Tag: اےآروائی نیوز

ہیملٹن ٹیسٹ میں ویسٹ انڈیز نے نیوزی لینڈ کے خلاف پہلی اننگز میں چھ وکٹوں پر دو سو نواسی رنزبنالئے۔
ہیملٹن میں کھیلے جانے والے میچ کا ٹاس نیوزی لینڈ نے جیت کر پہلے فیلڈنگ کا فیصلہ کیا۔ اوپننگ جوڑی نے ٹیم کو اکتالیس رنز کا آغاز فراہم کیا۔

بریتھ ویٹ پینتالیس رنز بناکر آؤٹ ہوئے۔ چندرپال اور دنیش رام دین نے ٹیم کی پوزیشن بہتر کی۔ دنیش رام دین نے سینچری بنائی۔ وہ ایک سو سات رنزبناکر آؤٹ ہوئے۔ پہلے روز کھیل کے اختتام تک ویسٹ انڈیز نے چھ وکٹوں پر دو سو نواسی رنزبنالئے ہیں۔ چندرپال چورانوے رنز کے ساتھ وکٹ پر موجود ہیں۔

جنوبی افریقہ کے خلاف جوہانسبرگ ٹیسٹ میں بھارت آج اپنی پہلی نامکمل اننگز دو سو پچپن رنز پانچ کھلاڑی آؤٹ پر دوبارہ شروع کرے گا۔

جوہانسبرگ میں کھیلے جانے والے میچ کا ٹاس بھارت نے جیت کر بیٹنگ کا فیصلہ کیا۔ چوبیس رنز پر ابتدائی دو وکٹیں گرنے کے بعد ویرات کوہلی کی شاندار سینچری نے بھارتی ٹیم کو مشکلات سے نکالا۔

کوہلی نے ٹیسٹ کیرئیر کی چوتھی سینچری اسکور کی۔ وہ ایک سو انیس رنزبناکر کیلس کا شکار بنے۔ شیکھر دھون تیرہ، مرلی وجے چھ اور روہت شرما نے چودہ رنزبنائے۔ بھارت نے پہلے روز کے اختتام پر پانچ وکٹوں پر دو سو پچپن رنزبنائے۔

آئی سی سی نے ٹیسٹ کی نئی رینکنگ جاری کردی۔ پاکستانی کپتان مصباح الحق آٹھویں نمبر پر برقرار ہیں۔
آئی سی سی کی جاری کردہ ٹیسٹ بیٹسمین رینکنگ میں جنوبی افریقہ کے اے بی ڈیویلئیرز پہلے اور ہاشم آملہ دوسرے نمبر پر براجمان ہیں۔

پاکستان کے مصباح الحق آٹھویں اور یونس خان دسویں نمبر پر برقرار ہیں۔ آسٹریلیا کے ڈیوڈ وارنر تین درجہ بہتری کے بعد گیارہویں نمبر پر آگئے ہیں۔ بولرز رینکنگ میں جنوبی افریقہ کے ڈیل اسٹین کو پہلا نمبر ہے۔ پاکستان کے سعید اجمل چوتھی پوزیشن پر موجود ہیں۔

صحرا میں بلے بازوں نے رنز کے دریا بہادیئے۔ پہلے پاکستان اور پھر سری لنکن بیٹسمینوں نے بولرز پر خوب لاٹھی چارج کیا۔ پاکستان کے شرجیل خان ڈیبیو پر نصف سینچری بنانے والے آٹھویں پاکستانی کھلاڑی بن گئے۔ شارجہ کا میدان بولرز کا امتحان بن گیا،چوکوں اور چھکوں کی برسات ہوئی۔

بولرز پرلاٹھی چارج کی ابتدا کی شرجیل خان نے اور ڈیبیو میں ہی اپنی صلاحیتوں کا لوہا منواڈالا۔ شرجیل خان پاکستان کی جانب سے ڈیبیو پرنصف سینچری بنانے والے آٹھویں کھلاڑی بن گئے۔ شرجیل کے بعد حفیظ، صہیب مقصود اور شاہد آفریدی نے بھی لنکن بولرز کی جم کر دھلائی کرڈالی۔ 

پاکستان نے بنائے تین سو بائیس رنز جو شارجہ میں قومی ٹیم کا تیسرا بڑا اسکور ہے۔ پاکستانی ٹیم شارجہ کے میدان میں ایک اننگز میں سب سے زیادہ چھکے لگانے والی ٹیم بھی بن گئی۔ لنکن بیٹسمینوں نے حساب چکانے میں کوئی کثر نہیں چھوڑی ،پاکستان کے پہاڑ جیسے ہدف کے سامنے سری لنکن بیٹسمنوں نے ہتھیار نہیں ڈالے۔

ایک موقع پر مہمان بلے بازوں کے آگے پاکستانی بولرز کے ہاتھ پاؤں پھول گئے تھے  انچاسویں اوور میں میچ پاکستان کے ہاتھ میں آگیا اور سیریز میں گرین شرٹس نے سنسنی خیز مقابلے کے بعد ایک صفر کی برتری  حاصل کرلی۔

بنگلہ دیش میں پاکستان خلاف مظاہروں نے ایشیا کپ اور ورلڈ ٹی ٹوئنٹی میں قومی ٹیم کی شرکت پر شکوک وشبہات پیدا کردیئے ہیں۔

بنگلہ دیش میں حکومت مخالف گروپس کی جانب سے مظاہروں اور جلاؤ گھیراؤ کا سلسلہ جاری ہے۔ جس میں کئی ہلاکتیں بھی ہوچکی ہیں۔ ویسٹ انڈیز کی انڈر نائنٹین ٹیم کو بھی بنگلہ دیش سے دورہ ادھورہ چھوڑ کر وطن واپس بلالیا گیا ہے جبکہ دیگر ٹیموں کی جانب سے بھی بنگلہ دیش میں موجودہ حالات پر تحفظات کا اظہار کیا گیا ہے۔

عبدالقادر ملا کو پھانسی دینے کے بعد سے بنگلہ دیش میں حالات کشیدہ ہیں ایسے میں عبدالقادر ملا کی سزائے موت پر پاکستان کی مذمتی قراد داد سے بنگلہ دیش میں پاکستان خلاف مظاہرے بھی شروع ہوگئے ہیں۔

مظاہروں کے سبب فروری میں ایشیا کپ اور ورلڈ ٹی ٹوئنٹی میں پاکستان کی شرکت پر سوالیہ نشان لگ گیا ہے۔ بنگلہ دیش سے ایونٹ کی منتقلی اور ٹیموں کے تحفظات دور کرنے کے لئے اب آئی سی سی کو کوئی فیصلہ کرنا ہوگا۔