ARYNews.tv | Urdu – Har Lamha Bakhabar

Tag: بائیک

  • بیٹی کو بائیک اور رکشے سمیت ہر طرح کی گاڑی سکھانے والے والد

    بیٹی کو بائیک اور رکشے سمیت ہر طرح کی گاڑی سکھانے والے والد

    کراچی: صوبہ سندھ کے دارالحکومت کراچی کے رہائشی شبیر خان نے اپنی بیٹی کو ہر قسم کی گاڑی چلانا سکھا دی، ان کی بیٹی ندا رکشہ چلاتی ہیں اور اب اس سے روزگار کما رہی ہیں۔

    تفصیلات کے مطابق اے آر وائی ڈیجیٹل کے مارننگ شو گڈ مارننگ پاکستان میں ایسے والد اپنی بیٹی کے ساتھ شریک ہوئے جنہوں نے بیٹیوں کو ہر طرح کی گاڑی چلانا سکھائی ہے۔

    شبیر خان نامی ڈرائیور نے اپنی بیٹی ندا کو موٹر سائیکل، گاڑی، رکشہ، حتیٰ کہ ٹینکر تک چلانا سکھا دیا ہے۔ شبیر خان اپنے گاؤں میں بچوں کو اسکول چھوڑنے اور لانے کا کام کرتے تھے اور پھر ان کی بیٹی بھی سوزوکی سیکھ کر ان کا اس کام میں ہاتھ بٹانے لگی۔

    بعد ازاں کراچی آنے کے بعد انہوں نے بائیک چلانا سیکھی، اس کے بعد پھر وہ رکشہ بھی چلانا سیکھ گئیں اور اب اس سے روزگار کما رہی ہیں۔

    ندا اور ان کی چھوٹی بہن نے باکسنگ بھی سیکھ رکھی ہے۔ وہ بتاتی ہیں کہ جب بھی بائیک چلاتے ہوئے کوئی شخص انہیں ہراساں کرنے کی کوشش کرتا تھا تو وہ اس پر باکسنگ کے داؤ آزماتی ہیں۔

    شبیر خان بتاتے ہیں کہ ندا نے 10 سال کی عمر میں پہلی ڈرائیونگ سیکھی۔

    ان کی 5 بیٹیاں ہیں اور ان کا ماننا ہے کہ ان کی بیٹیاں کسی بھی طرح بیٹوں سے کم نہیں۔ انہیں اپنی بیٹیوں پر بے حد فخر ہے۔

  • بیٹی کے ساتھ بائیک پر کراچی سے خنجراب تک سفر کرنے والا باپ

    بیٹی کے ساتھ بائیک پر کراچی سے خنجراب تک سفر کرنے والا باپ

    کراچی: صوبہ سندھ کے دارالحکومت کراچی کے رہائشی قاضی فاروقی نے اپنی بیٹی کے ساتھ بائیک پر پاکستان ٹور کر کے منفرد مثال قائم کردی، ان کی بیٹی خود بھی بائیک چلانا جانتی ہیں۔

    تفصیلات کے مطابق اے آر وائی ڈیجیٹل کے مارننگ شو گڈ مارننگ پاکستان میں ایسے والد اپنی بیٹی کے ساتھ شریک ہوئے جنہوں نے بیٹی کے ساتھ بائیک پر پورے پاکستان کا سفر کیا۔

    قاضی فاروقی بتاتے ہیں کہ وہ اپنے بیٹے کے ساتھ بائیک پر پاکستان ٹور پر نکلے تھے اور جب واپس آئے تو ان کی بیٹی بھی ساتھ چلنے کی ضد کرنے لگیں۔

    انہوں نے ایک لمحے کے لیے بھی کسی قسم کی تفریق نہیں برتی اور اگلے سال بیٹی کو بائیک پر لے کر پاکستان ٹور پر نکل کھڑے ہوئے۔

    قاضی فاروقی کی بیٹی غزل فاروقی خود بھی بائیک چلانا جانتی ہیں اور یونیورسٹی کے 4 سال انہوں نے بائیک پر سفر کر کے گزارے، انہوں نے انجینیئرنگ کی تعلیم حاصل کر رکھی ہے۔

    والد کے ساتھ بائیک پر پاکستان ٹور ان کی زندگی کے یادگار لمحات تھے۔ وہ بتاتی ہیں کہ وہ گھر سے سوچ کر نکلی تھیں کہ انہیں باتھ روم وغیرہ کی مشکلات کا سامنا ہوسکتا ہے تاہم راستے میں انہیں پیٹرول پمپس پر صاف ستھرے باتھ رومز ملے جس سے ان کی مشکلات کافی کم ہوئیں۔

    دونوں باپ بیٹی نے کراچی سے لے کر خنجراب پاس تک سفر کیا جس میں انہیں 11 دن لگے۔

    قاضی فاروقی اگلے سال اپنی بیگم کو اسی طرح پاکستان ٹور پر لے جانے کا ارادہ رکھتے ہیں۔ ان کا ایک بیٹا اور ایک بیٹی ہے اور دونوں میں انہوں نے کبھی تفریق نہیں کی۔

  • بائیک کا پیچھا کرتے شیر کی دل دہلا دینے والی ویڈیو

    بائیک کا پیچھا کرتے شیر کی دل دہلا دینے والی ویڈیو

    نئی دہلی: سوشل میڈیا پر وائرل ایک ویڈیو نے صارفین کی سانسیں روک دیں جس میں ایک خوفناک شیر نہایت تیز رفتاری سے ایک موٹر بائیک کا پیچھا کرتا ہوا دکھائی دے رہا ہے۔

    بھارتی محکمہ جنگلات کے افسر پراوین کسون نے سماجی رابطے کی ویب سائٹ ٹویٹر پر ایک مختصر کلپ شیئر کیا۔ ویڈیو میں دیکھا جاسکتا ہے کہ 2 افراد موٹر بائیک پر بیٹھے ہیں اور اسے فل اسپیڈ میں بھگا رہے ہیں۔

    ان سے دگنی رفتار سے بھاگتا ہوا ایک دھاری دار شیر ان کے پیچھے آرہا ہے اور ایک لمحے کو وہ اتنا قریب آگیا جیسے ابھی بائیک سواروں پر چھپٹا مار دے گا۔

    افسر کے مطابق بائیک محکمہ جنگلات کی ہے اور اس پر بیٹھے افراد محکمے سے تعلق رکھتے ہیں، انہوں نے کیپشن میں لکھا کہ تصور کریں کہ کبھی یہ بلی آپ کا پیچھا کر رہی ہو۔ ویڈیو گزشتہ سال کی ہے جب محکمے کے عملے کی اس شیر سے مڈبھیڑ ہوئی۔

    اس ویڈیو کو ایک لاکھ بار دیکھا گیا جبکہ ہزاروں افراد نے اسے لائیک کیا۔

    ویڈیو پر دیگر ٹویٹر صارفین نے بھی اپنے ملتے جلتے تجربات شیئر کیے جبکہ کچھ نے مختلف خیالات کا اظہار کیا۔

    ایک صارف نے لکھا کہ ایک بار وہ اپنے دوستوں کے ساتھ ہماچل پردیش کے پہاڑوں میں تصاویر کھینچ رہی تھیں کہ اچانک انہوں نے پہاڑوں سے ایک بائیک کو نہایت تیز رفتاری سے نیچے آتے دیکھا۔

    صارف کے مطابق انہیں کچھ سمجھ نہیں آیا مگر وہ سب بھی فوراً اپنی کار میں بیٹھ گئے اور جلد ہی انہوں نے ایک چیتے کو خوفناک رفتار سے بائیک کے پیچھے بھاگتے دیکھا۔

    ایک صارف نے لکھا کہ وہ ایسے موقع پر خوف سے ہی مرجاتیں۔

    ایک اور صارف کا کہنا تھا کہ یہ اپنے لیے ایک یاد دہانی ہے کہ اپنی گاڑی کی باقاعدگی سے سروس کرواتے رہیں تاکہ ضرورت کے وقت وہ بند نہ ہو۔

    ایک اور صارف نے محکمہ جنگلات کے عملے کو بھی تنقید کا نشانہ بنایا کہ انہیں اس طرح جنگلی حیات کے مسکن میں آزادانہ گھوم پھر کر انہیں ڈسٹرب نہیں کرنا چاہیئے۔

    مذکورہ صارف نے لکھا کہ اگر ببر شیر سے دس بار سامنا ہوجائے ہو تو 5 دفعہ بچنے کا امکان ہوسکتا ہے لیکن شیر سے سامنا ہوگا تو بچنے کا امکان بمشکل ایک بار ہوگا۔

    خیال رہے کہ جسم پر دھاریاں رکھنے والا شیر دنیا کے تیز رفتار ترین جانوروں میں سے ایک ہے اور اسی تیز رفتاری کے باعث اس کے شکار کے بچنے کے امکانات نہایت کم ہوتے ہیں۔

  • 7 میل سفر طے کرنے کے بعد ہیلمٹ میں سے زہریلا سانپ برآمد

    7 میل سفر طے کرنے کے بعد ہیلمٹ میں سے زہریلا سانپ برآمد

    نئی دہلی: بھارت میں ایک ایسا خوش نصیب شخص سامنے آیا ہے جس کے ہیلمٹ میں زہریلا سانپ چھپا تھا لیکن وہ اس جان لیوا خطرے سے بے خبر  بائیک چلاتا رہا اور سانپ کے حملے سے بھی محفوظ رہا۔

    بھارتی میڈیا کی رپورٹ کے مطابق رانجیتھ نامی بھارتی شخص پیشے کے اعتبار سے ایک اسکول ٹیچر ہے جس نے موٹرسائیکل پر 7 میل کا فاصلہ طے کیا جس کے بعد اسے پتا چلا کہ اس کے ہیلمٹ میں ایک عدد زہریلا سانپ گھسا ہوا ہے۔

    بھارتی استاد پڑھانے کی غرض سے گھر سے اسکول پہنچا جہاں اس نے کلاس ختم کی اور پھر دوسرے اسکول پڑھانے چلا گیا اس دوران مسلسل زہزیلا سانپ اس کے ہیلمٹ میں موجود تھا جس کی اسے ذرا بھی بھنک نہ لگی۔

    رپورٹ کے مطابق ’کہا جاتا ہے کہ ہیلمٹ جان کی حفاظت کرتا ہے تاہم کبھی کبھی یہ جان لیوا بھی ثابت ہوسکتا ہے‘۔

    بھارتی ٹیچر پڑھانے کے لیے جب دوسرے اسکول پہنچا تو اسے ہیلمٹ کے اندر ایک سانپ دیکھا بعد ازاں انہوں نے سانپ کو مار کر ہیلمٹ بھی جلا ڈالا۔ رانجیتھ کا کہنا ہے کہ اس واقعے کے فوری بعد اسپتال پہنچا جہاں ڈاکٹروں نے تصدیق کی کہ وہ سانپ کے ڈنسے جانے سے محفوظ رہے۔

  • سیکورٹی گارڈ کا رونا سعودی شہزادے سے نہیں دیکھا گیا، ریالوں کی برسات کردی

    سیکورٹی گارڈ کا رونا سعودی شہزادے سے نہیں دیکھا گیا، ریالوں کی برسات کردی

    جدہ: سعودی عرب میں سیکورٹی گارڈ کی بائیک چوری ہونے کی ویڈیو وائرل ہونے پر شہزادہ عبدالعزیز بن فہد نے فوری طور پر گارڈ سے نہ صرف رابطہ کیا بلکہ 2 لاکھ ریال دینے کا بھی وعدہ کیا۔

    تفصیلات کے مطابق سعودی عرب کے شہر جدہ میں سیکورٹی گارڈ کی بائیک چوری ہوئی، گارڈ نے سوشل میڈیا پر ویڈیو اپ لوڈ کی جس میں وہ اپنے جذبات پر قابو نہ رکھ سکا اور رو پڑا، گارڈ کا کہنا تھا کہ اب وہ ڈیوٹی پر کیسے جائے گا۔

    سیکورٹی گاڑد کی ویڈیو وائرل ہونے پر شہزادہ عبدالعزیز بن فہد نے فوری طور پر گارڈ سے نہ صرف رابطہ کیا بلکہ 2 لاکھ ریال دینے کا بھی وعدہ کیا۔ ایک اور شخص نے گارڈ کے اکاؤنٹ میں نہ صرف 20 ہزار ریال ٹرانسفر کیے بلکہ اسے نوکری کی بھی پیشکش کی۔

    ناصر حمود نامی گارڈ نے اپنی دوسری ویڈ میں شہزاد عبدالعزیز اور دیگر افراد کا شکریہ ادا کرتے ہوئے کہا کہ میں آپ سب کا خاص طور پر شہزادہ عبدالعزیز کا شکر گزار ہوں جنہوں نے میری فریاد سنی۔

    سیکورٹی گارڈ نے ویڈیو میں مزید کہا کہ دنیا میں ایسے ہمدردوں کی کمی نہیں جو ضرورت مندوں کی مدد کرنے میں کسی قسم کی تاخیر نہیں کرتے، میں اپنی بائیک چوری ہونے پر پریشان تھا اس لیے جذبات پر قابو نہ رکھ سکا۔

    سعودی فنکار فایز المالکی نے سماجی رابطے کی ویب سائٹ ٹویٹر پر شہزادہ عبدالعزیزبن فہد کے ساتھ سیکورٹی گارڈ کی تصویر شیئر کرتے ہوئے لکھا 15 سو ریال کی بائیک کے بدلے اللہ تعالیٰ نے 2 لاکھ ریال کا رزق بھیج دیا۔

  • پاکستانی شہری نے دبئی میں لاکھوں کی بائیک جیت لی

    پاکستانی شہری نے دبئی میں لاکھوں کی بائیک جیت لی

    دبئی : لاٹری ٹکٹ خریدنا ہر کسی کے لیے ممکن نہیں ہوتا لیکن جس نے ٹکٹ کی خریداری ممکن بنالی، اس کے لیے کچھ بھی ناممکن نہیں ہوتا، پاکستانی نوجوان نے دبئی میں لاکھوں کی بائیک جیت لی۔

    تفصیلات کے مطابق پاکستانی نژاد نوجوان محمد صدر نے اپنی قسمت آزمانے کےلیے پہلی مرتبہ ٹکٹ خریدا اور ان کی امید بر آئی اور ان کا قرعہ اندازی میں نام نکل آیا، یعنی اب وہ تقریباً 19 لاکھ روپے کی بائیک کے مالک بن گئے ہیں۔

    اماراتی میڈیا کا کہنا ہےکہ محمد صفدر نے بائیک تو جیت لیتاہم ابھی تک ان کا کچھ نہیں چلا، لاٹری انتظامیہ نے محمد صفدر کو تلاش کررہی ہے یہاں تک کہ اس نے اشتہار بھی دے دیا’کیا آپ محمد صفدر کو جانتے ہیں‘۔

    لاٹری انتظامیہ کے مطابق محمد نامی اس پاکستانی شہری کے ٹکٹ نمبر 0941 حال ہی میں ہونے والے لکی ڈرا میں انعام کا حقدار قرار پایا ہے۔

    محمد صدر گزشتہ کچھ سال سے ملازمت کے سلسلے میں دبئی میں مقیم ہیں۔ انہوں نے حال ہی میں اس لکی ڈرا میں اپنی قسمت آزمانے کا فیصلہ کیا تھا۔

    بھارتی لڑکی نے 10 لاکھ امریکی ڈالر جیت کر کروڑپتی بن گئی

    دوسری جانب بھارت سے تعلق رکھنے والی 9 سالہ لڑکی نے اپنی ناقابل یقین قسمت کے باعث دس لاکھ امریکی ڈالر کی لاتری جیت لی ہے، اس سے قبل اسی لڑکی نے 2013 میں بیش قیمت گاڑی لاٹری میں جیتی تھی۔

    یاد رہے کہ دبئی ڈیوٹی فری ریفل ٹکٹ کے نام سے جانے والے اس ٹکٹ کی قیمت ایک ہزار درہم ہے جبکہ بائیک کی قرعہ اندازی میں شامل ہونے کےلیے 250 درہم کا ٹکٹ خریدنا پڑتا ہے جو کہ دبئی میں مقیم کسی بھی پاکستانی کے لیے ایک زیادہ بڑی رقم نہیں ہے۔

  • بھارت میں خواتین بائیکرز کے لیے نیا حفاظتی ہتھیار تیار

    بھارت میں خواتین بائیکرز کے لیے نیا حفاظتی ہتھیار تیار

    نئی دہلی: بھارت میں خواتین کے خلاف بڑھتے ہوئے جرائم کو دیکھتے ہوئے ان کے لیے ایک اور حفاظتی ہتھیار متعارف کروا دیا گیا جو کسی خطرے کی صورت میں باآسانی ان کی پہنچ میں ہوگا۔

    بھارت میں خواتین سے زیادتی اور انہیں ہراساں کرنے کے جرائم عروج پر پہنچ چکے ہیں، گزشتہ کئی عرصے سے بھارتی دارالحکوت نئی دہلی کو ریپ کیپیٹل کے نام سے جانا جاتا ہے جہاں ہر چند منٹ میں ایک لڑکی زیادتی کا نشانہ بنتی ہے۔

    بھارتی کرائم ریکارڈ بیورو کے مطابق بھارت میں اس وقت خواتین سے زیادتی چوتھا بڑا اور عام جرم بن چکا ہے۔ اعداد و شمار کے مطابق سنہ 2013 میں لگ بھگ 25 ہزار خواتین کو زیادتی کا نشانہ بنایا گیا۔

    ہر سال پیش آنے والے زیادتی کے واقعات میں سے صرف 5 سے 6 فیصد ایسے ہیں جو رپورٹ ہو پاتے ہیں۔ ان میں بھی ملزمان آزاد ہوجاتے ہیں اور زیادتی کا شکار متاثرہ لڑکی اور اس کا خاندان انصاف کے حصول میں بری طرح ناکام رہتے ہیں۔

    مزید پڑھیں: جنسی حملوں سے بچاؤ کی احتیاطی تدابیر

    گو کہ بھارت میں ان جرائم پر قابو پانے کی کوشش کی جارہی ہے تاہم پولیس سسٹم اور جوڈیشل سسٹم میں خرابی کی وجہ سے صورتحال جوں کی توں ہے اور حکام اس سلسلے میں کوئی بڑی پیشرفت کرنے میں تاحال ناکام ہیں۔

    انتظامی مشینری کی ناکامی کو دیکھتے ہوئے بھارتی خواتین انفرادی طور پر حفاظتی اقدامات اٹھانے پر مجبور ہیں جبکہ کئی پرائیوٹ کمپنیوں کی جانب سے بھی خواتین کی حفاظت کے لیے مختلف طریقے متعارف کروائے جا چکے ہیں۔

    حال ہی میں ایک موٹر کمپنی نے خواتین کی اسکوٹی میں پیپر (کالی مرچ) اسپرے متعارف کروایا ہے جو بائیک کے ہینڈل میں نصب ہے۔

    گو کہ کئی خواتین خصوصاً اکیلے سفر کرنے والی خواتین حفاظتی اقدامات کے پیش نظر اپنے ساتھ پیپر اسپرے رکھتی ہیں تاہم کسی ہنگامی صورتحال میں پلک جھپکتے کے ساتھ اس اسپرے کو دسترس میں لینا خاصا مشکل ہوتا ہے۔

    اسی صورتحال کو مدنظر رکھتے ہوئے آٹو کمپنی نے اپنی بائیکس کے ہینڈل میں اسپرے نصب کیا ہے تاکہ خطرے کی صورت میں اسے فوری طور پر نکال کر استعمال کیا جاسکے۔

    کمپنی کا کہنا ہے اس ’ہتھیار‘ کا مقصد خواتین کو محفوظ اور خود مختار بنانا ہے تاکہ باہر نکلنے کا خوف انہیں روک نہ سکے اور وہ اپنی صلاحیتوں کا بھرپور استعمال کرسکیں۔

  • اڑنے والی بائیک اب عام لوگ خرید سکیں گے

    اڑنے والی بائیک اب عام لوگ خرید سکیں گے

    ماسکو: ٹیکنالوجی کی دنیا میں روسی کمپنی نے انقلاب برپا کرتے ہوئے عام لوگوں کے لیے فضا میں اڑنے والی موٹر سائیکل تیار کرلی جس کا کامیاب آزمائشی تجربہ کرلیا گیا۔

    تفصیلات کے مطابق روسی کمپنی نے جدید ٹیکنالوجی سے آراستہ ایس تھری ہوور بائیک متعارف کرادی جو ہیلی کاپٹر کی طرح اڑنے کی صلاحیت رکھتی ہے۔

    کمپنی کی جانب سے تیار کی جانے والی موٹرسائیکل عام لوگوں کے لیے تیار کی گئی ہے، جس کو جدید ڈیزائن اور اضافی سیفٹی سسٹم کے ساتھ تیار کیا گیا ہے۔

    ہوور بائیک کو فضا میں چلانے کے دوران مستحکم رکھنے، ڈرائیور کی مرضی سے اڑانے اور اتارنے، ایمرجنسی لینڈنگ، جدید ساؤنڈ اور بصری نظام کو مدنظر رکھتے ہوئے بنایا گیا۔

    مزید پڑھیں: دبئی پولیس کا ڈرون یا فلائنگ بائیک کا کامیاب تجربہ

    یہ بھی دیکھیں: دنیا کی پہلی فضائی ٹیکسی کی آزمائشی پرواز

    ہیلی کاپٹر کی طرح سطح زمین سے 16 فٹ اوپر اڑتے ہوئے 60 کلومیٹر فی گھنٹہ کی رفتار سے فاصلہ طے کرسکتی ہے۔ بیٹری سے چلنے والی یہ موٹر سائیکل ایک وقت میں 8 گھنٹے تک چلنے اور یہ 70 کلوگرام تک وزن اٹھانے کی صلاحیت رکھتی ہے۔

    کمپنی کی جانب سے یہ بھی خوش خبری سنائی گئی ہے کہ موٹرسائیکل کی اسپیڈ اور اس کو اڑانے کی اجازت ہر ملک میں قانونی طور پر جائز قرار دی گئی ہے۔

    موٹرسائیکل کی قیمت ظاہر نہیں کی گئی اور نہ ہی مارکیٹ میں اس کی باقاعدہ فروخت کے حوالے سے کسی حتمی تاریخ کا اعلان کیا گیا۔

    یاد رہے کہ دبئی پولیس سیکیورٹی نظام اور شہر میں امن و امان کو یقینی بنانے کے لیے ہوور بائیک استعمال کررہی ہے۔

  • بائیک پر ایسا سفر جس نے زندگی بدل دی

    بائیک پر ایسا سفر جس نے زندگی بدل دی

    اس نے اپنی ماں سے پوچھا، ’وہ کیا چیز تھی جو ابو ساری زندگی کرنا چاہتے تھے پر نہ کر سکے؟‘ اس کی ماں نے اسے جو بتایا اس نے وہی کیا، اور پھر وہ پاکستان کی ایک پہچان بن گئی۔

    لاہور کی 21 سالہ زینت عرفان ایک ایسے سفر پر نکلی جس نے اس کی زندگی بدل دی۔ اپنے والد کا ادھورا خواب پورا کرنے کے لیے اس نے موٹر سائیکل اٹھائی اور دنیا کے سفر پر چل پڑی۔ اس کے والد کی یہی خواہش تھی جسے وہ پورا نہ کرسکے۔ موٹر سائیکل پر دنیا کا سفر۔۔

    zeenat-1

    زینت نے ایک ہفتے میں بائیک پر 500 میل کا سفر طے کیا۔ اس کا سفر اپنے آبائی علاقے سے شروع ہوا جو کشمیر کی پہاڑیوں تک چلا۔

    اپنے اس سفر کے بارے میں زینت بتاتی ہے، ’کئی بار میرا جسم تھک گیا، اس وقت میں نے خود سے کہا کہ مجھے اور آگے جانا ہے، اور آگے، ورنہ مجھے یہ سفر ادھورا چھوڑ کر واپس جانا پڑے گا‘۔

    zeenat-2

    ایک ایسے ملک میں جہاں ایک طرف تو صرف مردوں کی غلطیوں کا کفارہ ادا کرنے کے لیے عورتوں کو بھیڑ بکریوں کی طرح درندہ صفت لوگوں کے آگے ڈال دیا جاتا ہو، وہاں زینت اور اس جیسی خواتین کبھی بائیک چلا کر اور کبھی پہاڑوں کی چوٹیاں سر کر کے مردانگی کی اس خود ساختہ عظمت کو للکار رہی ہیں۔

    رنگوں سے نئے جہان تشکیل دینے والی مصورات کے فن پارے *

    وہ کہتی ہے، ’میرا خیال ہے بائیک چلانے سے صنف کا کوئی تعلق نہیں۔ صنف کسی کے مقاصد کا تعین نہیں کر سکتی‘۔

    زینت نے اپنے بھائی کے ساتھ بھی 200 میل کا سفر طے کیا۔ وہ اپنے بھائی کی مشکور ہیں کہ اس نے ہی انہیں بائیک چلانا سکھائی۔

    zeenat-3

    اس سفر کی وجہ سے زینت کو خصوصاً آن لائن تنقید کا بھی سامنا کرنا پڑا۔ لوگوں نے انہیں کہا کہ انہیں بائیک نہیں چلانی چاہیئے کیونکہ ایک عورت کے لیے یہ شرم کا مقام ہے۔ کچھ نے ان کی مسلمان ہونے پر انگلیاں اٹھائیں۔ لیکن کوئی چیز زینت کو اس کے مقصد سے روک نہیں سکی۔

    زینت کا کہنا ہے کہ یہ سفر درحقیقت انہوں نے اپنے والد کو خراج تحسین پیش کرنے کے لیے کیا۔ ان کا کہنا ہے کہ اپنی والد کی یادوں کے ساتھ یہ سفر ان کے روحانی اطمینان کا باعث بھی بنا۔