معروف سوشل میڈیا پلیٹ فارم ’ایکس‘ کے مالک ایلون مسک نے سروسز معطل ہونے پر فیس بک اور انسٹا گرام پر طنز کے تیر چلا دیے۔
ایلون مسک نے منگل کے روز ’ایکس‘ پر میٹا کی ملکیت فیس بک اور انسٹاگرام کی عالمی بندش کے حوالے سے اپنا نقطہ نظر شیئر کیا ہے۔ انھوں نے ‘ایکس‘ پر چند پینگوئنز کی تصویر شیئر کی ہے۔
اس پوسٹ میں فیس بک، انسٹاگرام اور تھریڈز کے لوگو والے پینگوئن اپنے سامنے کھڑے ’ایکس‘ والے پینگوئن کو حیرت کے ساتھ دیکھ ررہے ہیں۔
اس پوسٹ کے ساتھ ایلون نے اپنی ملکیت ’ایکس‘ پر لکھا کہ ’’اگر آپ یہ پوسٹ پڑھ رہے ہیں تو اس کی وجہ صرف یہ ہے کہ ہمارے سرورز کام کر رہے ہیں۔‘‘
— Elon Musk (@elonmusk) March 5, 2024
واضح رہے کہ اس سے قبل سوشل میڈیا ویب سائٹس اور ایپلی کیشنز کی بندش پر پاکستان ٹیلی کمیونکیشن اتھارٹی (پی ٹی اے) کا مؤقف بھی سامنے آیا تھا۔
ترجمان پی ٹی اے نے واضح کیا تھا کہ سوشل میڈیا پلیٹ فارم میٹا کو عالمی سطح پر بندش کا سامنا ہے جس کی وجہ سے پاکستان میں بھی صارفین اس مسئلے سے متاثر ہوئے ہیں۔
ترجمان نے کہا کہ صارفین کو فیس بک، انسٹاگرام، میسنجرلاگ ان اور پروفائلز تک رسائی میں مشکلات ہیں۔
دوسری جانب سروسز ڈاؤن ہونے پر فیس بک انتظامیہ نے اپنے بیان میں کہا کہ سائٹ میں تکنیکی خرابی کے باعث فیس بک ڈاؤن ہوا، صارفین پریشان نہ ہوں مسئلہ جلد حل ہو جائےگا۔
خیال رہے کہ دنیا بھر میں میٹا سروسز فیس بک، انسٹا، میسنجر ڈاؤن اور اکاؤنٹس سائن آؤٹ ہو گئے تھے۔ فیس بک اور انسٹاگرام صارفین کو سیشن ایکسپائرڈ کا نوٹس موصول ہوا تھا۔ صارفین کا فیس بک اور انسٹا اکاؤنٹ سائن ان نہیں ہو پا رہا تھا۔
