Tag: اے اْر وائی نیوز

حکومت سندھ نے سندھ ہائی کورٹ کی جانب سے بلدیاتی قوانین کی تیسری ترمیم کو غیر قانونی قرار دئیے جانے کے خلاف سپریم کورٹ میں درخواست دائر کر دی ہے، جسکی سماعت آٹھ جنوری کو اسلام آباد میں ہوگی۔

سندھ ہائی کورٹ کی جانب سے بلدیاتی قوانین میں تیسری ترمیم کو غیر قانونی قرار دئیے جانے کے خلاف حکومت سندھ نے سپریم کورٹ میں پٹیشن دائر کی، ایڈووکیٹ جنرل خالد جاوید کی جانب سے دائر درخواست میں کہا گیا ہے کہ بلدیاتی حلقہ بندیوں کی ساری کاروائی قانون کے تحت کی گئی ہے، اگر پینل کی شرط نہ رکھی جاتی تو ایک بیلٹ پیپر پچیس صفحات کا ہوگا، جسکے باعث بیلٹ پیپرز کی گنتی پر گھنٹوں نہیں دنوں کے حساب سے وقت لگے گا۔

درخواست میں موقف اختیار کیا گیا ہے کہ سنہ دو ہزار ایک میں ایک یونین کونسل میں تیس سے ستر ہزار رکھے گئے تھے جبکہ نئے قانون میں یہ تعداد دس سے پچاس ہزار کی گئی ہے، انتخابی حد بندیوں کے قانون میں کوئی سقم نہیں تھا، اس قانون پر تنقید اور اعتراض بلا ضرورت ہے، حکومت سندھ کی درخواست کی سماعت 8جنوری کو اسلام آباد میں ہوگی۔

بلدیاتی الیکشن سپریم کورٹ کے حکم پر ہورہے ہیں تو ہائی کورٹ اس حوالے سے کیسے فیصلہ جاری کرسکتی ہے، سندھ ہائی کورٹ نے جماعت اسلامی اور دیگر جماعتوں کی درخواست پر بلدیاتی قوانین کی تیسری ترمیم کو غیر قانونی قرار دیا تھا۔

متحدہ قومی موومنٹ نے بلدیاتی قانون میں ترمیم پر سپریم کورٹ میں اپیل دائر کردی، ڈاکٹر فاروق ستار کہتے ہیں حکومت کی اپیل پر ایم کیو ایم کا موقف سنے بغیر حکم نہ دیا جائے۔

سندھ میں اٹھارہ جنوری کو ہونے والے بلدیاتی انتخابات کھٹائی میں پڑتے ہوئے دکھائی دے رہے ہیں، بلدیاتی قانون میں ترمیم پر متحدہ قومی موومنٹ کی جانب ڈاکٹر فاروق ستار نے سپریم کورٹ میں درخواست دائر کردی۔

بلدیاتی قانون پر فاروق ستار کی درخواست حکومت کی اپیل سے پہلے داخل کی گئی، ایم کیوایم کی جانب سے درخواست ایڈووکیٹ مظہر چوہان نے دائر کی، حکومت سندھ نے سندھ ہائی کورٹ کے فیصلے کیخلاف آج اپیل داخل کرنا ہے۔

ڈاکٹر فاروق ستار کا کہنا تھا کہ حکومت کی اپیل پر ایم کیوایم کا موقف سنے بغیر حکم نہ دیا جائے، سندھ ہائی کورٹ میں ایم کیو ایم سمیت مسلم لیگ ن، فنکشنل لیگ، جماعت اسلامی اور دیگر اپوزیشن جماعتوں نے صوبے میں پیپلز پارٹی کی جانب سے بلدیاتی حلقہ بندیوں اور لوکل گورنمنٹ ترمیمی ایکٹ کے خلاف درخواستیں دائر کیں تھی، جس پر عدالت نے صوبائی حکومت کی جانب سے منظور کردہ ترامیم کو کالعدم قرار دے دیا تھا۔