ابوظہبی میں پاکستان اور سری لنکا کے درمیان چوتھا ون ڈے ملالہ یوسف زئی نے بھی اسٹیڈیم میں دیکھا اور پاکستان کی جیت پر ٹیم کو خوب داد بھی دی۔
پاکستان میں بچوں اور لڑکیوں کی تعلیم کے لیے کوشاں ملالہ یوسف زئی بھی کرکٹ کی دلدادہ نکلیں وہ پاکستان اور سری لنکا کے درمیان چوتھے ون ڈے کو دیکھنے کے لیے ابوظہبی کے شیخ زید اسٹیڈیم میں موجود تھیں اور میچ کے دوران پاکستانی کھلاڑیوں کی عمدہ کارکردگی پر انھیں تالیاں بجاکر داد بھی دیتی رہیں۔ ان کی موجودگی میں پاکستان نے سری لنکا کے خلاف سیریز بھی جیت لی۔
ابوظہبی میں سری لنکا کو شکست دے کر پاکستان رواں سال ون ڈے میں سب سے زیادہ سات سیریز جیتنے والی ٹیم بن گئی ہے۔ پاکستان میں انٹرنیشنل کرکٹ کے دروازے تو بند ہیں لیکن قومی ٹیم غیر ملکی سرزمین پرکامیابیوں کے جھنڈے ضرورگاڑرہی ہے۔
پاکستان نے دوہزارتیرہ میں ون ڈے سیریز کا آغاز روایتی حریف بھارت کے خلاف کامیابی کے ساتھ کیا۔ اسکاٹ لینڈ اورآئرلینڈ کمزور ٹیمیں رہیں لیکن ان کے خلاف بھی پاکستان سرخرورہا۔ جس کے بعد کالی آندھی کہلانے والی ویسٹ انڈین ٹیم کو ان کی سرزمین پر تین ایک سے مات دی۔
ویسٹ انڈیز کے بعد زمبابوے کو تین میچز کی سیریز میں گرین شرٹس نے اپنا نشانہ بنایا۔ جنوبی افریقہ بھی قومی ٹیم کے عتاب سے نہ بچ پائی۔ پاکستانی شاہینوں نے جنوبی افریقہ کے خلاف تاریخ ساز فتح سمیٹی اور پروٹیز کو ان کے ہوم گراؤنڈ پر شکست دینے والی پہلی ایشیائی ٹیم بھی بن گئی۔
پاکستان نے دوہزار تیرہ کا اختتام سری لنکا کے خلاف ون ڈے سیریز میں جیت کے ساتھ کردیا ہے۔ رواں سال پاکستان ایک روزہ کرکٹ میں سب سے زیادہ سات سیریز جیتنے والی ٹیم بھی بن گئی۔
اسٹارآل راؤنڈرشاہد آفریدی بیٹی کی طبیعت خراب ہونے کے باعث دبئی سے وطن واپس پہنچ رہے ہیں۔ آفریدی سری لنکا کے خلاف پانچویں ون ڈے میں ٹیم کا حصہ نہیں ہوں گے۔ پاکستان اور سری لنکا کے درمیان سیریز کا پانچواں ون ڈے کل ابوظہبی میں کھیلا جائے گا۔
اسٹار کھلاڑی شاہد آفریدی بیٹی کی طبیعت کی ناسازی کے باعث دبئی سے وطن واپس پہنچ رہے ہیں۔ وہ سری لنکا کے خلاف آخری ون ڈے میں ایکشن میں دکھائی نہیں دے سکیں گے۔ پاکستان سیریز میں پہلے تین ایک کی فیصلہ کن برتری حاصل کرچکا ہے۔
پاکستان ٹیم کے کپتان مصباح الحق کہتے ہیں کہ ٹیم ورک کی وجہ سے سیریز جیتی ہے۔ اینجلو میتھیوز کہتے ہیں انکی ٹیم ہر شعبہ میں ناکام رہی۔ مین آف دی میچ محمد حفیظ شاندار کارکردگی اپنے لیے اعزاز سمجھتے ہیں۔
گرین شرٹس ٹیم کے کپتان مصباح الحق کا کہنا ہے کہ محمد حفیظ نے شاندار پرفارمنس دکھائی۔۔ دیگر کھلاڑیوں نے بھی بھرپور محنت کی اور سیریز جیت گئے۔
مصباح الحق سری لنکن ٹیم کے کپتان اینجلو میتھیو نے کہا کہ پاکستانی ٹیم نے اچھی کرکٹ کھیلی۔
آخری میچ جیتنے کیلئے سردھڑ کی بازی لگائیں گے ساٹ اینجلو میتھیوز مین آف دی میچ محمد حفیظ کے مطابق وہ ظہیر عباس کا ریکارڈ برابر کرنا اپنے لیے اعزاز سمجھتے ہیں۔
پروفیسر حفیظ کا کہنا تھا کہ ابتدا میں انھیں مشکلات درپیش رہیں مگر محنت رنگ لائی۔
روپےکے مقابلےمیں ڈالرکی قدرمیں مسلسل کمی ریکارڈ کی جارہی ہےجس کے بعد ڈالر تین ماہ کی کم ترین سطح پر آگیا۔ بین الاقوامی مالیاتی فنڈ کی جانب سے قرضے کی رقم ملنے کے بعد ڈالر کی قدرتین ماہ کی کم ترین سطح پرآگئی۔
کرنسی ڈیلرزکے مطابق انٹر بینک مارکیٹ میں روپے کی نسبت امریکی ڈالر قدر میں ایک دم تیس پیسےکمی سےایک سو پانچ روپے بیس پیسے کاہوگیا جس کے اثرات اوپن کرنسی مارکیٹ پربھی مرتب ہوئے جہاں روپےکی نسبت ڈالر کی قدر تیس پیسےمزید کمی سےایک سو پانچ روپے بیس پیسے ہوگئی۔ اس طرح ذرمبادلہ کی دونوں مارکیٹوں میں امریکی ڈالر کی قدر یکساں ہوگئی ہے۔
سابق گورنر سندھ اور پیپلز پارٹی کے رہنما کمال اظفرکی کتاب کی لاہور میں تقریب رونمائی کا انعقاد کیا گیا۔ مقامی ہوٹل میں تقریب سے خطاب کرتے ہوئے بیگم عابدہ حسین، خورشید محمود قصوری، کمال اظفر اور دیگر نے کہا کہ کتاب "دی واٹرز آف لاہور" تاریخ پاکستان پر لکھی جانے والی ایک نادر کتاب ہے۔
نوجوانوں کو یہ کتاب پڑھنی چاہے تاکہ انہیں اندازہ ہو یہ ملک کتنی قربانیاں دے کر حاصل کیا گیا ہے۔ کتاب کے مصنف نے کہا کہ وہ پاکستان کے بارے میں اسٹیٹ کے تاثر سے متفق نہیں۔ آنے والی صدی ایشیا کی صدی کہلائے گی۔
رواں مالی سال کے پہلے پانچ ماہ میں خدمات کے تجارتی خسارے کا حجم ایک ارب ڈالر سے زائد رہا۔خدمات کی برآمدات کی حجم میں خاطر خواہ کمی کے باعث خسارے میں اضافہ ریکارڈ کیا گیا۔
اسٹیٹ بینک کے مطابق رواں مالی سال کے پہلے پانچ ماہ میں خدمات کی برآمدات کا حجم چھپین کروڑ تیس لاکھ ڈالررہا جو کہ گزشتہ مالی سال کے اسی عرصے میں ایک ارب نو کروڑستر لاکھ ڈالر تھا ۔
معاشی تجزیہ کاروں کے مطابق گزشتہ سال کے مقابلے میں رواں مالی سال جولائی تا نومبر کےدوران کوئلیشن سپورٹ فنڈ کی مد میں ملنےوالے رقم میں کمی کے باعث خدمات کی برآمدات میں کمی ریکارڈ کی گئی ہے۔
رواں سال نومبر2013ء کے دوران ٹریکٹروں کی پیداوار اور فروخت میں نمایاں اضافہ ریکارڈ کیا گیا، پاکستان ایسوسی ایشن آف آٹو موٹو پارٹس اینڈ مینوفیکچرز کے اعدادوشمارکے مطابق ٹریکٹرتیارکرنے والی دو بڑی کمپنیوں کی نومبر2013ء کے دوران پیداوار بالترتیب 3 ہزار720 اور 4 ہزار 319 یونٹس رہی، جوگزشتہ سال کے اسی عرصے کے دوران 3 ہزار 210 اور 3 ہزار 292 یونٹس تھی، حکام کے مطابق نومبر 2013ء کے دوران ٹریکٹروں کی فروخت دو ہزار 58 یونٹس ریکارڈ کی گئی۔
فیڈریشن آف پاکستان چیمبرآف کامرس اینڈ انڈسٹری(ایف پی سی سی آئی )نے ایف بی آر کے ویب سسٹم کی وجہ سے برآمدات میں تاخیرپرتشویش کا اظہار کرتے ہوئے مطالبہ کیا ہے کہ ایف بی آر برآمد کنندگان کے لیے آئی ڈی اور پاس ورڈ حاصل کرنے کے لئے سیلزٹیکس رجسٹریشن نمبرکی شرط ختم کرے۔
ایف پی سی سی آئی کے سینئررہنما اظہرسعید بٹ نے اپنے ایک بیان میں کہا کہ اس شرط کی وجہ سے نہ صرف برامدات تاخیر کا شکار ہورہی ہیں بلکہ کئی تاجروں کے برآمدی آرڈرزبھی منسوخ ہورہے ہیں اورچھوٹے تاجروں کی حوصلہ شکنی ہورہی ہے۔
انہوں نے کہا کہ کاٹیج انڈسٹری سے وابستہ تاجروں کے لیے اس شرط کوختم کیا جائے، انہوں نے مزید کہا کہ حکومت صرف مخصوص شعبوں کی برآمدات پر توجہ دینے کی بجائے دستکاری، سافٹ ویئرڈیزائن اوردیگراہم شعبوں کی برآمدات میں بھی اضافہ کرے۔
رواں مالی سال 2013-14ء کے پہلے چار ماہ (جولائی تا اکتوبر 2013ء )کے دوران ٹیکسٹائل مصنوعات کی برآمدات میں 7 فیصد اضافہ ریکارڈ کیا گیا۔
پاکستان ادارہ شماریات (پی بی ایس)کے جاری کردہ اعداد و شمار کے مطابق جولائی سے اکتوبر 2013ء کے دوران 4 ارب 69 کروڑ ڈالر مالیت کی ٹیکسٹائل مصنوعات برآمد کی گئی جبکہ گزشتہ سال کی اسی مدت کے دوران چار ارب 30 کروڑ ڈالرمالیت کی مصنوعات برآمد کی گئی تھی۔
اس عرصہ کے دوران خام کپاس اور دھاگے کی برآمدات میں نمایاں اضافہ ریکارڈ کیا گیا جبکہ تولئے اوربیڈ ویئرکی برآمدات میں بھی بتدریج تیزی آئی ۔