لندن: برطانوی یونیورسٹیوں میں ٹیوشن فیس میں اضافے کے خلاف ہزاروں طالب علموں نے لندن کی سڑکوں پرمظاہرہ کیا ہے۔
برطانوی میڈیا کے مطابق احتجاج کرنے والے طالب علموں نے ہاتھوں میں پلے کارڈز اٹھا رکھے تھے اوروہ حکومت کے خلاف نعرے لگا رہے تھے۔ مظاہرین کا مطالبہ تھا کہ فیسوں میں اضافے، تعلیمی وظیفوں میں کمی کا فیصلہ واپس لیا جائے۔
اس موقع پرطالبعلموں اورپولیس میں جھڑپیں بھی ہوئیں ہے اور پولیس نے گیارہ طلبا کوگرفتارکرلیا ہے۔ برطانوی یونیورسٹیوں میں ٹیوشن فیس نو ہزارپاؤنڈ کردی گئی ہے۔
لاہور: لاہور ہائیکورٹ نے گلوبٹ کی درخواست ضمانت کی سماعت ستائیس نومبر تک ملتوی کرتے ہوئے سزا کیخلاف اپیل اور درخواست ضمانت یکجا کرنے کا حکم دے دیا ہے۔
لاہور ہائی کورٹ کے جسٹس عبدالسمیع خان اور جسٹس صداقت علی خان پر مشتمل دو رکنی بنچ نے آج کیس کی سماعت کی۔ گلوبٹ نے عدالت میں کہا کہ اس نے انسداد دہشت گردی کی عدالت سے سنائی گئی سزا کے خلاف لاہور ہائیکورٹ میں اپیل دائر کررکھی ہے جب تک اپیل کا فیصلہ نہیں ہوتا عدالت سزا معطل کرکے اسے ضمانت پر رہا کرنے کا حکم جاری کر دے۔
عدالت نے سماعت ستائیس نومبرتک ملتوی کرتے ہوئے ہدایت کی کہ گلو بٹ کی اپیل اور درخواست ضمانت کو یکجا کرکے سماعت کیلئے پیش کیا جائے۔ گلو بٹ کوا نسداددہشت گردی کی عدالت نےگیارہ سال قید اور ایک لاکھ جرمانے کی سزا سنائی ہے۔
چٹاکانگ: بنگلہ دیش نے چٹاکانگ ٹیسٹ میں زمبابوے کو ایک سو چھیاسی رنز سے شکست دیکر سیریز تین صفر سے اپنے نام کرلی ہے۔
چٹاکانگ ٹیسٹ میں بنگلہ دیش نے زمبابوے کو جیت کیلئے چار سو اننچاس رنز کا ہدف دیا تھا۔ کھیل کے چوتھے روز زمبابوے نے نامکمل دوسری اننگز اکہتر رنز ایک کھلاڑی آؤٹ سے دوبارہ شروع کی اور پوری ٹیم دو سو باسٹھ رنز پر ڈھیر ہوگئی۔
چکبووا نواسی اور سکندر مرزا پیسنٹھ رنز بناکر نمایاں رہے. بنگلہ دیش کیجانب سے شفیع السلام،روبل حسین، جوبیر حسین اور شوواگتا ہون نے دو دو وکٹیں حاصل کیں۔
دونوں ٹیموں کے درمیان ون ڈے سیریز کا پہلا میچ اکیس نومبر کو چٹاکانگ میں کھیلا جائیگا۔
فلوریڈا: کیمرا ٹرک نہیں اور نہ ہی جاودگری ہے، باسکٹ بال میں امریکی کھلاڑی نے ورلڈ ریکارڈ قائم کرکے سب کو حیران کردیا ہے۔
کھلاڑی کھیلوں میں کمال دکھاتے ہی ہیں لیکن اس بار تو باسکٹ بال میں ایک کھلاڑی نے کچھ ایسا کیا کہ سب حیران ہوگئے۔ امریکی کھلاڑی نے باسکٹ بال میں گیند کو ریورس میں جال میں پہنچا کر ورلڈ ریکارڈ قائم کردیا ہے۔
بیاسی فٹ کا فاصلہ اور بغیر دیکھے لگا ٹھیک نشانہ اور اس طرح ہارلم ٹیم کے کھلاڑی نے تو گنیز بک آف ورلڈ ریکارڈ میں اپنا نام درج کرالیا۔ صرف یہی نہیں امریکی کھلاڑی اس سے پہلے بھی باسکٹ بال میں کئی ریکارڈ بنا چکا ہیں۔
ساہیوال: تحریک انصاف کا سونامی آج ساہیوال سے ٹکرائے گا۔ جلسے کی تیاریاں مکمل کرلی گئیں ہیں اور کارکنوں کا جوش و خروش دیکھنے سے تعلق رکھتا ہے۔
ساہیوال میں پی ٹی آئی کے جلسہ گاہ میں تیاری زووروں پر ہے۔ لوگوں کی سج دھج کے لئے پتھارے لگے ہیں اور بازار سجے ہیں۔ جہاں صرف لوگ نہیں بلیاں بھی پی ٹی آئی کے رنگ میں رنگ رہی ہیں۔
پی ٹی آئی نے جلسہ گاہ میں تبدیلی کارنگ جمانے کے لئے تیار ہے۔ عمران خان سے محبت جتلانے کے لئے تحریک انصاف کے کارکنوں کے ساتھ ساتھ پھول چہرے بھی میدان میں آئے ہیں جبکہ بچوں کے ساتھ دو معصوم پیاری پیاری بلیاں بھی سب کی توجہ کا مرکز بنے کے لئے رہیں گی۔ دونوں ہی سج اور سنور رہی رہیں اور پی ٹی آئی کے رنگ میں رنگ رہی ہیں۔
نوجوانوں اور بچوں کی تیاری کے لئے بازار لگا ئے گئے ہیں۔ ایک طرف جلسہ گاہ کے قریب پی ٹی آئی کیپ کا انبار لگا دیا گیا ہے تو دوسرے پتھارے پرگو نوز گو اور کپتان کی تصویر والے ٹی شرٹس کی بھی بہار ہے۔
ساہیوال کے شہری بے تابی سے عمران خان کی آمد کا انتظار کر رہے ہیں۔
اسلام آباد: عالمی ادارہ صحت کی جانب سے پاکستان میں پولیو کے حوالے سے شدید تشویش پائی جاتی ہے اور ادارے نے کہا ہے کہ پولیوکارڈنہ رکھنےوالوں کوبیرون ملک سفر سےروکاجائے اورعالمی ادارہ صحت نے انتباہ کیا ہے کہ ناکامی پر بین الاقوامی اسکریننگ بھی ہوگی۔
عالمی ادارہ صحت کےاعلامیے میں پاکستان کو چھ ماہ میں پولیو وائرس پر قابو پانے کی ہدایت کی گئی ہے۔ ناکامی پر پاکستانی مسافروں کی بین الاقوامی اسکریننگ ہوگی۔
پولیو کے بڑھتے کیسز کی وجہ سے عالمی ادارہ صحت نےبیرون ملک جانیوالےپاکستانیوں کیلئےانسداد پولیو ویکسینیشن لازمی قرار دی ہے اور فاٹا اور کے پی کےمیں انسداد پولیو مہم کو ناگزیر قرار دیا ہے۔
ادھر قومی ادارہ صحت کےمطابق رواں سال ملک میں پولیو سے متاثرہ بچوں کی تعداد دو سو چھیالیس تک پہنچ گئی ہے جبکہ فاٹا میں یہ تعداد ایک سو اٹھاون ہے۔ خیبرپختوپختوا میں انچاس، سندھ میں پچیس، پنجاب میں تین، بلوچستان میں گیارہ پولیو کیسز سامنے آچکے ہیں۔
مختلف شہروں میں پولیو ٹیم کے رضاکاروں کو نشانہ بنائے جانے کے باعث انسداد پولیو مہم میں خلل پڑا ہے۔ گزشتہ سال کےاعدادوشمارکے مطابق حملوں میں سترہ افراد موت کی نیند سوگئے۔
کراچی: کراچی میں فائرنگ کے مختلف واقعات کے دوران ایک شخص جان بحق اور دو زخمی ہوگئے۔ پولیس اور رینجرز نے مختلف علاقوں میں کاروائیاں کرکے متعدد ملزمان کو حراست میں لے لیا ہے۔ لیاقت آباد میں سندھ گورنمنٹ اسپتال پر کارروائی کےدوران ٹارگٹ کلنگ اوردیگر جرائم میں ملوث ملزمان کو گرفتارکر لیا۔
قانون نافذ کرنیوالےاداروں کی جانب سے کراچی کے علاقے لیاقت آباد میں قائم سندھ گورنمنٹ اسپتال پر چھاپہ مارگیا ہے۔ چھاپے میں ٹارگٹ کلنگ،بھتہ خوری،دیگرجرائم میں ملوث چار ملزمان کو گرفتارکیا گیا ہے۔ قانوں نافذ کرنے والے اداروں کی جانب سے بتایا گیا ہے کہ ملزمان کے قبضے سے اسلحہ بھی برآمد ہوا ہے۔ ملزمان کاتعلق سیاسی جماعت سےہے جنھیں نامعلوم مقام پر منتقل کر کے تفتیش شروع کر دی گئی ہے۔
ادھرمنگھو پیر میں رینجرز نے کالعدم تنظیموں کے ٹھکانوں کی موجودگی کی اطلاع پر سرچ آپریشن کر رہی ہے، جس میں متعدد افراد کے گرفتار ہونے کی بھی اطلاعات ہیں۔
ترجمان رینجرز کا کہنا ہے کہ منگھو پیر کے داخلی اور خارجی راستے بند کر کے سرچ آپریشن کیا جا رہا ہے، جس میں خواتین سرچر سمیت 300 اہلکار حصہ لے رہے ہیں۔ رینجرز نے گرفتار کئے گئے افراد کو نامعلوم مقام پر منتقل کر کے تفتیش شروع کر دی ہے۔
بلدیہ ٹاون میں قانون نافذ کرنے والے اداروں نے مذہبی منافرت پھیلانے کے الزام میں سرفراز نامی شخص کو حراست میں لیکر پوچھ گچھ شروع کردی ہے۔
دوسری جانب کراچی کے علاقے ڈیفنس میں رات گئے ایس پی سی آئی ڈی خرم وارث کےگھرپرنامعلوم افراد نے فائرنگ کی جس کی ایف آئی آر محافظ خرم وارث کی مدعیت میں درخشاں تھانےمیں نامعلوم افراد کے خلاف درج کرلی گئی ہے۔ مقدمےمیں انسداد دہشتگردی کی دفعات شامل ہیں۔
پولیس حکام کے مطابق نارتھ نا ظم آبا د میں نامعلوم دہشتگردوں کی فائرنگ سے اہل سنت والجماعت کا کارکن جبران جان بحق ہوگیا۔ اس کے علاوہ کورنگی صنعتی ایریا اور کلفٹن بوٹ بیسن کے قریب بھی فائرنگ کے دو الگ الگ واقعات میں 2افراد زخمی ہوئے۔ ہلاک اور زخمی ہو نے والوں کو پولیس کاروائی اور طبی امداد کیلئے ہسپتال منتقل کیا گیا۔
کراچی: حکومت کی جانب سے بینکوں سےگیارہ سو تیس ارب روپےقرض لینےکا فیصلہ کیا گیا ہے۔ یہ قرض نومبر سےجنوری کےدوران بجٹ خسارہ پورا کرنےکیلئےلیاجائیگا۔
اسٹیٹ بینک نےتین سے دس سالہ مدت کے نو سو اسسی ارب روپےکے پاکستان سرمایہ کاری بانڈز بینکوں کو فروخت کرنےکاہدف رکھا ہے جبکہ تین سےبارہ ماہ کی مدت کے ایک سو پچاس ارب روپےکےمارکیٹ ٹریژری بلز بھی بینکوں کو فروخت کرنےکاہدف مقررکیاگیاہے۔
مذکرہ بانڈز اور ٹی بلز پندرہ نومبر سےپندرہ جنوری کےدوران فروخت کئےجائینگے۔ حکومت حاصل شدہ آمدنی سےپچھلےقرضوں کی ادائیگی اوربجٹ خسارہ پوراکرے گی۔
اسٹیٹ بینک کی جانب سے پی آئی بیز اور مارکیٹ ٹریژری بلز کی فروخت کا ہدف مقرر کرلیا گیا ہے۔
اسلام آباد: رواں مالی سال 2014-15ءکی پہلی سہ ماہی ( جولائی تا ستمبر 2014ء) کے دوران سینٹرل ڈائریکٹوریٹ آف نیشنل سیونگز( سی ڈی این ایس) نے 20 فیصد تک زائد کی بچتیں وصول کی ہیں۔
جولائی تا ستمبر2014ءکے دوان سی ڈی این ایس کی بچت وصولیاں60 ارب روپے تک بڑھ گئیں جبکہ گذشتہ مالی سال کے اسی عرصہ کے دوران44 ارب روپے اکٹھے کئے گئے تھے۔ سی ڈی این ایس کے حکام کے مطابق رواں سال 2014ءکےلئے 220 ارب روپے کی بچتوں کی وصولی کا ہدف مقرر کیا گیا ہے جبکہ اس کے علاوہ پرائز بانڈزکی مد میں 65 ارب روپے اکھٹے کرنے کا ہدف ہے۔
ڈائریکٹوریٹ نے قومی بچت کی سکیموں میں سرمایہ کاری کرنے والے صارفین کو بہترین خدمات کی فراہمی کی غرض سے ملک بھرمیں قائم قومی بچت مراکز کی 140 شاخوں میں 80 کو کمپیوٹرائزڈ کرنے کا بھی فیصلہ کیا ہے جبکہ نیٹ ورک کی توسیع کے سلسلے میں مربوط حکمت عملی مرتب کی گئی ہے تاکہ قومی بچت کی سکیموں میں زیادہ سے زیادہ سرمایہ کاری کےلئے لوگوں کو متوجہ کیا جاسکے جس سے ملکی معیشت پر مثبت اثرات مرتب ہوں گے۔
خیبر ایجنسی: سیکیورٹی فورسز نے کاروائی کر تے ہو ئے خیبر ایجنسی کے علا قے باڑہ میں پانچ شدت پسندوں کا ہلاک اور متعدد کو زخمی کردیا ہے۔
تفصیلات کے مطابق شدت پسندوں نے خیبر ایجنسی کی تحصیل باڑہ میں سیکیورٹی فورسز پر حملہ کیا جس کے جواب میں سیکیورٹی فورسز نے کاروائی کر تے ہو ئے شدت پسندوں کو موثر جواب دیا اور پانچ شدت پسندوں کو ہلاک کردیا۔ جوابی حملے میں کئی شدت پسند زخمی بھی ہو ئے ہے۔
سیکیورٹی فورسز کی جوابی کاروائی کے دوران ایک سیکیورٹی اہلکار زخمی بھی ہواہے۔ واقع کی پولیٹیکل انتظامیہ نے تصدیق کی ہے اور شدت پسندوں کے ہلاک اور زخمی ہو نے کی اطلاعات کو درست قرار دیا ہے۔
پاکستان سیکیورٹی فورسز نے خیبر ایجنسی کی مختلف تحصیلوں میں شدت پسندوں کے خلاف نئے اور موثر آپریشنز کئے ہیں جن میں سیکٹروں شدت پسند ہلاک اور زخمی ہو ئے ہیں۔