نہ ہو سکیں، ضلع غربی اور کورنگی سے بھی سرکاری گاڑیاں واپس نہیں کی گئیں۔

واضح رہے کہ 3 رکنی 6 کمیٹیوں کو ایک ہفتے میں گاڑیوں کی ریکوری کا ٹاسک دیاگیا تھا۔

کراچی: شہر قائد میں انتظامی تبدیلیاں بھی بہتری نہ لا سکیں، سسٹم ناکام ہو چکا اور شہری مختلف مسائل کے باعث شدید پریشانی کا شکار ہیں۔

تفصیلات کے مطابق کراچی میں واٹر اینڈ سیوریج بورڈ کے ایم ڈی کی تبدیلی بھی صورت حال میں بہتری نہ لا سکی، کراچی کے مختلف علاقوں میں سیوریج اور ابلتے گٹروں نے سڑکیں اور گلیاں تباہ کر دیں۔

ادھر ضلع وسطی کے ایڈمنسٹریٹر اور ڈپٹی کمشنر نے اپنے ہی محکمے کے احکامات ہوا میں اڑا دیے ہیں، ذرایع کا کہنا ہے کہ صفائی کے نام پر جاری ہونے والے فنڈز میں خرد برد کا انکشاف ہوا ہے۔

ضلع وسطی کے مختلف علاقوں میں سیوریج سسٹم بھی بیٹھ چکا ہے، جب کہ علاقے کے واٹر بورڈ کا عملہ اور ایکس سی این علاقے سے غائب ہیں، دستگیر، عزیز آباد بلاک ٹو اور ٹین، اور جوہر آباد میں گٹر ابل پڑے ہیں، جس کی وجہ سے سڑکیں اور گلیاں زیر آب رہنے لگی ہیں، بدبو اور تعفن سے شہریوں کا نکلنا محال ہو گیا۔

کئی مقامات پر کئی دنوں سے پانی کھڑا ہونے کے باعث سڑکیں ٹوٹ پھوٹ کا شکار ہیں، جگہ جگہ بڑے بڑے گڑھے پڑ چکے ہیں، سیوریج کے پانی کے باعث مچھروں اور مکھیوں کی بھی بہتات ہو گئی، علاقہ مکینوں کی جانب سے شکایات کے باوجود نکاسی کا عمل شروع نہ ہو سکا۔

اے آر وائی نیوز کے مطابق ایم ڈی واٹر بورڈ صورت حال جاننے کے باوجود عملے کو علاقے میں بھیجنے سے قاصر دکھائی دے رہے ہیں۔

ادھر ضلع وسطی کے علاقے یاسین آباد میں کچرے کا ڈمپنگ پوائنٹ بنا دیا گیا ہے، دوسرے علاقوں سے کچرا لا کر یاسین آباد سے عائشہ منزل جانے والی سڑک پر پھینکا جانے لگا، کچرے کے ڈمپنگ پوائنٹ کے باعث ٹریفک کی روانی متاثر ہو چکی ہے، بدبو اور تعفن سے شہری پریشان ہیں۔

کچرے کے ڈھیر کے باعث یاسین آباد قبرستان جانے والا روڈ بھی متاثر ہو چکا ہے، جب کہ ایڈمنسٹریٹر اور ڈپٹی کمشنر اور سندھ سالڈ ویسٹ بورڈ کچرے کے ڈمپنگ پوائنٹ سے لاعلم نکلے ہیں۔

ذرایع کا کہنا ہے کہ محکمہ بلدیات نے تمام اضلاع کے ایڈمنسٹریٹرز کو صفائی ستھرائی اور کچرا ٹھکانے لگانے کے لیے فنڈز جاری کیے ہیں لیکن فنڈز میں خرد برد کیا جا رہا ہے، محکمہ بلدیات کی جانب سے روزانہ کی بنیاد پر ضلعی رپورٹ مانگے جانے کے باوجود بھی صورت حال بہتر نہ ہو سکی۔