لاہور: صوبہ پنجاب کے دارالحکومت لاہور میں ایئر پورٹ پارکنگ کے قریب فائرنگ سے 2 افراد جاں بحق ہوگئے، مقتولین میں سے ایک عمرے کی ادائیگی کر کے واپس آیا تھا۔
تفصیلات کے مطابق لاہور ایئر پورٹ کے قریب فائرنگ کا واقعہ پیش آیا ہے۔ ایئرپورٹ سیکیورٹی فورس (اے ایس ایف) کا کہنا ہے کہ فائرنگ ایئر پورٹ پارکنگ ایریا میں ہوئی۔
اے ایس ایف کے مطابق فائرنگ کرنے والے 2 ملزمان کو گرفتار کر لیا گیا۔ ریسکیو ذرائع کا کہنا ہے کہ فائرنگ سے بیرون ملک سے آنے والے شخص کو نشانہ بنایا گیا جس میں ایک ٹیکسی ڈرائیور سمیت 2 مزید افراد زد میں آگئے۔
فائرنگ سے نشانہ بننے والا شخص موقع پر ہی دم توڑ گیا، بعد ازاں زخمی ٹیکسی ڈرائیور بھی جان کی بازی ہار گیا۔ مقتول کی شناخت زین نفیس کے نام سے ہوئی جبکہ ٹیکسی ڈرائیور کا نام اکرم تھا۔ واقعے میں ایک اور شخص عنصر بھی زخمی ہوا۔
ایس پی کینٹ صفدر رضا کاظمی کا کہنا ہے کہ مقتول زین نفیس کے خلاف پیپلز پارٹی کے رہنما بابر بٹ کے قتل کا مقدمہ درج تھا۔ ان کے مطابق فائرنگ ذاتی دشمنی کا شاخسانہ ہے۔
فائرنگ کے واقعے کے بعد رینجرز اہلکار ایئرپورٹ پہنچ گئے، ایئر پورٹ کے خارجی راستے بند کردیے گئے ہیں جبکہ گاڑیوں کی چیکنگ جاری کی جارہی ہے۔
وزیر اعلیٰ پنجاب عثمان بزدار نے ایئرپورٹ پارکنگ ایریا میں فائرنگ کا نوٹس لیتے ہوئے سی سی پی او سے رپورٹ طلب کرتے ہوئے واقعے کی تحقیقات کا حکم دے دیا ہے۔
وزیر اعلیٰ کا کہنا تھا کہ ذمہ داروں کے خلاف قانون کے تحت کارروائی کی جائے۔
خیال رہے کہ اس سے قبل جون 2014 میں کراچی ایئرپورٹ پر دہشت گردی کا بدترین واقعہ پیش آچکا ہے جب 10 دہشت گردوں نے ایئرپورٹ پرحملہ کردیا تھا۔
سیکیورٹی فورسز کی جانب سے 12 گھنٹوں تک جوابی کارروائی میں تمام دس حملہ آوروں سمیت 29 افراد ہلاک ہوگئے تھے۔
اسی کے چند روز بعد پشاور ایئرپورٹ پر پاکستان ایئر لائنز کے ایک طیارے پر نامعلوم افراد نے فائرنگ کی تھی جس سے طیارے میں بیٹھی ایک خاتون مسافر جاں بحق اور عملے کے 2 افراد زخمی ہوگئے تھے۔
