راولپنڈی : ملٹی پل لانچ راکٹ سسٹم اے100 کو پاک فوج آرٹلری کور میں شامل کرلیا گیا، آرمی چیف جنرل قمرجاوید باجوہ نے کہا ہے کہ پاکستانی ڈیفنس انڈسٹری نے ملکی دفاع میں اہم کردار ادا کیا ہے۔
پاک فوج کے شعبہ تعلقات عامہ آئی ایس پی آر کے مطابق پاکستانی سائنسدانوں کے تیار کردہ ملٹی پل لانچ راکٹ سسٹم اے ہنڈرڈ کی پاک فوج کے زیر استعمال اسلحہ میں شمولیت کی تقریب جی ایچ کیو راولپنڈی میں ہوئی۔
اس پر وقار تقریب میں پاکستانی سائنسدانوں اور انجینئرز کی محنت سے بنائے گئے اس ملٹی پل راکٹ سسٹم کو متعارف کرا یا گیا، آرمی چیف جنرل قمرجاوید باجوہ تقریب کے مہمان خصوصی تھے،اپنے خطاب میں انہوں نے کہا کہ اے100راکٹ روایتی فائر پاور میں تقویت کا باعث ہوگا۔
پاکستانی ڈیفنس انڈسٹری نے ملکی دفاع میں اہم کردار ادا کیا ہے، اے100راکٹ کی تیاری پر سائنسدان اور انجینئرز مبارکباد کے مستحق ہیں، پاک فوج کی روایتی صلاحیتوں میں اضافہ جاری رکھیں گے، روایتی خطرے سے نمٹنے کیلئے پاک فوج کی صلاحیتوں کو مستحکم کرتے رہیں گے۔
علاوہ ازیں آئی ایس پی آر کے مطابق ملٹی پل لانچ راکٹ سسٹم اے100پاک فوج میں شامل کرلیا گیا ہے، ایم ایل آرایس اے100راکٹ پاکستانی سائنسدانوں اور انجینئرز نے تیار کیا۔
اے100راکٹ سو کلومیٹر تک کارکردگی دکھانے کا حامل راکٹ ہے، اے ہنڈرڈ راکٹ میں دشمن کی نقل وحرکت کو تباہ کرنے کی صلاحیت بھی موجود ہے۔