Tag: اےآر وائی نیوز

پاکستان اور سری لنکا کی ٹیمیں بدھ سے دبئی میں شروع ہونے والے دوسرے ٹیسٹ کی تیاریوں میں مصروف ہیں۔ کپتان مصباح الحق کہتے ہیں دبئی کی وکٹ پر اسپنرز کا کرداراہم ہوگا۔ ابو ظہبی میں پاکستان اور سری لنکا کے درمیان پہلا ٹیسٹ ہار جیت کے فیصلے کے بغیر ختم ہوگیا تھا۔

اب دبئی میں دونوں ٹیموں کے درمیان ٹاکرا ہوگا جس کےلئے کھلاڑی خوب نیٹ پریکٹس میں مصروف ہیں۔ کپتان مصباح الحق کہتے ہیں دبئی کی وکٹ ابو ظہبی سے مختلف ہے۔ یہاں اسپنرز کا کردار اہم ہوگا۔ ان کا کہنا تھا کہ سیریز میں برتری کے لئے کھلاڑیوں کو ابتدا سے ہی حریف ٹیم پر دباؤ بڑھانا ہوگا۔

وکٹ کیپر بیٹسمین عدنان اکمل انجری کے باعث ٹیسٹ سیریز سے باہر ہوگئے ہیں۔ ان کی جگہ سرفراز احمد کو ٹیم میں شامل کرلیا گیا ہے۔ دوسرے جانب سری لنکن ٹیم کو انجری مسائل کا سامنا ہے۔ فاسٹ بولر نوآن کلاسیکرا کے بعد لہیرو تھیرامان بھی انجری کے سبب ٹیسٹ سیریز سے باہر ہوگئے ہیں۔

تھیرامان کی جگہ کوشل پریرا کو ٹیم میں شامل کیا گیا ہے۔ سری لنکن کپتان اینجلو میتھیوز نے سیریز میں برتری حاصل کرنے کا عزم ظاہر کیا ہے۔

ایف اے کپ کے تیسرے راونڈ میں سوانسی سٹی نے مانچیسٹر یونائیٹڈ کو دلچسپ مقابلے کے بعد اپ سیٹ شکست دیتے ہوئے ایونٹ سے باہر کردیا۔ اولڈ ٹریفورڈ میں کھیلے گئے ایف اے کپ کے تیسرے راونڈ کے میچ میں سوانسی سٹی کلب نے مانچیسٹر یونائیٹڈ کو سنسنی خیز مقابلے کے بعد دو ایک سے شکست دی۔

سوانسی نے کھیل کے بارہویں منٹ میں اسپینش مڈفیلڈر الیجندرو پوزیلو کے گول کی بدولت برتری حاصل کرلی۔ چار منٹ بعد ہی مانچیسٹر یونائٹیڈ کے میکسیکن فارورڈ جاویر ہرنینڈز نے گول کرکے مقابلہ ایک ایک سے برابر کردیا۔ پہلے ہاف کے اختتام پر میچ ایک ایک گول سے برابر تھا۔

دوسرے ہاف میں بھی دونوں ٹیموں نے ایک دوسرے پر برتری لے جانے کے لئے خوب حملے کئے تاہم گیند کو جال میں نہ پہنچا سکے۔کھیل کے اختتامی لمحات میں اسٹرئیکر وائلفائرڈ بونی نے ساتھی کھلاڑی کے پاس پر ہیڈر کے زریعے گول داغ کر سوانسی سٹی کو فتح دلادی۔

اولڈ ٹریفورڈ میں سوانسی کی یہ تاریخ میں پہلی کامیابی ہے۔ اس شکست کے بعد یونائیٹڈ کی ٹیم پریمئیر لیگ میں ساتویں نمبر پر چلی گئی ہے۔

آسٹریلیا کے لیٹن ہیوٹ نے سابق عالمی نمبر ایک سوئٹزرلینڈ کے راجر فیڈرر کو شکست دے کر برسبین ٹینس ٹورنامنٹ جیت لیا۔ برسبین میں کھیلے جانے والے فائنل میں فیڈرر اور ہیوٹ کے درمیان دلچسپ مقابلہ ہوا۔ فیڈرر دوہزار تیرہ کی ناکامیوں کا اذالہ دوہزار چودہ میں بھی فتح کے ساتھ نہ کرسکے۔

ہیوٹ نے کھیل کا شاندار آغاز کیا اور پہلا سیٹ چھ ایک سے جیت کر برتری حاصل کی۔ دوسرے سیٹ میں فیڈرر کو کچھ مزاحمت کا سامنا کرنا پڑا لیکن سوئس کھلاڑی نے چھ چار سے سیٹ اپنے نام کرتے ہوئے مقابلہ ایک ایک سے برابر کردیا۔

فیصلہ کن سیٹ میں ٹاپ سیڈ فیڈرر نے ہتھیار ڈال دیئے۔ ہیوٹ نے ہوم گراؤنڈ اور ہوم کراؤڈ کی موجودگی میں سابق عالمی نمبر ایک راجر فیڈرر کو چھ تین سے ہرا کر ٹائٹل جیت لیا۔ یہ ہیوٹ کے کیرئیر کا انتیسواں اور دوہزار دس کے بعد پہلا ٹائٹل ہے۔

متحدہ عرب امارات میں جونیئر ایشیاء کپ کھیلنے والی پاکستان انڈر نائنٹین کرکٹ ٹیم وطن واپس پہنچ گئ۔ مینیجر علی ضیا کا کہنا تھا کہ روایتی حریف بھارت سےفائنل میچ میں شکست کے بعد خوبیوں اور خامیوں کا پتہ چل گیا ہے۔

لاہور ائیر پورٹ پر میڈیا سے گفتگو کرتے ہوئے پاکستان انڈر نائنٹین کرکٹ ٹیم کےکپتان سمیع اسلم کاکہناتھا کہ ورلڈ کپ کے لیے ٹیم کی کارکردگی بہتر بنانےکےلئےمحنت کرینگے۔

ان کا کہنا تھا کہ ایشیا کپ سے تمام کھلاڑیوں کے مورال اور حوصلے بلند ہوئے ہیں۔ فائنل میں ٹاس جیت کر بھارت کیخلاف پہلے بولنگ کرنے کا فیصلہ کنڈیشن کے حوالےسے ٹھیک تھا۔ فیلڈنگ میں غلطیاں ہوئیں جسے دور کرنے کی ضرورت ہے۔

اس موقع پر ٹیم مینیجر علی ضیا کا کہنا تھا کہ فائنل میں دونوں ٹیمیں مضبوط تھیں اور تمام کھلاڑیوں کی پرفارمنس بھی اچھی رہی۔ انہوں نے کہا کہ ہمارا اصل مقصد ورکڈ کپ میں جیت ہے ایشیاء کپ سے ٹیم کی تیاری ہوئی ہیں

انیس سو چھیاسٹھ کے عالمی کپ میں سب سے زیادہ گول کرنے والے پرتگال کے لیجنڈ فٹبالر یوسیبیو انتقال کرگئے ہیں۔ پرتگالی فٹبالر کا جسد خاکی آخری رسومات کے لئے لسبن کے لوز اسٹیڈیم پہنچا دیا گیا ہے۔ اس موقع پر لیجنڈ فٹبالر کو خراج عقیدت پیش کرنے کے لئے ہزاروں کی تعداد میں مداح اسٹیڈیم میں موجود تھے۔

یوسیبیوکی موت پر اظہار تعزیت کرنے والوں میں مشہور کھلاڑی کرسٹیانو رونالڈو بھی پیش پیش تھے۔ اکہتر سالہ یوسیبیو گزشتہ روز دل کا دورہ پڑنے کے باعث انتقال کرگئے تھے۔ یوسیبیو نے انیس سو چھیاسٹھ کے ورلڈ کپ میں سب سے زیادہ گول کیے تھے۔

انھیں عالمی سطح پر ہر زمانے کے بہترین کھلاڑی میں سے ایک شمار کیا جاتا ہے۔ یوسبیو بلیک پینتھر کے نام سے بھی مشہور تھے۔ انھوں نے سات سو پینتالیس پروفیشنل میچوں میں مجموعی طور پر سات سو تینتیس گول داغے۔ انھیں ان کے بہترین کھیل کے لیے انیس سو پینسٹھ میں بہترین یورپی فٹبالر کے اعزاز سے نوازا گيا تھا۔