جنوبی افریقہ کے لیجنڈری کرکٹر اے بی ڈیویلیئرز نے آسٹریلوی اوپنر ڈیوڈ وارنر کی تعریف کرتے ہوئے کہا ہے کہ وہ بہت بڑے فائٹر تھے۔
مسٹر تھری سکسٹی کی عرفیت سے مشہور کرکٹر نے حال ہی میں ٹیسٹ اور ون ڈے کرکٹ سے ریٹائر ہونے والے ڈیوڈ وارنر کے حوالے سے کہا کہ جب انھوں نے وارنر کو دیکھا تھا تو انھیں اندازہ تھا کہ وہ ایک سپراسٹار کرکٹر بنیں گے، وہ ایک بہترین فائٹر ہیں۔
ڈیویلیئرز اور وارنر ایک ساتھ ڈریسنگ روم بھی شیئر کرچکے ہیں۔ دنوں ماضی میں آئی پی ایل ٹیم دہلی ڈیئر ڈیولز کا حصہ رہے ہیں۔
سابق ٹیم میٹ کے حوالے سے گفتگو کرتے ہوئے انھوں نے کہا کہ میں اور وارنر دہلی ڈیئرڈیولز کی طرف ساتھ کھیلیں ہیں وہ ایک لاجواب کھلاڑی تھے۔ وارنر اب تک کے بہترین آل راؤنڈ کرکٹرز میں سے ایک ہیں۔
انھوں نے وارنر کی اس عزم کو بھی سراہا کہ ون ڈے کرکٹ سے اپنی ریٹائرمنٹ کے باجود اگر آسٹریلیا کو ضرورت پڑی تو وہ 2025 آئی سی سی چیمپئنز ٹرافی کے لیے ٹیم کو دستیاب ہونگے۔
ڈیویلیئرز نے کہا کہ میں اس بات کے لیے بہت زیادہ شکر گزار ہوں کہ اپنے ملک کے لیے تمام فارمیٹس کھیل چکا ہوں۔ اسکے بعد میں نے بھی بالکل وہی کیا جو ڈیوڈ وارنر نے کیا تھا۔
واضح رہے کہ حال ہی میں پاکستان کے خلاف تین ٹیسٹ میچز کی ہوم سیریز کے بعد آسٹریلوی اوپنر ون ڈے انٹرنیشنلز اور ٹیسٹ کرکٹ سے ریٹائرمنٹ لے چکے ہیں۔
