Tag: ایڈمنسٹریٹر کراچی

کراچی : ایم کیو ایم نے سابق رکن اسمبلی عبدالوسیم کا نام ایڈمنسٹریٹر کراچی کیلئے تجویز کردیا ، ایم کیوایم اور پیپلز پارٹی معاہدے کے تحت کراچی حیدرآباد میں ایڈمنسٹریٹر تبدیل ہونا ہیں۔

تفصیلات کے مطابق ایم کیو ایم رابطہ کمیٹی کا اجلاس ہوا ، جس میں ایڈمنسٹریٹر کراچی کے نام پر غور کیا گیا ، ذرائع کا کہنا ہے کہ ایم کیوایم نے عبدالوسیم کا نام ایڈمنسٹریٹر کراچی کیلئے پیپلز پارٹی کو تجویز کردیا۔

اجلاس میں ایم کیوایم بعض رہنماؤں کی گریڈ20 کےسیف الرحمان کو بھی تعینات کرنے کی تجویز دی گئی۔

خیال رہے عبدالوسیم سابق رکن قومی اسمبلی ہیں ، ایم کیوایم اور پی پی معاہدے کے تحت کراچی حیدرآباد میں ایڈمنسٹریٹر تبدیل ہونا ہیں ، موجودہ ایڈمنسٹریٹر کراچی مرتضی وہاب کا تقرر اگست 2021میں کیا گیا تھا۔

یاد رہے گذشتہ روز ایم کیو ایم رہنماؤں نے آصف زرداری سے ملاقات میں ان کو تحریری معاہدے سے متعلق یاد دہانی کرائی تھی ، جس پر پیپلز پارٹی کے شریک چیئرمین نے یقین دلایا کہ ایم کیو ایم کے ساتھ جو تحریری معاہدہ کیا گیا تھا اس پر مکمل عمل درآمد کیا جائے گا۔

ملاقات میں ایم کیو ایم نے شہری سندھ میں بلدیاتی افسران اور ایڈمنسٹریٹر کراچی کا عہدہ دینے پر بات کی، ذرائع کا کہنا تھا کہ ایم کیو ایم نے سندھ کابینہ میں شمولیت سے متعلق وزارتوں کا معاملہ حل کرنے پر زور دیا۔

کراچی: سندھ انفرا اسٹرکچر ڈیولپمنٹ کمپنی لمیٹڈ کا کہنا ہے کہ سپریم کورٹ نے مارچ 2021 تک گرین لائن منصوبہ مکمل کرنے کی ڈیڈ لائن دی ہے۔

تفصیلات کے مطابق سندھ انفرا اسٹرکچر ڈیولپمنٹ کمپنی لمیٹڈ نے ایڈمنسٹریٹر کراچی کو خط لکھا ہے جس میں کمپنی نے گرین لائن منصوبے میں تاخیر کا ذمہ دار کے ایم سی کو قرار دیا ہے۔

خط کے متن میں کہا گیا ہے کہ کے ایم سی رکاوٹوں کے باعث کام شروع نہیں ہو پا رہا،ایس آئی ڈی سی ایل نے ٹرام منصوبے کو بھی غیر اہم قرار دے دیا۔

کمپنی کی جانب سے لکھے گئے خط میں کہا گیا ہے کہ گرین لائن منصوبے کی قیمت پرٹرام چلانے سے تکنیکی دشواریاں پیدا ہوں گی،اس مرحلے پر ڈیزائن میں تبدیلی کی تو منصوبہ تاخیر کا شکار ہوسکتا ہے۔

سندھ انفرا اسٹرکچر ڈیولپمنٹ کمپنی لمیٹڈ نے کہا کہ سپریم کورٹ نے مارچ 2021 تک گرین لائن منصوبہ مکمل کرنے کی ڈیڈلائن دی ہے۔

خط میں کہا گیا ہے کہ ایڈمنسٹریٹر کراچی ٹرام منصوبے کے حوالے سے سندھ حکومت سے رجوع کریں،گرین لائن کے ایم اے جناح روڈ کوریڈور کی سندھ کابینہ منظوری دے چکی ہے۔

خط کے متن میں کہا گیا ہے کہ سندھ حکومت منصوبے کو نمائش تک محدود کرنا چاہتی ہے تو اس کی مرضی ہے۔

کراچی: شہر قائد کے نئے ایڈمنسٹریٹر افتخار شلوانی سے گورنر سندھ نے اہم ملاقات کی ہے۔

تفصیلات کے مطابق ایڈمنسٹریٹر کراچی افتخار شلوانی نے گورنر سندھ عمران اسماعیل سے گورنر ہاﺅس میں ملاقات کی، جس میں شہر قائد کے ترقیاتی منصوبوں، اس ضمن میں ترجیحی امور، فنڈز کے شفاف استعمال، ترقیاتی منصوبوں میں تمام اسٹیک ہولڈرز کی شمولیت اور دیگر امور پر تبادلہ خیال کیا گیا۔

افتخار شلوانی نے کہا مجھ پر اعتماد کے لیے وفاقی و صوبائی حکومتوں کا شکر گزار ہوں، اپنے فرائض کی بجا آوری میں اپنی بھرپور صلاحیتوں کو استعمال کروں گا۔

گورنر سندھ نے کہا کہ بہ طور ایڈمنسٹریٹر آپ پر بہت بھاری ذمہ داری آ گئی ہے کہ کراچی کے لیے وزیر اعظم کے اعلان کردہ پیکج کے تحت ترقیاتی منصوبوں کو معیار کے مطابق جلد از جلد مکمل کرائیں۔

انھوں نے کہا کراچی پیکج ایک تاریخی اقدام ہے، اس سے کراچی کے مسائل کو دیرپا بنیادوں پر حل ہونے میں مدد ملے گی، بہتر شہری سہولیات کی دستیابی کراچی کے باسیوں کا حق ہے، کراچی کے مسائل حل کرنے کی اس سے زیادہ سنجیدہ کوشش ماضی میں نہیں دیکھی۔

گورنر سندھ کا یہ بھی کہنا تھا کہ وفاقی و صوبائی حکومتیں، تمام شہری ادارے، کنٹونمنٹ بورڈز، این ڈی ایم اے مل کر شہر کو ٹھیک کریں گے، بطور ایڈمنسٹریٹر آپ پر بہت بھاری ذمہ داری ہے کہ ترقیاتی منصوبوں کو معیار کے مطابق جلد از جلد مکمل کرائیں۔