برطانوی شاہی خاندان کے چھوٹے شہزادے ہیری اگلے ماہ امریکی اداکارہ میگھن مرکل سے رشتہ ازدواج میں بندھنے جارہے ہیں۔ اداکارہ کی بہترین دوست اور بالی ووڈ کی معروف اداکارہ پریانکا چوپڑا نے شاہی شادی میں مدعو کیے جانے کی تصدیق کردی ہے۔
امریکی جریدے سے گفتگو کرتے ہوئے معروف بالی ووڈ اداکارہ پریانکا چوپڑا نے بتایا کہ انہیں شاہی شادی میں شرکت کا دعوت نامہ موصول ہوچکا ہے۔
پریانکا چوپڑا امریکی ٹی وی سیریز کوانٹیکو اور ہالی ووڈ فلم بے واچ میں کام کرچکی ہیں۔ میگھن مرکل سے ان کی پہلی ملاقات ایک تقریب میں ہوئی جس کے بعد وہ دونوں بہت اچھی دوستیں بن گئیں۔
پریانکا چوپڑا کا کہنا ہے کہ وہ اپنی دوست کے لیے بہت خوش ہیں۔ ’میں اسے 3 سال سے جانتی ہوں۔ وہ ایک مضبوط اور پرعزم عورت ہے‘۔
وہ کہتی ہیں کہ میگھن کو صرف یہ کہہ کر نہیں پکارا جاسکتا کہ یہ شہزادے کی گرل فرینڈ ہے، ’اس کی ایک اپنی مضبوط شخصیت ہے جو اس پہچان سے کہیں زیادہ ہے‘۔
گو کہ شاہی شادی میں ایک مہینے سے بھی کم وقت رہ گیا ہے تاہم پریانکا چوپڑا کے مطابق انہوں نے شادی میں پہننے کے لیے تاحال لباس کا انتخاب نہیں کیا۔
خیال رہے کہ شہزادہ ہیری اور میگھن مرکل 19 مئی کو شادی کے بندھن میں بندھ جائیں گے۔ ان کی شادی میں برطانوی وزیر اعظم تھریسا مئے اور امریکی صدر ڈونلڈ ٹرمپ کو بھی مدعو نہیں کیا گیا۔
شاہی شادی میں صرف خاص مہمانوں کو مدعو کیا گیا ہے جن کی تعداد 600 کے قریب ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
