ARYNews.tv | Urdu – Har Lamha Bakhabar

Tag: اےآروائی نیوز

  • ایف آئی اے کسی سیاستدان کو 30 جولائی تک نہ بلائے: چیف جسٹس

    ایف آئی اے کسی سیاستدان کو 30 جولائی تک نہ بلائے: چیف جسٹس

    اسلام آباد: سپریم کورٹ میں جعلی بینک اکاؤنٹس کیس کی سماعت کے دوران چیف جسٹس ثاقب نثار نے کہا کہ وفاقی تحقیقاتی ایجنسی (ایف آئی اے) آصف زرداری سمیت کسی سیاستدان کو 30 جولائی تک نہ بلائے۔

    تفصیلات کے مطابق سپریم کورٹ میں چیف جسٹس میاں ثاقب نثار کی سربراہی میں دو رکنی بینچ نے جعلی بینک اکاؤنٹس سے متعلق کیس کی سماعت کی۔

    دوران سماعت چیف جسٹس نے ریمارکس دیتے ہوئے کہا کہ ہر شخص کا اپنا وقار اور حرمت ہے۔ کسی کی تضحیک نہیں ہونے دیں گے۔ ایسا حکم نہیں دیں گے جس سے کسی کا حق متاثر ہو۔

    چیف جسٹس کا کہنا تھا کہ سابق صدر آصف زرداری اور فریال تالپور کا نام اگزٹ کنٹرول لسٹ میں ڈالنے کا ہم نے نہیں کہا پھر ان کا نام ای سی ایل میں کیوں ڈالا۔ آصف زرداری اور فریال تالپور ملزم نہیں۔ عدالت نے صرف ملزمان کے نام ای سی ایل میں شامل کرنے کا کہا تھا۔

    مزید پڑھیں: آصف زرداری اور فریال تالپور کا نام ای سی ایل میں ڈالنے کا حکم

    چیف جسٹس نے ریمارکس میں کہا کہ کیا ہم نے آصف زرداری کا نام ای سی ایل میں ڈالنے کا حکم دیا؟ اعتزاز احسن نے پریس بریفنگ کی۔ عدالت نے پیرا گراف نمبر 4 کے ملزمان کے نام ای سی ایل میں ڈالنے کا حکم دیا۔ پیرا گراف 4 میں صرف ملزمان کے نام ہیں۔ اگر عدالتی حکم میں ابہام تھا تو عدالت سے رجوع کر لیتے۔

    سماعت کے دوران آصف زرداری کے وکیل نے ایف آئی اے کی تحقیقاتی ٹیم کے سربراہ نجف مرزا کو تبدیل کرنے کی استدعا کی جس کو عدالت نے مسترد کردیا۔

    چیف جسٹس نے ریمارکس میں کہا کہ کرپشن ہوئی ہے تو سامنے آنی چاہیئے، نجف مرزا کو تبدیل نہیں کریں گے۔

    چیف جسٹس نے ریمارکس دیے کہ یہ تحقیق کرنا چاہتے ہیں کہ 35 ارب کے بوگس بینک اکاؤنٹ کیوں کھولے گئے۔ زرداری گروپ کے اکاؤنٹ میں ڈیڑھ کروڑ کس نے ڈالا، اگر ڈیڑھ کروڑ رقم کے ذرائع لیگل ہیں تو بتا دیں، ہمارا مقصد یہ ہے کہ ایف آئی اے صاف شفاف تحقیقات کرے۔

    چیف جسٹس نے مزید کہا کہ آصف زرداری کو نہ ذاتی حیثیت میں طلب کیا نہ ہی ان کا نام ای سی ایل میں ڈالا۔

    عدالت نے ایف آئی اے کو الیکشن تک آصف زرداری اور فریال تالپور کو شامل تفتیش کرنے سے روکتے ہوئے کہا کہ کیس سے متعلق نیا وضاحتی حکم جاری کریں گے۔

    عدالت نے کیس کی مزید سماعت 6 اگست تک ملتوی کردی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • عالمی یوم آبادی: خاندانی منصوبہ بندی انسانی حق ہے

    عالمی یوم آبادی: خاندانی منصوبہ بندی انسانی حق ہے

    آج دنیا بھر میں عالمی یوم آبادی منایا جارہا ہے۔ اس دن کو منانے کا آغاز 1989 سے اقوام متحدہ کی جانب سے کیا گیا جس کا مقصد دنیا میں بڑھتی ہوئی آبادی اور اس سے متعلق مسائل کے حوالے سے شعور پیدا کرنا تھا۔

    رواں برس یہ دن ’خاندانی منصوبہ بندی انسانی حق ہے‘ کے خیال کے تحت منایا جارہا ہے۔

    اقوام متحدہ کے منشور کے مطابق خاندانی منصوبہ بندی کے محفوظ ذرائع تک رسائی ہر شخص کا بنیادی حق ہے۔

    یہ خواتین کی خود مختاری اور صنفی امتیاز کے خاتمے کے لیے بھی ضروری ہے جو آگے چل کر غربت اور جہالت ختم کرنے اور کسی ملک کو معاشی طور پر اپنے پیروں پر کھڑا کرنے میں معاون ثابت ہوسکتا ہے۔

    آبادی کے حوالے سے حقائق

    اس وقت دنیا بھر کی آبادی 7.6 ارب ہے۔

    ایک محتاط اندازے کے مطابق ہر سال دنیا کی آبادی میں سوا 8 کروڑ افراد کا اضافہ ہوجاتا ہے۔

    سنہ 2030 تک آبادی میں مزید ایک ارب اضافہ متوقع ہے۔

    اس صدی کے اختتام یعنی سنہ 2100 تک دنیا کی آبادی 11.2 ارب ہوجائے گی۔

    سنہ 2050 تک دنیا بھر کی آبادی کا 50 فیصد ان 9 ممالک میں ہوگا۔ امریکا، انڈونیشیا، بھارت، پاکستان، نائجیریا، کانگو، ایتھوپیا، تنزانیہ، یوگنڈا۔

    فی الوقت چین کی آبادی 1.38 ارب ہے جبکہ بھارت کی آبادی 1.31 ارب ہے تاہم اگلے برس بھارت اس ضمن میں چین کو پیچھے چھوڑ دے گا۔

    اس وقت پیدائش کی شرح سب سے کم یورپ جبکہ سب سے زیادہ افریقہ میں ہے۔

    سنہ 2050 تک افریقی ملک نائیجریا آبادی کے لحاظ سے تیسرا بڑا ملک بن جائے گا۔

    پاکستان میں اس وقت 19 کروڑ 17 لاکھ سے زائد آبادی موجود ہے جو سنہ 2030 تک بڑھ کر ساڑھے 24 کروڑ ہوجائے گی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • الیکشن کمیشن نے ملک بھر کے بلدیاتی اداروں کے سربراہان کو معطل کردیا

    الیکشن کمیشن نے ملک بھر کے بلدیاتی اداروں کے سربراہان کو معطل کردیا

    اسلام آباد: الیکشن کمیشن نے ملک بھر کے بلدیاتی اداروں کے سربراہان کو 25 جولائی تک معطل کردیا۔

    تفصیلات کے مطابق الیکشن کمیشن کا کہنا ہے کہ ملک بھر کے بلدیاتی اداروں کے سربراہان کو معطل کیا جارہا ہے۔ بلدیاتی اداروں کے سربراہان 25 جولائی تک معطل رہیں گے۔

    الیکشن کمیشن نے کنٹونمنٹ کے بلدیاتی سربراہان کو بھی معطل کردیا ہے۔

    ذرائع الیکشن کمیشن کے مطابق یہ اقدام شفاف انتخابات کے انعقاد کی غرض سے کیا گیا ہے تاکہ کوئی بھی شخص عام انتخابات پر اثر انداز نہ ہوسکے۔

    خیال رہے کہ اس سے قبل الیکشن کمیشن نے ملک بھر میں بلدیاتی اداروں کو 3 ماہ کے لیے معطل کرنے کا فیصلہ کیا تھا۔

    علاوہ ازیں الیکشن کمیشن نے عام انتخابات میں قبل از وقت دھاندلی روکنے کے لیے سرکاری ملازمتوں پر بھی پابندی عائد کردی تھی۔

    یاد رہے کہ ملک بھر میں عام انتخابات 25 جولائی کو منعقد کیے جائیں گے جس کے لیے بھرپور تیاریاں جاری ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ہالی ووڈ اداکار جارج کلونی کی اسکوٹر کو حادثہ، اداکار زخمی

    ہالی ووڈ اداکار جارج کلونی کی اسکوٹر کو حادثہ، اداکار زخمی

    ہالی ووڈ کے معروف اداکار جارج کلونی شوٹنگ کے لیے جاتے ہوئے زخمی ہوگئے جنہیں فوری طور پر اسپتال منتقل کردیا گیا۔

    برطانوی میڈیا کے مطابق جارج کلونی اٹلی کے ایک جزیرے سردینیا میں اپنی ٹی وی سیریز کیچ 22 کی شوٹنگ کر رہے تھے۔

    حادثہ اس وقت پیش آیا جب وہ صبح 8 بجے اپنے ہوٹل سے شوٹنگ پر جانے کے لیے نکلے۔ ان کی اسکوٹر ایک کار سے جا ٹکرائی جس میں انہیں معمولی چوٹیں آئیں۔

    مقامی انتظامیہ کے مطابق جارج کلونی کو آنے والی چوٹیں سنجیدہ نوعیت کی نہیں ہیں تاہم ابھی انہیں اسپتال سے ڈسچارج نہیں کیا گیا۔

    جارج کلونی کا مذکورہ ڈرامہ اگلے برس 2019 میں نشر کیا جائے گا، ابھی کچھ کہنا قبل از وقت ہے کہ ان کے زخمی ہونے کی وجہ سے ڈرامے کی شوٹنگ میں کتنا وقفہ آسکتا ہے۔

    57 سالہ جارج کلونی بے شمار ہالی ووڈ فلموں میں کام کرچکے ہیں جبکہ انہیں بے شمار ایوارڈز سے بھی نوازا جا چکا ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • پریانکا چوپڑا کی امریکی گلوکار سے دوستی کروانے والے کون تھے؟

    پریانکا چوپڑا کی امریکی گلوکار سے دوستی کروانے والے کون تھے؟

    بالی ووڈ اداکارہ پریانکا چوپڑا کا امریکی گلوکار نک جونز کے ساتھ تعلق اب کوئی ڈھکی چھپی بات نہیں رہی، دونوں اگلے ماہ منگنی کرنے جارہے ہیں۔

    لیکن ان دونوں کے اس تعلق کو بنانے میں کس کا ہاتھ ہے، یہ سامنے آگیا۔

    ہالی ووڈ کے ڈوائن جانسن جنہیں دی راک بھی کہا جاتا ہے، کا کہنا ہے کہ ان دونوں کے اس خوشگوار تعلق کا کریڈٹ انہیں جاتا ہے۔

    راک جانسن نے حال ہی میں انٹرٹینمنٹ ٹوڈے کو انٹرویو دیتے ہوئے بتایا کہ انہوں نے یہ تعلق قائم کرنے میں اہم کردار ادا کیا۔

    ساتھ ہی انہوں نے پریانکا چوپڑا اور نک جونز کی محبت اور ملاقاتوں کی تصدیق بھی کی۔

    دی راک پریانکا چوپڑا کے ساتھ ’بے واچ‘ اور نک جونز کے ساتھ ’جمانجی‘ میں کام کر چکے ہیں۔

    جب راک سے پوچھا گیا کہ کیا ان دونوں کو ملانے کے ذمہ دار وہ تھے، تو انہوں نے سوال کیا، ’کیا دونوں خوش ہیں؟‘، اور جب ان سے کہا گیا کہ دونوں بہت خوش نظر آتے ہیں تو راک جانسن نے کہا، ’اگر وہ دونوں خوش ہیں تو پھر میں ضرور انہیں ملانے کا کریڈٹ لوں گا‘۔

    واضح رہے کہ نک اور پریانکا کی پہلی ملاقات 2017 میں میٹ گالا میں ہوئی تھی جس میں دونوں نے ایک ساتھ اپنی پرفارمنس کا مظاہرہ کیا تھا۔

    دونوں کی دوستی ہوئی جو بتدریج محبت میں تبدیل ہوگئی۔

    نک جونز کچھ عرصہ قبل بھارت بھی آئے تھے جہاں انہوں نے پریانکا کی والدہ سے ملاقات کی اور اسی ملاقات میں دونوں کی منگنی بھی طے پائی تھی۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • الیکشن دفتر کو چھپانے والے درخت بے دردی سے کاٹ دیے گئے

    الیکشن دفتر کو چھپانے والے درخت بے دردی سے کاٹ دیے گئے

    کراچی: صوبہ سندھ کے دارالحکومت کراچی میں گلستان جوہر کے علاقے میں ایک سیاسی جماعت کے الیکشن دفتر کے سامنے موجود درخت کاٹ دیے گئے۔

    ذرائع کے مطابق حلقہ این اے 243 میں یہ درخت ایک سیاسی جماعت کے الیکشن دفتر کو واضح کرنے کے لیے کاٹے گئے جو درختوں کی آڑ میں چھپا ہوا تھا۔

    کاٹے جانے والے درختوں کی تعداد 6 تھی۔

    واقعے کے اگلے ہی روز سوشل میڈیا پر تصاویر وائرل ہوگئیں جس کے بعد مذکورہ جماعت کو سخت تنقید کا نشانہ بنایا جارہا ہے۔

    خیال رہے کہ گزشتہ کچھ عرصے میں سندھ کے سب سے بڑے شہر کراچی میں بے دریغ درختوں کی کٹائی کی گئی جس کے باعث شہر کے درجہ حرارت میں خطرناک حد تک اضافہ ہوچکا ہے۔

    گزشتہ چند سالوں سے ہیٹ ویو باقاعدگی سے کراچی کو اپنا نشانہ بنا رہی ہے اور شہریوں کو سایہ میسر کرنے کے لیے نہ ہی تو سایہ دار درخت ہیں نہ ہی سرسبز مقامات۔

    گرمی کی شدت میں اضافے کو دیکھتے ہوئے حکومت اور عام شہریوں کی جانب سے شجر کاری کی جارہی ہے تاہم یہ ناکافی ہے اور منصوبہ بندی کے تحت بڑے پیمانے پر شجر کاری کی ضرورت ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • لذیذ پشاوری آئس کریم گھر پر بنائیں

    لذیذ پشاوری آئس کریم گھر پر بنائیں

    گرمیوں کے موسم میں گرمی بھگانے کا سب سے آسان حل آئسکریم سے لطف اندوز ہونا ہے۔ پشاوری آئسکریم ایسی آئسکریم ہے جو نہایت مقبول اور شوق سے کھائی جاتی ہے۔

    اسے گھر میں بنانا بھی بے حد آسان ہے۔

    اجزا

    تازہ کریم: نصف لیٹر

    تازہ دودھ: نصف کلو

    ونیلا ایسنس: چند قطرے

    چینی: 1 پیالی

    کیوڑہ: 1 کھانے کا چمچ

    پستے چوپ کیے ہوئے: 6 عدد

    جیلٹن پاؤڈر: 2 کھانے کے چمچ

    کارن فلور: ایک کھانے کا چمچ

    ترکیب

    سب سے پہلے دیگچی میں دودھ ابالیں اور چینی ملالیں۔

    کارن فلور کو پانی میں گھول لیں۔

    دودھ میں چمچ چلاتے ہوئے تھوڑا تھوڑا کارن فلور ملائیں اور گاڑھا ہونے پر چولہے سے اتار لیں۔

    جب ٹھنڈا ہوجائے تو اس میں باقی تمام اجزا شامل کر کے خوب اچھی طرح سے ملائیں اور پھر ایئر ٹائٹ ڈبے میں نکال کر فریزر میں رکھ دیں۔

    آئسکریم اچھی طرح سے جم جائے تو پیالوں میں نکال کر پیش کریں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • ایک ٹویٹ نے 26 لڑکیوں کو اسمگل ہونے سے بچا لیا

    ایک ٹویٹ نے 26 لڑکیوں کو اسمگل ہونے سے بچا لیا

    نئی دہلی: بھارت میں ایک عقلمند شخص کے ٹویٹ نے 26 لڑکیوں کو اسمگل ہونے سے بچا کر مجرموں کو جیل پہنچا دیا۔

    بھارتی میڈیا کے مطابق واقعہ اس وقت پیش آیا جب ادراش شری واستو نامی ایک شخص نے چند پریشان حال لڑکیوں کو دیکھا۔

    یہ شخص اتر پردیش میں ایک مسافر ٹرین میں سفر کر رہا تھا جب اس نے اپنی بوگی میں موجود لڑکیوں کو پریشان دیکھا۔ ان میں سے چند لڑکیاں نہایت کمسن تھیں اور کچھ رو بھی رہی تھیں۔

    اس مشکل صورتحال میں مسافر نے سوشل میڈیا کا سہارا لیا اور سماجی رابطوں کی ویب سائٹ ٹویٹر پر ٹویٹ کرتے ہوئے ساری صورتحال لکھ ڈالی۔

    اس نے ٹرین اور بوگی نمبر کے ساتھ لکھا کہ بوگی میں موجود لڑکیاں پریشان ہیں اور رو رہی ہیں۔

    اس کے ساتھ اس نے اپنے ٹویٹ میں وزیر اعظم مودی، بھارتی وزیر ریلوے، وزیر اعلیٰ اور ریلوے کی انتظامیہ کے اکاؤنٹ کو بھی مینشن کیا۔

    اس کے بعد اس نے ایک اور ٹویٹ میں اپنے راستے سے بھی آگاہ کیا۔

    مسافر کے اس ٹویٹ نے فوراً ہی توجہ حاصل کرلی اور تھوڑی ہی دیر بعد مذکورہ علاقے کے پولیس اسٹیشن الرٹ ہوگئے۔

    ذرا سی تلاش و تفتیش کے بعد پولیس مدد کے لیے پہنچ گئی اور فوری طور پر لڑکیوں کو اپنی تحویل میں لے لیا۔

    لڑکیوں کو اسمگل کرنے والے دو ملزمان کو بھی حراست میں لے لیا گیا۔ ان میں سے ایک کی عمر 22 جبکہ دوسرے کی 55 سال بتائی جارہی ہے۔

    واقعے کے بعد مسافر کو سوشل میڈیا پر بے حد سراہا گیا۔ بعض افراد کا کہنا تھا کہ سوشل میڈیا کو ایسے ہی مثبت انداز میں استعمال کرنے کی ضرورت ہے۔

    کچھ ٹویٹر صارفین نے وزیر اعظم سے مطالبہ کیا کہ مذکورہ شخص کو ایوارڈ سے نوازا جائے جبکہ کچھ اس کی سیکیورٹی کے لیے بھی فکر مند نظر آئے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • اڈیالہ جیل کے قیدیوں کی حق رائے دہی استعمال کرنے کی درخواست

    اڈیالہ جیل کے قیدیوں کی حق رائے دہی استعمال کرنے کی درخواست

    راولپنڈی: اڈیالہ جیل کے قیدیوں نے اپنے حق رائے دہی کے استعمال کے لیے درخواست دے دی۔

    تفصیلات کے مطابق اڈیالہ جیل کے 400 قیدیوں نے پوسٹل بیلٹ کے لیے درخواست دے دی ہے۔

    جیل ذرائع کا کہنا ہے کہ درخواست دینے والوں میں مرد اور خواتین قیدی شامل ہیں جن میں سے کچھ مجرم ثابت ہوچکے ہیں جبکہ کچھ کے مقدمات ابھی زیر تفتیش ہیں۔

    ان کے مطابق جیل میں اس وقت 150 خواتین قیدی موجود ہیں جن میں سے بیشتر کے پاس قومی شناختی کارڈ موجود نہیں جو ووٹ دینے کے لیے بے حد ضروری ہے۔

    قیدیوں کو مطلع کردیا گیا ہے کہ حق رائے دہی صرف وہی قیدی استعمال کرسکے گا جس کے پاس قومی شناختی کارڈ موجود ہوگا۔

    درخواستیں سپرنٹنڈنٹ اڈیالہ جیل کو موصول ہوگئی ہیں جنہوں نے یہ درخواستیں ضلعی الیکشن کمیشن کو بھجوا دیں۔

    ذرائع کا کہنا ہے کہ قیدیوں کا تعلق مختلف صوبوں اور علاقوں سے ہے اور ہر قیدی کی درخواست اس کے رہائشی علاقے کے انتخابی دفتر میں بھجوائی جائے گی۔

    ذرائع کا مزید کہنا تھا کہ درخواستوں کی منظوری کی صورت میں پوسٹل بیلٹ 22 جولائی تک ضلعی ریٹرننگ افسر کو واپس بھجوایا جاسکے گا۔

    خیال رہے کہ ملک بھر میں عام انتخابات 25 جولائی کو منعقد کیے جائیں گے جس کے لیے تیاریاں زور و شور سے جاری ہیں۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • قومی شاہراہ پر فتح پور کے قریب بس اور ٹرک میں تصادم، 6 افراد جاں بحق

    قومی شاہراہ پر فتح پور کے قریب بس اور ٹرک میں تصادم، 6 افراد جاں بحق

    خان پور: صوبہ پنجاب کے ضلع رحیم یار خان میں فتح پور کے قریب قومی شاہراہ پر بس اور ٹرک میں تصادم کے نتیجے میں 6 افراد جاں بحق ہوگئے۔

    ریسکیو ذرائع کا کہنا ہے کہ قومی شاہراہ پر حادثہ اس وقت پیش آیا جب بس نے ایک موٹر سائیکل کو بچانے کی کوشش کی جس کے نتیجے میں بس سامنے سے آتے ٹرک سے ٹکرا گئی۔

    حادثے میں 6 افراد جاں بحق جبکہ متعدد زخمی ہوگئے۔

    ریسکیو ذرائع کا کہنا ہے کہ زخمیوں کو شیخ زید اسپتال لاہور منتقل کیا جا رہا ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔