Tag: اے آر وائی نیوز

اسلام آباد: وزیر انسانی حقوق شیریں مزاری کا کہنا ہے کہ وہ پی پی چیئرمین بلاول بھٹو کے بیان پر حیران ہیں جن میں انھوں نے بھارتی مؤقف کو دہرایا۔

تفصیلات کے مطابق شیرین مزاری نے بلاول بھٹو کی اسلام آباد میں تقریر پر تنقید کرتے ہوئے کہا ہے کہ پیپلز پارٹی نے کیوں نیشنل ایکشن پلان پر عمل نہیں کیا، بلاول بھٹو نے بھارتی مؤقف بیان کر دیا ہے۔

وفاقی وزیر کا اے آر وائی نیوز کے پروگرام پاور پلےمیں کہنا تھا کہ بلاول بھٹو عدالتوں میں پیشیوں پر غصے میں ہیں، وہ سمجھتے تھے کہ جعلی اکاؤنٹس غلط ہیں تو کیوں پیچھے نہیں ہٹے، جعلی اکاؤنٹس کا پیسا کیوں استعمال کرتے رہے انھوں نے کمپنی کے دستاویز پر دستخط کیے۔

شیریں مزاری نے کہا کہ پی ٹی آئی حکومت نیشنل ایکشن پلان کے تحت جتنا ایکشن لے رہی ہے ماضی میں نہیں لیا گیا۔

پی ٹی آئی رہنما کا کہنا تھا کہ ماضی میں معاشی حالات تباہ کیے گئے اور ملک کو قرضوں کے دل دل میں پھنسایا گیا، احتساب ہم نہیں کر رہے، یہ مقدمات بہت پہلے سے چلتے آ رہے ہیں، پی ٹی آئی حکومت نے ن لیگ اور پی پی کے خلاف مقدمات نہیں بنائے۔

یہ بھی پڑھیں:  کیا حکومت نے کالعدم تنظیموں سے منسلک وفاقی وزرا کو ہٹا دیا؟ نہیں: بلاول بھٹو

شیریں مزاری نے بھارت کے حوالے سے کہا کہ بھارت میں سکھوں اور مسلمانوں پر مظالم ہو رہے ہیں، پلوامہ کا بہانہ بنا کر بھارت میں طالب علموں پر تشدد کیا جا رہا ہے، بھارتی عدالتوں نے مجرموں کو کھلی چھٹی دے رکھی ہے

انھوں نے کہا کہ گجرات میں مسلمانوں کے قتل عام کرنے والوں کو رہا کیا گیا، اعتراف کے باجود بابو بجرانی نامی بڑا ملزم ضمانت پر باہر ہے، مقبوضہ کشمیر مظالم پر بھارت کے خلاف یوگوسلاویا طرز کے ٹریبونل بنوائے جا سکتے ہیں۔

اسلام آباد: وفاقی وزیرِ اطلاعات فواد چوہدری نے کہا ہے کہ پیسے دیکھتے ہوئے تو نواز شریف کا دل دھڑکتا ہے، ان کے پاس پلی بارگین کے سوا کوئی آپشن نہیں، نواز شریف کی جائیداد ضبط ہوگی۔

تفصیلات کے مطابق وزیر اطلاعات فواد چوہدری نے آے آر وائی نیوز کے پروگرام الیونتھ آور میں گفتگو کرتے ہوئے کہا کہ نواز شریف کو بد عنوانی کے مقدمات میں سزا ہوئی ہے، انھیں پیسے واپس کرنا پڑیں گے اس کے علاوہ کوئی حل نہیں۔

فواد چوہدری کا کہنا تھا کہ نواز شریف کی سزا 7 سال ہے وہ پوری کریں گے تو اس کے بعد ان کی جائیداد ضبط ہوگی۔

وزیر اطلاعات کا جعلی اکاؤنٹ کیس سے متعلق کہنا تھا کہ ایان علی سے لے کر برتھ ڈے کیک تک پیسے جعلی اکاؤنٹ سے گئے، جعلی اکاؤنٹس کیس کی بنیاد کاغذات ہیں جو عدالت میں بول رہے ہیں۔

انھوں نے کہا کہ بلاول تمام کمپنیوں کے بینفشری خود ہیں، والد نے جعلی اکاؤنٹس بنا دیے اور اسی طرح سے ساری کمپنیاں چل رہی تھیں، یہ بڑے لوگ الٹا نیب کے لوگوں کو ہراساں کر رہے ہیں۔

یہ بھی پڑھیں:  چیخیں وزیر اعلیٰ ہاؤس سندھ سے آ رہی ہیں، مراد علی شاہ کی پریس کانفرنس پر خرم شیر زمان کا رد عمل

فواد چوہدری کا اپنی وزارت سے متعلق کہنا تھا کہ وزیر اعظم نے عہدہ چھوڑنے کا کہا تو ایک منٹ نہیں لگاؤں گا، کچھ ایشوز ہیں جن پر میرا نقطہ نظر ہے جو وزیر اعظم کے سامنے رکھا ہے، انھوں نے میری بات اب بھی غور سے سنی، فیصلہ وہی کریں گے۔

وزیر اطلاعات نے کہا کہ پارٹی ایشوز ہوتے ہیں، جب بات لمبی ہو جائے تو میڈیا سے نہیں چھپتی، نعیم الحق سے احترام کا تعلق ہے، چھوٹی موٹی چیزیں چلتی رہتی ہیں، نعیم الحق کے خلاف کوئی ٹویٹ نہیں کیا۔

فواد چوہدری نے کہا کہ پرویز مشرف کو ملک ضرور آنا چاہیے، عدالتوں کا سامنا کرنا چاہیے، مشرف صاحب صحت یاب ہو کر آئیں اور مقدمات کا سامنا کریں۔

لاہور: وفاقی وزیر شیریں مزاری کا کہنا ہے کہ بھارتی فوج کشمیر میں جنسی زیادتی کو بطور ہتھیار استعمال کر رہی ہے، مقبوضہ کشمیر کے دو دیہات میں اجتماعی زیادتی کے واقعات ہوئے۔

تفصیلات کے مطابق اے آر وائی نیوز کے پروگرام پاور پلے میں گفتگو کرتے ہوئے شیریں مزاری نے کہا کہ کشمیری خواتین سے زیادتی کے ثبوت موجود ہیں۔

[bs-quote quote=”مودی اور نیشنل سیکورٹی ایڈوائزر اجیت دول پر جنگی جرائم کا مقدمہ بنتا ہے۔” style=”style-8″ align=”left” color=”#dd3333″ author_name=”شیریں مزاری”][/bs-quote]

وفاقی وزیر نے کہا مقبوضہ کشمیر میں خواتین کی عصمت دری کے کیسز کی طویل فہرست ہے، مودی اور نیشنل سیکورٹی ایڈوائزر اجیت دول پر جنگی جرائم کا مقدمہ بنتا ہے۔

شیریں مزاری کا کہنا تھا کہ بھارت میں تمام اقلیتیں ظلم و جبر اور تشدد کا شکار ہیں، بھارتی الیکشن میں ووٹ کے لیے پاکستان کے خلاف فضا بنائی جاتی ہے، بی جی پی کے پاس پاکستان مخالف جذبات بھڑکانے کے سوا کوئی ایجنڈا نہیں ہے۔

ان کا کہنا تھا کہ مقبوضہ کشمیر میں مسلسل انسانی حقوق کی خلاف ورزیاں کی جا رہی ہیں، تاہم مقبوضہ کشمیر میں تشدد کی پالیسی ناکام ہوگئی ہے، کشمیریوں نے واضح کر دیا انھیں بھارتی تسلط تسلیم نہیں۔

یہ بھی پڑھیں:  پاکستان کا نئی دہلی میں ہائی کمیشن پر مظاہرین کی ہنگامہ آرائی پر احتجاج

شیریں مزاری نے کہا کہ بھارت جنوبی ایشیا کو ایٹمی جنگ کی طرف دھکیلنا چاہتا ہے، امریکا کو بھی بھارتی رویے کا نوٹس لینا چاہیے، بی جے پی کی ذہنیت انتہا پسندانہ ہے، کوئی بھی حماقت ہو سکتی ہے۔

وفاقی وزیر کا کہنا تھا کہ مودی کو انتخابات میں اپنی شکست واضح نظر آرہی ہے، سمجھوتا ایکسپریس دہشت گردی کا واقعہ پوری دنیا کے سامنے ہے، بھارت کوئی معلومات نہیں دے گا، سب ڈھکوسلا ہے، خطے میں دہشت گردی کرنے والا بھارت بات کیوں کرے گا، بھارت بلوچستان میں بھی دہشت گردی کرا رہا ہے۔

لاہور: وفاقی وزیرِ ریلوے شیخ رشید نے کہا ہے کہ اپوزیشن لیڈر شہباز شریف کے خلاف پبلک اکاؤنٹس کمیٹی میں تحریکِ عدم اعتماد لائیں گے۔

تفصیلات کے مطابق شیخ رشید اے آر وائی نیوز کے پروگرام اعتراض ہے میں گفتگو کر رہے تھے، انھوں نے کہا کہ شہباز شریف کی پوری کوشش ہے کہ میں پی اے سی میں نہ آؤں لیکن عمران خان نے میرا ممبر پی اے سی نوٹی فکیشن جاری کر دیا ہے، اب میں قانونی ممبر ہوں۔

[bs-quote quote=”لوٹ مار کرنے والے 40 افراد 2 سے 3 ماہ میں بے نقاب ہو جائیں گے۔” style=”style-7″ align=”left” color=”#dd3333″ author_job=”شیخ رشید”][/bs-quote]

شیخ رشید کا کہنا تھا کہ اب شہباز شریف جس کو چاہے ممبر پی اے سی بنا سکتے ہیں، عمران خان نے کہا شہباز شریف کو چیئرمین پی اے سی بنانا غلط فیصلہ تھا، وہ تحقیقات کے لیے پیش ہی نہیں ہو رہے۔

وزیرِ ریلوے نے کہا کہ شہباز شریف پروڈکشن آرڈر کا غیر قانونی استعمال کر رہے ہیں، ریمانڈ کے دوران پروڈکشن آرڈر جاری نہیں ہو سکتا، پروڈکشن آرڈر کی وجہ سے لوگوں کو شک ہوا کہ ڈھیل دی جا رہی ہے۔

انھوں نے کہا ’سعد رفیق اور رانا ثناء اللہ پی اے سی میں آ جائیں مجھے فرق نہیں پڑتا، لوٹ مار کرنے والے 40 افراد 2 سے 3 ماہ میں بے نقاب ہو جائیں گے، عمران خان مجھے آج کہے پیچھے ہو جاؤ تو میں ہو جاؤں گا۔‘

شیخ رشید کہا کہنا تھا کہ چیئرمین پی اے سی ایک وفاقی وزیر کے برابر ہوتا ہے، شہباز شریف تو چیئرمین بن کرمزے کر رہے ہیں، وہ پبلک اکاؤنٹس کمیٹی کو استعمال کرنے میں کام یاب ہو گئے۔

[bs-quote quote=”نواز شریف کو 4 ملکوں چین، سعودی عرب، ترکی اور یو اے ای نے جھنڈی دکھائی ہے۔” style=”style-7″ align=”right” color=”#dd3333″ author_job=”وزیر ریلوے”][/bs-quote]

وفاقی وزیر ریلوے نے کہا ’شریف برادران کو سعودی عرب اور یو اے ای کا کوئی سپورٹ نہیں ہے، نواز شریف کو 4 ملکوں چین، سعودی عرب، ترکی اور یو اے ای نے جھنڈی دکھائی ہے، عمران خان نے مجھے خود کہا اردگان نے کہا نواز شریف کو سپورٹ نہیں کر رہے۔‘

شیخ رشید کا کہنا تھا کہ شریف برادران سے تو زرداری بہتر ہے جو بیماری کا بہانہ نہیں کر رہے، آصف زرداری جیل کاٹ سکتا ہے نواز شریف نہیں، شریف برادران جیل نہیں کاٹ سکتے، اب لوگ نہیں چاہتے کہ نواز شریف کو باہر جانے دیا جائے۔

ریلوے وزیر کا کہنا تھا ’ بلاول بھٹو سے میری صلح ہوگئی ہے، انھوں نے معذرت کر لی ہے، بلاول بھٹو نے میرے متعلق غلط الفاظ استعمال کیے لیکن بلاول نے جو کہا اس کو معنی بھی نہیں معلوم ہوں گے، میں آصف زرداری اور بلاول بھٹو سے نہیں الجھنا چاہتا، آصف زرداری سے سیاسی لڑائی لڑتے ہوئے مزا آتا ہے۔‘

[bs-quote quote=”آصف زرداری اور بلاول بھٹو سے نہیں الجھنا چاہتا، آصف زرداری سے سیاسی لڑائی لڑتے ہوئے مزا آتا ہے۔” style=”style-7″ align=”center” color=”#dd3333″][/bs-quote]

شیخ رشید نے کہا ’مجھے عمران خان کی دوستی پر فخر ہے، میری خواہش کے بر عکس مجھے ریلوے کی وزارت دی گئی، لیکن میں نے ہنسی خوشی قبول کی۔‘

ان کا کہنا تھا کہ عمران خان آئی ایم ایف سے ڈیل کرنے میں کام یاب ہو جائیں گے، صرف عمران خان آئی ایم ایف کا دباؤ برداشت کر سکتے ہیں، وہ حالات سے مکمل با خبر ہیں۔

وزیرِ ریلوے کا کہنا تھا کہ علیم خان کا کیس پرانا ہے، میرا دل کہہ رہا ہے کہ اس کی ضمانت ہو جائے گی۔

لاہور: وزیرِ ریلوے شیخ رشید نے کہا ہے کہ اس وقت ن لیگ میں شہباز شریف کا بیانیہ ہے، حالات کی وجہ سے نواز شریف نے شہباز شریف کے سامنے سرنڈر کر دیا ہے۔

اے آر وائی نیوز کے پروگرام دی رپورٹر میں گفتگو کرتے ہوئے شیخ رشید نے کہا کہ شہباز شریف مینج کرنے والا بندہ ہے، انھوں نے نواز شریف اور مریم نواز کو چپ کرایا، شہباز شریف نے پارٹی میں نواز شریف کے بیانیے کو بدلا۔

[bs-quote quote=”میں شاہد خاقان عباسی کو ن لیگ کی سربراہی کرتے دیکھ رہا ہوں۔” style=”style-7″ align=”left” color=”#dd3333″ author_name=”شیخ رشید” author_job=”وزیر ریلوے”][/bs-quote]

وزیرِ ریلوے کا کہنا تھا کہ اپوزیشن لیڈر 100 فی صد این آر او مانگ رہے ہیں، شہباز شریف کو چیلنج کرتا ہوں کہ وہ این آر او مانگ رہے ہیں، وہ تمام معاملات طے کرنے کی کوشش میں ہیں۔

شیخ رشید نے پی اے سی سے متعلق کہا ’فروغ نسیم نے یہ کہا ہے کہ میں پبلک اکاؤنٹس کمیٹی کا ممبر بن سکتا ہوں، اسد قیصر سے میری کل تین بجے ملاقات ہونی ہے، میرا پی اے سی میں جانا اتنا ضروری ہے جتنا کسی تجربے کار کا۔‘

وزیرِ ریلوے نے کہا ’میں شہباز شریف کا صرف سیاسی مخالف ہوں ذاتی نہیں، اللہ انھیں صحت دے۔‘

ان کا کہنا تھا کہ عمران خان نے آج بھی کہا این آر او کا کوئی سوال ہی پیدا نہیں ہوتا، یہ لوگ بھاگنے کی کوشش میں نہیں بلکہ بیچ بچاؤ کی کوشش میں ہیں، خواجہ آصف ٹھیک کہتے ہیں کہ نواز شریف اور مریم نواز خاموشی کی حکمت عملی پر عمل پیرا ہیں۔

یہ بھی پڑھیں:  قومی اسمبلی اجلاس: اپوزیشن نے تاریخی اعلانات پر آسمان سر پر اٹھا لیا

شیخ رشید نے کہا ’نواز شریف کی کوشش ہے کہ مریم نواز زنگ آلود مستقبل میں محفوظ ہو۔ لیکن میں شاہد خاقان عباسی کو ن لیگ کی سربراہی کرتے دیکھ رہا ہوں۔‘

انھوں نے کہا کہ سندھ میں جھاڑو پھرے گا تو یہ مینار پر چڑھ کر کہیں گے ہائے ہم مر گئے، ظلم ہو گیا، پنجاب میں تو پیپلز پارٹی کا کوئی وجود نہیں ہے، چور پکڑے جائیں گے تو سندھ ترقی کرے گا۔