Tag: بابر اعظم

سڈنی: آسٹریلوی کرکٹ ٹیم کے مایہ ناز بیٹسمین اسٹیو اسمتھ نے بابر اعظم کو اپنا پسندیدہ پاکستانی کرکٹر قرار دے دیا۔

تفصیلات کے مطابق آسٹریلوی بیٹسمین اسٹیو اسمتھ نے سماجی رابطے کی ویب سائٹ انسٹاگرام پر سوال جواب کے سیشن میں کہا کہ بابر اعظم کو بیٹنگ کرتا ہوا دیکھنا پسند کرتا ہوں۔

واضح رہے کہ رواں سال جون میں بھی اسٹیو اسمتھ نے بابر اعظم کی بیٹنگ کی تعریف کرتے ہوئے کہا تھا کہ بابر اچھے کھلاڑی ہیں ان کے پاس بیٹنگ کرتے وقت بہت وقت ہوتا ہے۔

اسٹیو اسمتھ کا کہنا تھا کہ بھارت کے خلاف سیریز میں اچھی کارکردگی کے لیے پرامید ہیں، گزشتہ چند روز میں نیٹ پریکٹس کے دوران خامیوں پر قابو پایا ہے۔

آسٹریلوی کرکٹر کا کہنا تھا کہ قرنطینہ کا وقت میرے جیسے بیٹسمینوں کے لیے فائدہ مند ہے، ہم سیریز سے قبل نیٹ میں زیادہ وقت گزارتے ہوئے کووید پروٹوکول کی وجہ سے چھوٹے گروپس میں ٹریننگ کررہے ہیں۔

یاد رہے کہ بابر اعظم آئی سی سی ٹیسٹ، ون ڈے اور ٹی ٹوینٹی رینکنگ میں ٹاپ فائیو میں موجود ہیں، بابر ٹی ٹوینٹی میں دوسری، ون ڈے میں تیسری اور ٹیسٹ میں پانچویں پوزیشن پر براجمان ہیں۔

راولپنڈی: قومی ٹیم کے سابق فاسٹ بولر شعیب اختر کا کہنا ہے کہ بابر اعظم کو اپنے فیصلے خود لینے پڑیں گے۔

تفصیلات کے مطابق قومی ٹیم کے سابق فاسٹ بولر شعیب اختر کا کہنا ہے کہ پی سی بی بابر اعظم کو کم از کم دو سال تک کپتان برقرار رکھے، بابر اعظم کو ٹیسٹ میں مضبوط مائنڈ سیٹ کے ساتھ کپتانی کرنی ہوگی۔

انہوں نے کہا کہ بابر اعظم اگر پرانے مائنڈ سیٹ پر چلتے رہے تو کپتان تبدیل کرنے کا کوئی فائدہ نہیں ہوگا، سرفراز احمد اور محمد حفیظ کو جب کپتانی کی سمجھ آئی تو دونوں کو باہر کردیا گیا۔

شعیب اختر نے سابق ٹیسٹ کپتان اظہر علی کو مشورہ دیا کہ اظہر علی کو چاہئے کہ وہ طویل فارمیٹ میں زیادہ سے زیادہ رنز کریں۔

سابق اسپیڈ اسٹار نے کہا کہ میں چاہتا ہوں مصباح الحق پی سی بی کے ساتھ اپنی مدت پوری کریں، بابر اعظم کو بھی اپنے فیصلے خود لینے ہوں گے۔

شعیب اختر کا کہنا تھا کہ اگر اب آپ نے بابر اعظم کو کپتان بنایا ہے تو پھر انہیں کم از کم دو سال تک کپتان برقرار رہنے دیں، ایسا نہیں ہونا چاہئے کہ آپ چھ ماہ میں بابر اعظم کو ناپسند کرنے لگیں اور پھر اچانک ان کی شکل، انداز سب کچھ آپ کو برا لگنے لگے۔

واضح رہے کہ گزشتہ دنوں پاکستان کرکٹ بورڈ کی جانب سے بابر اعظم کو ون ڈے اور ٹی 20 کے بعد ٹیسٹ ٹیم کا کپتان نامزد کیا گیا تھا۔

کراچی: قومی کرکٹ ٹیم کے سابق کپتان راشد لطیف نے کپتانی کے لیے بابر اعظم اور اظہر علی کا متبادل نام بتا دیا۔

تفصیلات کے مطابق قومی کرکٹ ٹیم کے سابق کپتان اور وکٹ کیپر راشد لطیف نے کہا کہ پی سی بی کو سرفراز احمد کو کپتانی سے ہٹانے کے بعد محمد حفیظ کو تینوں فارمیٹس کا کپتان بنانا چاہیے تھا۔

سابق کپتان کی جانب سے یہ بیان قومی کرکٹ ٹیم کی دوسرے ٹی ٹوینٹی میچ میں شکست کے بعد سامنے آیا۔

راشد لطیف نے کہا کہ سرفراز کے بعد محمد حفیظ کو کپتان مقرر کرنا چاہیے تھا،مختلف فارمیٹس کے لیے دو کپتان آئے، اگرچہ اظہر علی اور بابر اعظم با صلاحیت کھلاڑی ہیں لیکن انہوں نے اب تک خود کو بطور کپتان ثابت نہیں کیا، یہ بابر اور یہاں تک اظہر کے لیے بھی مشکل ہے۔

محمد رضوان کو کرکٹ ٹیم کا کپتان بنانے کی تیاریاں

اس سے قبل گزشتہ ہفتے 30 اگست کو پاکستان کرکٹ ٹیم کے سابق کپتان راشد لطیف کا کہنا تھا کہ وکٹ کیپر بیٹسمین محمد رضوان کو مستقبل کا کپتان بنایا جاسکتا ہے، رضوان میں قیادت کی صلاحیت موجود ہے۔

راشد لطیف کا کہنا تھا کہ رضوان نے پاکستان اے ٹیم کی بھی قیادت کی ہے، اگر ٹیم مینجمنٹ اسے ہر فارمیٹ میں کھلا رہی ہے تو شاید وہ انہیں مستقبل میں ضرورت پڑنے پر قیادت سونپنے کے بارے میں سوچ رہے ہوں گے۔