Tag: اے آر رحمان

ممبئی: بالی ووڈ کے گلوکار جاوید علی نے انکشاف کیا ہے کہ ‘کُن فیکون’ کی ریکارڈنگ سے پہلے معروف موسیقار اے آر رحمان نے وضو کرنے کا کہا تھا۔

اے آر رحمان کی راک اسٹار کی کمپوزیشن ’کن فیکون‘ کو ان کی بہترین کمپوزیشن میں شمار کیا جاتا ہے ایک حالیہ انٹرویو میں گلوکار جاوید علی نے گانے کی ریکارڈنگ کے حوالے سے کھل کر بات کی اور اس گانے کی ریکارڈنگ کے تجربے کو شیئر کیا۔

رنبیر کپور پر فلمایا گیا یہ قوالی ‘کُن فیکون’ ارشاد کامل نے لکھا تھا اور اس میں جاوید، رحمان، موہت چوہان اور نظامی برادران کی آواز تھی۔

گلوکار جاوید علی نے بھارت کی دی میوزک پوڈ کاسٹ میں شیئر کیا کہ ’’میں ہمیشہ کی طرح کُن فیکون کی ریکارڈنگ کرنے کے لیے بھی تیار تھے اسی دوران رحمن سر  نے مجھے یہ محسوس کرایا کہ یہ گانا نہیں ایک دعا ہے‘‘۔

جاوید علی نے کہا کہ جیسے ہی ‘کُن فیکون’ کی ریکارڈنگ شروع ہونے لگی تو اے آر رحمان نے مجھ سے پوچھا کہ وضو کیا ہے؟ میں نے جواب میں کہا کہ نہیں، تو میرا جواب سُن کر انہوں نے کہا پہلے وضو کرو اور پھر ٹوپی پہنو، اُس کے بعد ریکارڈنگ شروع کرنی ہے۔

اے آر رحمان نے بیٹی کے ولیمے کی ویڈیو شیئر کردی

جاوید علی نے کہا کہ میں نے اے آر رحمان سر کے کہنے پر پورے خلوص کے ساتھ وضو کیا پھر ریکارڈنگ شروع کی، ریکارڈنگ کے دوران پورے اسٹوڈیو میں اندھیرا تھا صرف موم بتی کی روشنی تھی اور اسٹوڈیو میں صرف تین لوگ تھے، میں، اے آر رحمان اور نغمہ نگار ارشاد کامل۔

انہوں نے کہا کہ صرف ہم تیوں نے گانا ریکارڈ کیا، اس دروان ایسا محسوس ہوتا تھا کہ ہم سب دعا کررہے ہیں، اور لوگ اسے محسوس کررہے ہیں، اب بھی جب میں اسٹیج پر کُن فیکون  پیش کرتا ہوں تو سر ڈھانپ لیتا ہوں۔

جاوید علی نے اے آر رحمان کے ساتھ کام کرنے کے اپنے تجربے کا ذکر کرتے ہوئے کہا کہ میں موسیقار کا دل سے احترام کرتا ہوں، میں نے اُن سے بہت سی تکنیکیں سیکھی ہیں۔

واضح رہے کہ گلوکار جاوید علی اور اے آر رحمان نے پہلی بار 2008 میں جودھا اکبر کے لیے کام کیا جہاں انہوں نے ‘جشن بہارہ’ گایا تھا، اس کے بعد انہوں نے فلم  ’رانجھنا‘ کے ’تم تک‘ میں بھی ایک ساتھ کام کیا۔

جاوید علی نے کہا کہ اے آر رحمن کے ساتھ اس گانے کی ریکارڈ کرنے کے لیے میں نے اپنی چھٹیاں مختصر کی تھیں، یہ میرے بہترین گانوں میں سے ایک ہے اور میں خود کو خوش قسمت سمجھتا ہوں کہ مجھے اُن کے ساتھ کام کرنے کا موقع ملا۔