Tag: اےآروائی نیوز

  • سوشل میڈیا کی بندش سے مارک زکربرگ کو کتنا نقصان ہوا؟

    سوشل میڈیا کی بندش سے مارک زکربرگ کو کتنا نقصان ہوا؟

    گزشتہ روز ایک گھنٹے کی سوشل میڈیا کی بندش سے صارفین کو شدید اذیت کا سامنا کرنا پڑا تھا، فیس بک صارفین کے اکاؤنٹس خود ہی سائن آؤٹ ہوگئے تھے۔

    تاہم کچھ دیر بعد سوشل میڈیا صارفین کو اس تکلیف سے چھٹکارا مل گیا اور ان کے فیس بک اکاؤنٹ خود ہی لاگ ان ہوگئے تھے۔

    منگل کو ہونے والی ایک گھنٹے کی سوشل میڈیا بندش سے دنیا کے چوتھے امیر ترین فرد مارک زکربرگ کو 3 ارب ڈالر کا نقصان ہوا ہائی ٹیک فرم میٹا کے فلیگ شپ پلیٹ فارمز فیس بک، انسٹا گرام اور تھریڈز کے شیئرز میں 1.6 فیصد کی کمی ہوئی۔

    گراوٹ کی وجہ سے وال اسٹریٹ مارکیٹ میں میٹا کا ایک شیئر 490.22 ڈالر کا ہوگیا مارک زکر برگ 179 ارب کے اثاثوں کے ساتھ اب بھی دنیا کے چوتھے امیر ترین فرد ہیں۔

    فیس بک، میسنجر، اور انسٹاگرام بند

    تاہم ابھی تک سوشل میڈیا پلیٹ فارمX کو دنیا بھر میں جزوی بندش یا رسائی میں مشکلات کا سامنا ہے۔

  • افغانستان کے اہم اضلاع پر قابض طالبان کا بڑا اعلان

    افغانستان کے اہم اضلاع پر قابض طالبان کا بڑا اعلان

    دوحہ: افغان طالبان کے ترجمان ذبیح ﷲ مجاہد کا کہنا ہے کہ افغانستان میں مضبوط پوزیشن کے باوجود طالبان مذاکرات کے لیے سنجیدہ ہیں۔

    برطانوی میڈیا سے بات چیت کرتے ہوئے افغان طالبان کے ترجمان نے بتایا کہ غیر ملکی فوج کے انخلا کے بعد ہم نے بیشتر علاقوں کا کنٹرول حاصل کرلیا ہے، میدان جنگ میں مضبوط پوزیشن ہونے کے باوجود مذاکرات کے لیے سنجیدہ ہیں۔

    ذبیح ﷲ مجاہد نے عندیہ دیا کہ آنے والے دنوں میں افغان حکومت سے مذاکرات میں تیزی آئیگی، آئندہ ماہ مذاکرات میں تحریری امن منصوبہ افغان حکومت کو پیش کرینگے۔دوسری جانب بین الاقوامی میڈیا رپورٹ میں کہا گیا ہے کہ افغان طالبان نے صوبہ قندھار اور پکتیکا کے مزید 13 اضلاع پر قبضہ کرلیا جبکہ مسلح گروپ کی جانب سے مزید پیش قدمی جاری ہے، افغان وزارتِ دفاع نے ملک میں جاری مسلح جتھے کی پیش قدمی کا اعتراف کرتے ہوئے بتایا کہ ’افغان فورسز طالبان کے خلاف بھرپور آپریشن کے لیے تیار ہیں۔

    افغان طالبان سے ہونے والی جھڑپوں میں مسلسل ناکامی کے باعث سرکاری فوجیوں نے تاجکستان کا رخ کرنا شروع کردیا ہے تاکہ اپنی زندگیاں بچاسکیں۔

    یہ بھی پڑھیں: امریکا کی افغان جنگ میں ناکامی ؟ کب کیا ہوا؟ جانیے

    یاد رہے کہ امریکی اور نیٹو افواج کا افغانستان سے انخلا جاری ہے، غیر ملکی افواج نے بگرام ایئربیس کا مکمل انتظام افغان فورسز کے حوالے کردیا ہے۔

    غیرملکی خبررساں ادارے کی رپورٹ کے مطابق طالبان رہنماؤں نے افغان فوج کے اہلکاروں کے نام ایک پیغام بھی جاری کیا، جس میں انہوں نے ہتھیار پھینکنے پر تحفظ دینے کی یقین دہانی کرائی جارہی ہے۔

  • میامی بلڈنگ حادثہ: ملبے تلے افراد کے زندہ بچنے کی امیدیں دم توڑنے لگی

    میامی بلڈنگ حادثہ: ملبے تلے افراد کے زندہ بچنے کی امیدیں دم توڑنے لگی

    واشنگٹن: امریکی ریاست میامی میں بارہ منزلہ عمارت گرنے سے ہلاکتوں کی تعداد گیارہ تک جاپہنچی ہے، حکام نے مزید ہلاکتوں کا خدشہ ظاہر کیا ہے۔

    امریکی میڈیا رپورٹ کے مطابق عمارت گرنے کا واقعہ چار روز قبل پیش آیا تھا، امدادی ٹیمیں ابھی تک گیارہ افراد کی لاشیں ملبے سے نکال چکی ہیں، حکام نے ملبے تلے مزید افراد کے دبے رہنے کا خدشہ ظاہر کیا ہے تاہم ان کے زندہ بچنے کی امیدیں نہایت کم ہیں۔

    امریکی میڈیا کے مطابق عمارت کے ملبےمیں ایک سو اکاون افراد اب تک لاپتہ ہیں لاپتہ افراد کا تعلق دنیا کے نو مختلف ممالک سےہے۔

    ریسکیو ٹیموں کے مطابق ملبے تلے زندگی کے کوئی آثار نہیں ہے، میامی کے میئر کا کہنا ہے کہ حادثے کے مقام پر ریسکیو آپریشن جاری ہے ، سینکڑوں ریسکیو ٹیمیں اسٹینڈ بائے پر بھی ہیں جبکہ اسرائیل اور میکسیکو سے بھی ماہرین ریسکیو آپریشن میں حصہ لے رہے ہیں۔

    امریکی حکام کا کہنا ہے کہ عمارت انیس سو اسی میں تعمیر کی گئی تھی، ابتدائی تحقیقات میں عمارت کےڈھانچےمیں نقائص کا انکشاف ہوا ہے، علاقہ مکینوں نے ہلاک ہونیوالوں کی یاد میں جائے حادثہ پر شمعیں روشن کیں۔

  • انتظار کی گھڑیاں ختم، پی ایس ایل 6 کے بقیہ میچز آج سے شروع ہورہے ہیں

    انتظار کی گھڑیاں ختم، پی ایس ایل 6 کے بقیہ میچز آج سے شروع ہورہے ہیں

    دبئی: شائقین کرکٹ کا انتظار ختم ہوا، پی ایس ایل کا ڈنکا بج گیا، آج اسلام آباد یونائٹیڈ اور لاہور قلندرز دبئی کے گرم موسم میں آمنے سامنے ہونگے۔

    تفصیلات کے مطابق پاکستان سپر لیگ کے چھٹے ایڈیشن کے بقیہ میچز آج سے شروع ہورہے ہیں، آج اسلام آباد یونائیٹڈ اور لاہور قلندرز آمنے سامنے ہوں گے، میچ ابوظبی میں پاکستانی وقت کے مطابق رات نو بجے شروع ہوگا۔

    کراچی کنگز پی ایس ایل فائیو کی فاتح ہے، دفاعی چیمپیئن کراچی کنگز کل ملتان سلطان سے مقابلہ کرے گی۔پاکستان سپر لیگ میں مجموعی طور پر 34 میچز کھیلے جانے ہیں، کرونا کے باعث ملتوی ہونے سے قبل لیگ کے کراچی میں 14 میچز کھیلے گئے تھے، کراچی کنگز،پشاور زلمی، ملتان سلطانز اور کوئٹہ گلیڈی ایٹرز نے 5، پانچ میچز کھیلے جبکہ اسلام آباد یونائیٹڈ اور لاہور قلندرز نے 4، چار میچز کھیلے۔

    پی ایس ایل سکس پوائنٹس ٹیبل

    دفاعی چیمپئن کراچی کنگز پانچ میچز کھیل کر 6 پوائنٹس ٹیبل پر سرفہرست ہے، پی ایس ایل کی مشہور ومعروف ٹیم نے تین میچز جیت رکھے ہیں، پشاور زلمی دوسرے، اسلام آباد یونائیٹڈ تیسرے، لاہور قلندرزچوتھے، ملتان سلطانز پانچویں جبکہ کوئٹہ گلیڈی ایٹرز چھٹے اور آخری نمبر پر موجود ہیں۔

    Image

    پی ایس ایل سکس کامیاب بلے باز

    پی ایس ایل سکس میں ملتان سلطانز کے وکٹ کپیر بلے باز محمد رضوان اب تک ٹورنامنٹ کے سب سے کامیاب بلے باز رہے، انہوں نے پانچ میچز میں 297 رنز بنائے، کراچی کنگز کے مایہ ناز بلے باز بابر اعظم 258 رنز کے ساتھ دوسرے ، کراچی کنگز کے جارح مزاج بلے باز شرجیل خان 200 رنز کے ساتھ تیسرے ، لاہور قلندرز کے فخر زمان 189 رنز کے ساتھ چوتھے جبکہ کوئٹہ گلیڈی ایٹرز کے کپتان اور وکٹ کیپر سرفراز احمد 185 رنز کے ساتھ پانچویں نمبر پر براجمان ہیں۔

    Image

    پی ایس ایل 6 میں اب تک کس بولر نے کتنی وکٹیں اڑائیں؟

    پی ایس ایل سکس میں اب تک پشاور زلمی کے ثاقب محمود 12 وکٹیں لیکر کامیاب تریب بولر رہے ہیں، لاہور قلندرز کے شاہین شاہ آفریدی9 وکٹوں کے ساتھ دوسرے ملتان سلطانز کے شاہنواز ڈاھانی 9 وکٹوں کے ساتھ تیسرے پشاور زلمی کے وہاب ریاض چوتھے جبکہ اسلام آباد یونائیٹڈ کے حسن علی 6 وکٹوں کے ساتھ پانچویں نمبر پر براجمان ہیں۔

    Image

    موسم کی صورت حال

    یو اے ای میں سخت موسم کھلاڑیوں کا امتحان لے گا، دن کے وقت ابوظبی میں درجہ حرارت 47 ڈگری سینٹی گریڈ تک جانے کا امکان ہے تاہم رات کو گرمی میں کمی اور اوس پڑنے کا خدشہ ہے، کھلاڑیوں کو گرمی اور حبس سے بچانے کے لئے آئس جیکٹ اور آئس کالر دئیے جائیں گے جبکہ انہیں ناریل پانی بھی دیا جائے گا۔

    خیال رہے کہ پاکستان سپر لیگ کے میچز رواں سال مارچ میں اس وقت مؤخر کر دیئے گئے تھے جب کھلاڑیوں اور سپورٹنگ اسٹاف میں کرونا کے کیسز سامنے آئے تھے اور لیگ کو دوبارہ ملک کے اندر شروع کرنے کی کوششوں کو وبا کی تیسری لہر میں شدت کے باعث ناکامی کا سامنا کرنا پڑا۔

     

  • طارق ملک ایک بار پھر چیئرمین نادرا تعینات

    طارق ملک ایک بار پھر چیئرمین نادرا تعینات

    اسلام آباد: وفاقی کابینہ کی منظوری کے بعد طارق ملک کو ایک بار پھر نئی ذمے داریاں تفویض کردی گئیں ہیں۔

    تفصیلات کے مطابق وزیراعظم عمران خان کی زیر صدارت وفاقی کابینہ کا اجلاس ہوا، اجلاس میں ملک کی سیاسی،معاشی اور اقتصادی صورت حال پر غور کیا گیا، جبکہ بجٹ تجاویز پر بھی تبادلہ خیال کیا گیا۔

    وفاقی کابینہ کے اجلاس میں اکیس نکاتی ایجنڈے پر غور کیا گیا ، جن میں سے وفاقی کابینہ نے متعدد نکات کی منظوری دے دی۔

    بعد ازاں نیوز کانفرنس کرتے ہوئے وزیر اطلاعات فواد چوہدری نے بتایا کہ طارق ملک نئے چیئرمین نادرا ہوں گے، وفاقی کابینہ نے اس فیصلے کی منظوری دے دی ہے۔

    واضح رہے کہ طارق ملک پاکستان پیپلز پارٹی (پی پی پی) کے دور میں بھی نادرا کے چیئرمین تعینات رہ چکے ہیں، سال دو ہزار چودہ میں انہوں نے نادرا چیئرمین کی حیثیت سے استعفیٰ دیا تھا۔

    طارق ملک اس وقت اقوام متحدہ کے ترقیاتی پروگرام کے تکنیکی مشیر کے طور پر کام کر رہے ہیں اور وہ ڈیجیٹل ٹرانسفورمیشن کے لیے اپنے ایجنڈے کی مدد کے لیے پاکستان کا حال ہی میں دورہ کرچکے ہیں۔

  • منشیات کے مکروہ دھندے میں ملوث ہائی  پروفائل ڈیلرز گرفتار

    منشیات کے مکروہ دھندے میں ملوث ہائی پروفائل ڈیلرز گرفتار

    کراچی: شہر قائد پولیس نے منشیات فروشوں کے خلاف بڑی کارروائی کرتے ہوئے ہائی پروفائل ڈرگ ڈیلرز کو گرفتار کرلیا ہے۔

    تفصیلات کے مطابق ایس ایس پی سٹی سرفراز نواز نے بتایا کہ ڈسٹرکٹ سٹی پولیس نے منشیات فروشوں کے کے خلاف اہم کارروائی کی، کارروائی کے دوران منشیات کی فروخت میں ملوث دو ہائی پروفائل ڈیلرز کو گرفتار کیا گیا ہے، گرفتار منشیات فروشوں کی شناخت لیاقت اور احسان کے ناموں سے ہوئی ہے۔

    ایس ایس پی سٹی کے مطابق گرفتار ملزمان سے 53پیکٹس میں موجود 64 کلو چرس، 110گرام کرسٹل اور دو لاکھ 70 ہزار نقدی برآمد کی گئی ہے، دوران تفتیش ملزمان نے بتایا کہ منشیات بلوچستان پشین کے ڈیلر حبیب سےخریدی گئی تھی۔

    سرفراز نواز کے مطابق خریدی گئی منیشات کراچی میں فروخت کی جانی تھی، ملزمان طویل عرصے سے اس مکروہ دھندے میں ملوث تھے اور منشیات فروشوں کو ان کے ٹھکانوں پر سپلائی کرتے تھے، گرفتار ملزمان کے خلاف مقدمہ درج کرتے ہوئے مزید تفتیش شروع کردی گئی ہے۔

    دوسری جانب محکمہ ایکسائز نے سندھ پنجاب سرحد پر کارروائی کرتے ہوئے ٹرک سے 20 کلو گرام چرس برآمد کرتے ہوئے ایک ملزم کو دھر لیا ہے،ملزم کو ایکسائزچیک پوسٹ کمبوہ شہید سندھ پنجاب بارڈر سےگرفتارکیا گیا ، گرفتار ملزم شفیق الرحمان کوہاٹ کا رہائشی بتایا جاتا ہے۔

  • مغربی بنگال الیکشن: کتنے مسلم امیدوار انتخاب جیتنے میں کامیاب ہوئے؟ جانئے حیران کن اعداد وشمار

    مغربی بنگال الیکشن: کتنے مسلم امیدوار انتخاب جیتنے میں کامیاب ہوئے؟ جانئے حیران کن اعداد وشمار

    کلکتہ: بھارتی ریاست مغربی بنگال کے اسمبلی انتخابات میں کئی مسلم امیدواروں نے فتح حاصل کرلی ہے۔

    بھارتی میڈیا رپورٹ کے مطابق بھارتی ریاست مغربی بنگال کے اسمبلی انتخابات میں کل 303 مسلم امیدوار میدان میں تھے جن میں سے 41 امیدواروں کو کامیابی حاصل ہوئی ہے، موجودہ وزیرِ اعلیٰ ممتا بینرجی کی پارٹی ترینمول کانگریس نے 3 مسلم خواتین امیدوار اور 40 مسلم مرد امیدوار کو اسمبلی الیکشن کے لیے نامزد کیا تھا، جن میں سے 41 امیدواروں کو کامیابی حاصل ہوئی ہے۔

    سنہ دو ہزار گیارہ کی مردم شماری کے مطابق بھارتی ریاست مغربی بنگال میں مسلمانوں کی آبادی تقریباً 27.01 فیصد ریکارڈ کی گئی تھی، یہی وجہ ہے کہ مغربی بنگال ووٹ کی سیاست میں مسلم طبقے کی اہمیت سب سے زیادہ ہے، الیکشن سے قبل ہر سیاسی جماعت مسلم ووٹروں کو متوجہ کرنے کی کوششوں میں مصروف عمل نظر آئی۔

    صرف ایک مسلم ایم ایل اے کا تعلق ٹی ایم سی سے نہیں ہے، جن کا نام نوساد صدیق ہیں جنہوں نے راشٹریہ سیکولر مجلس پارٹی (آر ایس ایم پی) کے ٹکٹ پر مغربی بنگال 2021 کے ریاستی انتخابات میں کامیابی حاصل کی ہے۔

    کامیاب مسلم امیدواروں کی مکمل تفصیلات

    1۔ حمیدالرحمان (ٹی ایم سی)

    2۔ عبدالکریم چودھری (ٹی ایم سی)

    3۔ محمد غلام ربانی (ٹی ایم سی)

    4۔ آزاد منہاج العارفین (ٹی ایم سی)

    5۔ مشرف حسین (ٹی ایم سی)

    6۔ تعارف حسین منڈل (ٹی ایم سی)

    7۔تجمل حسین (ٹی ایم سی)

    8۔ عبدالرحیم بخشی (ٹی ایم سی)

    9۔ محمد عبدالغنی (ٹی ایم سی)

    10۔ منیر الاسلام (ٹی ایم سی)

    11۔ آخرالزماں (ٹی ایم سی)

    12۔ علی محمد (ٹی ایم سی)

    13۔ ادریس علی (ٹی ایم سی)

    14۔ عبدالسومک حسین (ٹی ایم سی)

    15۔ ہمایوں کبیر (ٹی ایم سی)

    16۔ ربیع ا لعالم چودھری (ٹی ایم سی)

    17۔ حسن الزماں شیخ (ٹی ایم سی)

    18۔ نعمت شیخ (ٹی ایم سی)

    19۔ شاہینہ ممتاز خان (ٹی ایم سی)

    20۔ رفیق الاسلام منڈل (ٹی ایم سی)

    21۔ عبدالرزاق (ٹی ایم سی)

    22۔ نصیر الدین احمد (لعل) (ٹی ایم سی)

    23۔ کلول خان (ٹی ایم سی)

    24۔ رکبان الرحمان (ٹی ایم سی)

    25۔ عبدالرحیم قاضی (ٹی ایم سی)

    26۔ رحیمہ مونڈل (ٹی ایم سی)

    27۔ اسلام ایس کے نورل حاجی (ٹی ایم سی)

    28۔ رفیق الاسلام منڈل (ٹی ایم سی)

    29۔ محمد نوشاد صدیقی (آر ایس ایم پی)

    30۔ احمد جاوید خان (ٹی ایم سی)

    31۔ فردوسی بیگم (ٹی ایم سی)

    32۔ عبدالخلیق ملا (ٹی ایم سی)

    33۔ فرہاد حکیم (ٹی ایم سی)

    34۔ گلشن ملک (ٹی ایم سی)

    35۔ مولانا صدیق اللہ چودھری (ٹی ایم سی)

    36۔ شیخ شاہنواز (ٹی ایم سی)

    37۔ یاسمین شبینہ (ٹی ایم سی)

    38۔ شوکت ملا (ٹی ایم سی)

    39۔ غیاث الدین ملا (ٹی ایم سی)

    40۔ رفیق الرحمان (ٹی ایم سی)

    41۔ جفیق الاسلام (ٹی ایم سی)

    واضح رہے کہ بھارتی ریاست مغربی بنگال میں ہونے والے قانون ساز اسمبلی کے انتخاب میں ممتا بینرجی کی جماعت نے بھارتیہ جنتا پارٹی کو دھول چٹادی ہے، اب تک آنے والے غیرحتمی غیر سرکاری نتائج کے مطابق ریاست بنگال کی حکمراں جماعت ترنمول کانگریس 215 سے زائد نشستیں جیت چکی ہے جبکہ مرکزی حکمراں جماعت بھارتیہ جنتا پارٹی صرف 74 نشستیں ہی جیت سکی ہے۔

  • گندم کی امدادی قیمت سے متعلق ای سی سی کا بڑا فیصلہ

    گندم کی امدادی قیمت سے متعلق ای سی سی کا بڑا فیصلہ

    اسلام آباد: مشیر خزانہ عبدالحفیظ شیخ کی زیر صدارت ہونے والے اقتصادی رابطہ کمیٹی کے اجلاس میں گندم کی نئی امدادی قیمت 1600 روپے فی من مقرر کرنے کی منظوری دے دی گئی ہے۔

    تفصیلات کے مطابق مشیر خزانہ عبدالحفیظ شیخ کی زیر صدارت ای سی سی اجلاس ہوا، جس کا اعلامیہ جاری کردیا گیا ہے، اعلامیے کے مطابق گندم کی امدادی قیمت میں دو سو روپے کی منظوری دے دی گئی ہے، جس کے بعد گندم کی نئی امدادی قیمت 1600 روپے فی من مقرر کر دی گئی ہے، اس سے قبل امدادی قیمت 1400 روپے فی من مقرر تھی۔

    اجلاس میں ای سی سی کو ٹریڈنگ کارپوریشن آف پاکستان (ٹی سی پی) کے زیر اہتمام گندم کی درآمد پر بھی تفصیلی بریفنگ دی گئی، بریفنگ میں بتایا گیا کہ دو ہزار دس سے اب تک چار بار گندم کی امدادی قیمت پر نظرثانی کی گئی، اس کے علاوہ گندم کی درآمد کا حجم 18 لاکھ میٹرک ٹن کرنے کی بھی منظوری دی گئی ، ساتھ ہی شرکا کو بتایا گیا کہ جنوری2021تک ٹی سی پی10لاکھ میٹرک ٹن گندم درآمد کرلے گا۔

    یہ بھی پڑھیں: ای سی سی کی گھریلو اور کمرشل صارفین کیلئے آر ایل این جی فراہم کرنے کی منظوری

    ای سی سی اجلاس میں وزارت فوڈ کی جانب سے روس سے مزید 3 لاکھ 20ہزار ٹن گندم درآمد کی تجویز کی توثیق بھی کی گئی۔New wheat support price to add Rs3b to farmers' kitty | The Express Tribuneاقتصادی رابطہ کمیٹی کے اجلاس کے جاری اعلامیے کے مطابق پاور ڈویژن کے 50 فیصد ٹیرف سبسڈی فرق کےاجرا کی بھی منظوری دی گئی، پاور ڈویژن کو دیئےجانے والے65.8 ارب بجلی پیدا کرنے والی کمپنیز کو دیئے جائیں گے، اس کے علاوہ اضافی بجلی صنعتوں کو 12.96 روپے فی یونٹ پرفراہم کرنےکی بھی منظوری دی گئی۔

  • موبائل فون چارج کرنے کے لیے ذاتی بجلی تیار کریں

    موبائل فون چارج کرنے کے لیے ذاتی بجلی تیار کریں

    حرکت اور دباؤ سے بجلی بنانے والے آلات تو موجود ہیں لیکن اب ماہرین نے ایسا آلہ تیار کر لیا ہے جو صرف چھونے سے معمولی مقدار میں ذاتی استعمال کے لیے بجلی پیدا کرسکتا ہے۔

    امریکی ریاست ٹینیسی میں تیار کیا جانے والا یہ ننھا آلہ نہایت باریک ہے جس کو چھونے سے بجلی پیدا کی جاسکتی ہے۔

    اس آلے کو سیاہ فاسفورس کی انتہائی باریک پرتوں سے تیار کیا گیا ہے اور یہ بیٹری کے ذریعے کام کرتا ہے۔

    ٹینیسی کی ونڈر بلٹ یونیورسٹی کے پروفیسر کارل زیلک کے مطابق یہ ایجاد خطرناک مشن پر جانے والوں اور مشکل کام سر انجام دینے والوں کے لیے نہایت کارآمد ثابت ہوگی جس کے دوران اسے کپڑوں سے منسلک کرلینا آسان ہوگا۔

    لباس سے منسلک ہونے کے بعد یہ آلہ نہ تو دکھائی دے گا اور نہ ہی یہ لباس کی ساخت یا شکل میں کوئی تبدیلی لائے گا۔

    اس سے پیدا ہونے والی بجلی سے اسمارٹ فونز، فٹنس ٹریکر اور ذاتی استعمال کے دیگر چھوٹے برقی آلات چارج کیے جاسکیں گے۔

    سائنسدانوں کا کہنا ہے کہ اس آلے کے استعمال کا مطلب ہے کہ آپ اپنی ذاتی بجلی پیدا کر رہے ہیں۔

    اس آلہ پر فی الحال مزید کام کیا جارہا ہے اور مزید بہتری کے بعد یہ انسانی حرکت اور ارد گرد کے ماحول سے بجلی بنانے کے قابل ہوجائے گا۔


     

  • ووٹوں کی گنتی ہمارے سامنے ہوتی تو شکست تسلیم کرتے: مصطفیٰ کمال

    ووٹوں کی گنتی ہمارے سامنے ہوتی تو شکست تسلیم کرتے: مصطفیٰ کمال

    اسلام آباد: پاک سرزمین پارٹی کے سربراہ مصطفیٰ کمال کا کہنا ہے کہ کراچی کا نتیجہ 4 دن بعد آیا، ووٹوں کی گنتی ہمارے سامنے ہوتی تو شکست تسلیم کرتے۔

    تفصیلات کے مطابق سابق میئر کراچی اور پاک سرزمین پارٹی کے سربراہ مصطفیٰ کمال کی مردم شماری سے متعلق درخواست سماعت کے لیے منظور کرلی گئی۔

    سپریم کورٹ میں چیف جسٹس نے ان چیمبر درخواست قابل سماعت ہونے پر سماعت کی۔ انہوں نے رجسٹرار کے اعتراضات کو ختم کردیا۔

    سپریم کورٹ کے باہر میڈیا سے گفتگو کرتے ہوئے مصطفیٰ کمال کا کہنا تھا کہ آج مردم شماری سے متعلق ہماری درخواست کی سماعت ہوئی، درخواست پر جو اعتراضات تھے وہ ختم ہوگئے۔

    انہوں نے کہا کہ مردم شماری میں سندھ کی شہری آبادی کو کم کر دیا گیا۔ بہت ظلم ہوا ہے کہ کراچی کی آبادی کو کم دکھایا گیا۔ ’وزیر اعلیٰ کو آواز اٹھانی چاہیئے تھی، خود پارٹنر ان کرائم بن گئے‘۔

    مصطفیٰ کمال کا کہنا تھا کہ شہر کی جو پارٹی تھی اس نے بھی اس مسئلے پر آواز نہیں اٹھائی، اس ظلم سے شہر کو ملنے والے ترقیاتی فنڈز میں کمی ہوگی۔ مردم شماری کا مقصد معیشت اور وسائل سے متعلق ہوتا ہے۔

    انہوں نے کہا کہ مردم شماری میں کراچی کے 70 لاکھ لوگوں کو کم کیا گیا۔ پاک سرزمین واحد پارٹی ہے جس نے مردم شماری سے متعلق آواز اٹھائی۔

    انہوں نے مزید کہا کہ الیکشن میں پولنگ اسٹیشنز میں ووٹوں کی گنتی ہمارے سامنے نہیں ہوئی۔ ’اگر ڈبے سامنے گنے جاتے تو جیتنے والوں کو مبارکباد دیتا، پولنگ ایجنٹس کو نہ نکالا جاتا تو مان لیتا کہ ہمیں مسترد کر دیا گیا‘۔

    مصطفیٰ کمال نے کہا کہ ارشد وہرہ کے حلقے میں انہیں 21 پولنگ اسٹیشنز میں 8 ہزار 2 سو 22 ووٹ ملے۔ 48 گھنٹے بعد 305 حلقوں میں انہیں صرف 7 سو ووٹ ملے، یہ کیسے ہوا؟

    انہوں نے کہا کہ سب جانتے ہیں کہ الیکشن میں بد دیانتی ہوئی، اعتراضات داخل کریں گے۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔