Tag: بابری مسجد

ایودھیا: بھارتی ہندو انتہاء پسندوں نے بابری مسجد کی جگہ رام مندر کو تعمیر کرنے کے لیے حکومت پر دباؤ بڑھانا شروع کردیا، ہندو انتہا پسند تنظیموں کے اجتماع کی وجہ سے علاقے میں خوف و ہراس پھیل گیا۔

بھارتی میڈیا کے مطابق بھارتی ہندو انتہاء پسند تنظیموں اور حکومتی جماعت ’بھارتیہ جنتا پارٹی‘ کی جانب سے ایودھیا میں ایک بڑے مذہبی اجتماع کا انعقاد کیا گیا، رپورٹ کے مطابق وشوا ہندوپریشد دھرم اور شیوسیناکےحامیوں نے شہر بھر میں ریلیاں نکالیں اور مسلمانوں کے خلاف کھل کر نعرے بازی بھی کی۔

بھارتی میڈیا کے مطابق وشو ہندو پریشد دھرم سبھا اور بی جے پی کی جانب سے منعقد ہونے والے جلسے میں مذہبی رہنماؤں نے خطاب کیا جس میں حکومت پر دباؤ ڈالا گیا کہ وہ رام مندر کی تعمیر شروع کرنے کے حوالے سے تاریخ کا اعلان کردے۔

یہ بھی پڑھیں: بابری مسجد کی شہادت میں ملوث ہندو انتہا پسند شہری نے اسلام قبول کرلیا

دھرم سبھا اجتماع میں ہندو انتہاء پسند تنظیم شیو سینا کے سربراہ اُدھو ٹھاکرے نے بھی شرکت کی اور  مسلمانوں کو دھمکی دی کہ ’اگر رام مندر کی تعمیر کسی نے روکنے کی کوشش کی تو اُس کو بھارت سے بے دخل کردیا جائے گا‘۔

اس تقریب میں آر ایس ایس، بی جے پی سمیت وشو ہندو پریشد دھرم سے تعلق رکھنے والے 60 لوگوں نے خطاب کیا، مقامی حکومت نے سیکیورٹی خدشات کے نام پر ایودھیا کو قلعے میں تبدیل کرتے ہوئے مسلمانوں کو گھروں سے بلا ضرورت نہ نکلنے کی ہدایت بھی جاری کی تھی۔

بھارتی ریاست مدھیہ پردیش کی سابق وزیر اعلیٰ اور حکومتی جماعت کی رہنما اوما بریگیڈ نے اجتماع سے خطاب کیا، انہوں نے انتہا پسندوں کو مسلمانوں کے خلاف خوب بھڑکاتے ہوئے یقین دہانی کروائی کہ حکومت ہندو مذہب کے لیے کسی بھی اقدام سے گریز نہیں کرے گی۔

یہ بھی پڑھیں: بابری مسجد کی شہادت کو25برس ہو گئے، کسی کو سزا نہ مل سکی

اُن کا کہنا تھا کہ ایودھیا میں اب صرف رام مندر کی ہی تعمیر ہوگی اس کے علاوہ اگر کسی نے کچھ کرنے کی کوشش بھی کی تو وہ خود ہی ذمہ دار ہوگا۔

تقریب میں خطاب کرتے ہوئے بابا رام دیو نے کہا کہ ’حکومت مسلمانوں سے زمین چھین کر اس پر ہر صورت مندر تعمیر کرے۔

دوسری جانب بھارت کے مسلمانوں رہنماؤں اور کانگریس نے ہندو انتہا پسندوں کے اجتماع پر تشویش کا اظہار کرتے ہوئے کہا ہے کہ ’مندر تعمیر کرنے کے دو ہی راستے ہیں، پہلا یہ کہ اس کا پارلیمنٹ سے قانون منظور کرایا جائے یا پھر سپریم کورٹ اس کی تعمیرات کا حکم دے،  اس طرح کے اجتماعات کا انعقاد امن و امان کی صورت حال خراب کرسکتا ہے‘۔

بھارتی میڈیا کا یہ بھی کہنا ہے کہ ’بی جے پی نے اس جلسے کا انعقاد آئندہ آنے والے الیکشن کی وجہ سے کیا کیونکہ مودی کی جماعت  ہندو مسلمان فسادات کروا کے ہی حکومت کرنے کی خواہش مند ہے‘۔

نئی دہلی: بابری مسجد کی شہادت میں ہندو نوجوان بلیر سنگھ نے 25 برس بعد خاموشی توڑتے ہوئے بتایا ہے کہ اُس نے سانحے کے چند روز بعد ہی اسلام قبول کرلیا تھا اور اب وہ بھارت کے مختلف علاقوں میں مساجد تعمیر کررہا ہے۔

تفصیلات کے مطابق بچیس برس قبل ہندو شدت پسندوں نے ایودھیا میں واقع بابری مسجد پر حملہ کیا تھا جس کے نتیجے میں اُسے شہید کر دیا گیا تھا، انتہا پسندوں کی قیادت کرنے اور مسلمانوں سے نفرت رکھنے والے جتھے کی قیادت کرنے والا نوجوان بلیر سنگھ تھا۔

بھارتی میڈیا میں 25 برس بعد منظر عام پر آنے والے ہندو نوجوان بلیر نے بتایا کہ وہ مسلمان ہوگیا اور اُس کا اسلامی نام محمد عامر ہے، وہ اپنے کیے پر نادم ہے اور وہ اب گناہ کا  کفارہ ادا کرنے کے لیے بھارت میں مساجد تعمیر کررہا ہے۔

عامر نے بھارتی میڈیا کو اپنے حالات سے آگاہ کرتے ہوئے کہا کہ ’میں راجپوت ہوں اور میری پیدائش پانی پت کے قریب ایک چھوٹے سے گاؤں میں ہوئی، 10 برس کی عمر میں مجھے ہندو انتہا پسند تنظیم (آر ایس ایس) میںٰ شمولیت کا موقع ملا اور پھر میں شیوسینا کا کارکن بن گیا جس کے بعد مسلمانوں سے نفرت ہوگئی جبکہ میں ایسا نہیں تھا‘۔

اُن کا کہنا تھا کہ ’شیوسینا کی تعلیمات پڑھ کر مجھے اندازہ ہوا کہ مسلمانوں نے ہمارے ملک پر قبضہ کیا ہوا ہے، یہ بات آہستہ آہستہ دماغ میں ایسی بیٹھی کہ دسمبر کے پہلے ہفتے میں جب ہم دوست ایودھیا گئے تو سوچ کر گئے تھے کہ ’کچھ کیے بغیر واپس نہیں آئیں گے‘۔

بھارتی شہری کا کہنا تھا کہ ’جب ہم ایودھیا پہنچے تو ہرطرف ہزاروں کی تعداد میں آر ایس ایس کے کارکنان نظر  آئے جو بابری مسجد کی طرف پیش قدمی کررہے تھے اور میں بھی ان لوگوں میں شامل تھا آگے آگے تھا جنہوں نے گبند کو نشانہ بنایا‘۔

محمد عامر کا کہنا تھا کہ ’جب ہم پانی پت واپس پہنچے تو ہیرو کی طرح استقبال ہوا مگر والد مجھ سے ناراض تھے اور انہوں نے گھر سے نکال دیا حتیٰ کہ وصیت بھی کی کہ آخری رسومات میں شرکت کی اجازت نہ دی جائے‘۔

بھارتی شہری کا کہنا تھا کہ ’گھر سے باہر نکلنے کے بعد مجھے ایک روز معلوم ہوا کہ بابری مسجد کی شہادت میں ملوث میرا قریبی دوست یوگندرا پال مسلمان ہوگیا، جس سے ملنے کے لیے پہنچا تو اُس نے بتایا کہ واقعے کے بعد دل بہت عجیب اور میں پاگل ہوگیا تھا، پھر میں نے اسلام قبول کیا۔

عامر نے بتایا کہ دوست نے مولانا کلیم صدیقی کے ہاتھ پر اسلام قبول کیا، وہ مجھے بھی اُن کے پاس لے گیا جہاں پہنچ کر میں نے بابری مسجد کو شہید کرنے کے گناہ کا اعتراف کیا، انہوں نے مجھے تسلی دی اور اسلام قبول کروایا۔

مولانا کلیم صدیقی نے ہمیں مشورہ دیا کہ تم نے علم نہ ہونے کی وجہ سے ایک مسجد کو نقصان پہنچایا، اپنے گناہ کا کفارہ ادا کرنے کے لیے اب تم لوگ مساجد کی تعمیر میں کسی بھی طریقے سے کردار ادا کرو۔

مسلمان ہونے والے بھارتی شہری کا کہنا تھا کہ ’اپنے گناہ کا کفارہ ادا کرنے کے لیے میں نے گزشتہ 20 سالوں میں متعدد مساجد کی تعمیر و مرمت کا کام کروایا، شمالی بھارت میں 90 سے زائد مساجد کی تعمیر میں حصہ ڈالا جبکہ میری خواہش ہے کہ مرنے سے قبل 100 مسجدیں تعمیر  میں حصہ لوں‘۔

عامر کا کہنا تھا کہ میں نے مسلمان ہونے کے بعد مولانا کلیم کے مدرسے سے قرآن مجید ترجمے سے پڑھا اور عربی زبان کی تعلیم حاصل کی، بعد ازاں اسی مدرسے میں معلم کے فرائض انجام دیے، سنہ 1993 میں میرے اہل خانہ نے مجھے معاف کردیا اور پھر میری اہلیہ بھی میرے پاس واپس آگئی ،کچھ عرصہ بعد اس نے بھی اسلام قبول کرلیا۔