Tag: بااثر شخص

کراچی: غلط سمت سے جانے سے روکنے پر بااثر شخص نے ٹول پلازہ ملازم کو بے دریغ گولیاں مار دیں اور موقع سے فرار ہو گیا۔

تفصیلات کے مطابق گزشتہ روز لکی ٹول پلازہ پر ایک کار سوار نے ٹول پلازہ پر غلط سمت سے جانے سے روکے جانے پر ملازم کو گولیاں مار کر شدید زخمی کر دیا۔

واقعے کی سی سی ٹی وی فوٹیج اے آر وائی نیوز نے حاصل کر لی ہے، جس میں دیکھا جا سکتا ہے کہ ذرا سی تکرار کے بعد کار سوار نے گاڑی کے اندر سے پستول نکالا اور لڑکے کو بے دریغ گولیاں مار دیں۔

ویڈیو کے مطابق غلط سمت سے جانے سے روکنے پر بااثر شخص نے گاڑی کا دروازہ کھولا اورباہر آ کر گالم گلوچ کرنے لگا، ٹول پلازہ ملازم نے بھی جواب میں گالی دی، جس پر ملزم واپس گاڑی کی طرف گیا اور پستول نکال لی۔

اس دوران ٹول پلازہ کا دوسرا ملازم بھی پیچھے آیا اور بیچ بچاؤ کرانے کی کوشش کی، لیکن کار سوار نے فوری طور پر پستول چیمبر کی اور گولیاں چلا دیں، ملازم کے زخمی ہوتے ہی کار سوار فوراً گاڑی میں بیٹھا اور گاڑی بھگا دی۔

ایس ایس پی کیماڑی عارف اسلم راؤ کے مطابق یہ واقعہ گزشتہ روزپیش آیا تھا، جس کا مقدمہ درج کر لیا گیا ہے، گولی لگنے سے 25 سالہ ابرار زخمی ہوا تھا جسے اسپتال منتقل کیا گیا، جہاں اس کی حالت خطرے سے باہر ہے۔

ایس ایس پی کا کہنا ہے کہ ابتدائی معلومات کے مطابق گاڑی ارسلان بلوچ نامی شخص کے نام پر رجسٹرڈ ہے، اور واقعے سے متعلق مزید قانونی کارروائی کی جا رہی ہے۔