Tag: اے آر وائی نیوز پروگرام

اسلام آباد: اٹارنی جنرل آف پاکستان انور منصور خان نے کہا ہے کہ سائبر قوانین کے تحت باقاعدہ اس ویڈیو پر کارروائی کی جائے، اس میں کوئی شک نہیں کہ ویڈیو پر عدلیہ کو نوٹس لینا چاہیے۔

تفصیلات کے مطابق اے آر وائی نیوز کے پروگرام میں گفتگو کرتے ہوئے انور منصور خان نے کہا کہ کسی کو بتائے بغیر اس کی ویڈیو بنانا جرم ہے، ویڈیو بنانے اور نشر کرنے پر تین سال کی سزا اور 10 لاکھ روپے جرمانہ ہے۔

اٹارنی جنرل کا کہنا تھا کہ بغیر اجازت ویڈیو بنانے اور نشر کرنے میں شریک تمام لوگوں پر بھی سزا ہے۔

انور منصور خان نے کہا کہ احتساب عدالت کے جج کی ویڈیو کا حکومت سے کوئی تعلق نہیں ہے، ویڈیو کا معاملہ حکومت اٹھا سکتی ہے، جج بھی اٹھا سکتے ہیں، فیصلے کے وقت اس ویڈیو کا کوئی معاملہ نہیں تھا، تاہم ہائی کورٹ کے جج بھی سزا کے فیصلے کو جانچیں گے۔

یہ بھی پڑھیں:  لگتا ہے جج ارشد ملک کی ویڈیوجعلی ہے: چیف جسٹس لاہورہائی کورٹ

انھوں نے کہا کہ سائبر قوانین کے تحت ویڈیو سے جڑا ہر شخص ملوث کہلائے گا، ویڈیو بنانے کا کہنے والے اور نشر کرنے والے پر بھی سائبر قوانین لاگو ہوں گے، ویڈیو جس کے سامنے بنی ہو اس کا بھی سامنے ہونا ضروری ہے، ویڈیو بنانے والے کو بھی سامنے آنا ہوگا۔

اٹارنی جنرل انور منصور کا کہنا تھا کہ اصل ویڈیو اور ریکارڈنگ کا آلہ بھی پیش کرنا ہوگا، جب کوئی ویڈیو آئے، ایڈٹنگ ہو تو اس کے ڈیجیٹل امپرنٹس موجود ہوتے ہیں۔

یاد رہے کہ دو دن قبل مسلم لیگ ن کی نائب صدر مریم نواز اپنے والد اور پارٹی قائد نواز شریف کے خلاف احتساب عدالت کے کیس میں جج ارشد ملک کی خفیہ کیمرے سے بنی مبینہ ویڈیو سامنے لائی تھیں۔

کراچی: صوبائی وزیر ناصر حسین شاہ نے گھوٹکی واقعے کو بد قسمتی قرار دیتے ہوئے کہا ہے کہ پوری کوشش ہے کہ ایسے واقعات رونما نہ ہوں، واقعے پر سخت ایکشن ہوگا، اس معاملے پر قانون سازی بھی ہوئی ہے۔

پاکستان پیپلز پارٹی کے رہنما ناصر حسین شاہ نے اے آر وائی پروگرام سوال یہ ہے میں بات کرتے ہوئے کہا کہ اقلیتوں کے تحفظ کے لیے بلاول بھٹو کے واضح احکامات ہیں، اقلیتوں کو سینیٹ اور قومی و صوبائی اسمبلی میں نمائندگی بھی دی گئی ہے۔

رہنما پی پی کا کہنا تھا کہ گھوٹکی کے معاملے پر چیئرمین بلاول بھٹو نے نوٹس لیا ہے، ان کی ہدایت پر وزیرِ اعلیٰ سندھ نے ہدایات جاری کیں، معاملے پر وزیرِ اعلیٰ پنجاب سے بھی رابطہ ہوا ہے۔

یہ بھی پڑھیں:  ہندو لڑکیوں کا اغوا پاکستان کا اندورنی معاملہ ہے، بھارت مداخلت نہ کرے، رمیش کمار

ناصر حسین شاہ نے کہا کہ اقلیتوں کے تحفظ کے لیے پیپلز پارٹی نے قانون سازی بھی کی ہے، ہماری ہم دردیاں متاثرہ خاندان کے ساتھ ہیں، بلاول بھٹوکی ہدایت پر اقلیتی برادری کا بہت خیال رکھتے ہیں، سندھ میں قانون لاگو ہے وہ لوگ دوسرے صوبے گئے۔

خیال رہے کہ سندھ کے علاقے گھوٹکی میں دو کم عمر لڑکیوں کو مبینہ طور پر اغوا کر کے مسلمان کیا گیا اور بعد ازاں ان کی شادیاں کرائی گئیں، تاہم ایک وڈیو میں لڑکیوں نے کہا ہے کہ وہ اپنی مرضی سے گئیں اور مسلمان ہوئیں۔

اسلام آباد: وفاقی وزیرِ اطلاعات فواد چوہدری نے کہا ہے کہ بھارت میں مودی سرکار پر اندر ہی سے آوازیں اٹھ رہی ہیں، اب بھارت میں بھی مودی کی ڈاکٹرائن کو چیلنج کیا جا رہا ہے۔

تفصیلات کے مطابق فواد چوہدری اے آر وائی نیوز کے پروگرام آف دی ریکارڈ میں گفتگو کر رہے تھے، انھوں نے کہا کہ بھارت میں اس وقت ایک سیاسی لڑائی چل رہی ہے جس کے باعث پورا خطہ خطرے میں چلا گیا ہے۔

[bs-quote quote=”جو 72 گھنٹے پہلے صورتِ حال تھی اب وہ نہیں۔” style=”style-8″ align=”left” author_name=”فواد چوہدری”][/bs-quote]

وزیرِ اطلاعات نے کہا کہ مودی نظریے نے خطے کے کروڑوں لوگوں کی زندگی کو خطرے میں ڈال دیا ہے۔

فواد چوہدری کا کہنا تھا کہ 72 گھنٹے پہلے جو صورتِ حال تھی اب وہ نہیں، صورتِ حال بہتری کی جانب بڑھ رہی ہے، تاہم پاک بھارت کشیدگی پر پوری دنیا میں تشویش پائی جاتی ہے۔

انھوں نے کہا کہ دنیا کی جانب سے بھارت پر حملہ نہ کرنے کا دباؤ تھا، اب بھارت میں بھی مودی کے نظریے کو چیلنج کیا جا رہا ہے، جیسے جیسے وقت گزرے گا صورتِ حال واضح ہوتی جائے گی۔

انھوں نے کہا کہ بھارت کشمیر میں ہار چکا ہے، ذاتی رائے میں اگلے 72 گھنٹوں میں صورت حال مزید بہتر ہوگی، بھارت سے 3 جنگیں لڑیں، چوتھی جنگ مسلط کی تو بھرپور رد عمل ملے گا۔

یہ بھی پڑھیں:  پاکستان کا کالعدم تنظیموں‌ کے حوالے سے اہم قدم

وزیرِ اطلاعات فواد چوہدری نے کہا کہ کالعدم تنظیموں کے معاملے پر معاشی، سیاسی اور انتظامی اسٹریٹجی ملا کر کام کر رہے ہیں، نیشنل ایکشن پلان پر بھی عمل درآمد کر رہے ہیں۔

خیال رہے کہ دفتر خارجہ نے آج کالعدم تنظیموں کے اثاثہ جات پر پابندی کا نیا ایس آر او جاری کر دیا ہے، جس کے تحت حکومت کو کسی بھی کالعدم تنظیم کے منقولہ، غیر منقولہ اثاثوں تک رسائی ہوگی، کالعدم تنظیموں کے فلاحی ادارے بھی حکومت کے کنٹرول میں آ گئے ہیں۔