Tag: بابر اعوان

اسلام آباد: وزیر اعظم عمران خان نے کہا ہے کہ وہ ملکی ادارے اتنے مضبوط کر دیں گے جتنے پہلے کبھی نہیں ہوئے۔

یہ بات انھوں نے معروف ماہر قانون بابر اعوان کے ساتھ ملاقات میں گفتگو کے دوران کہی، اے آر وائی نیوز کے مطابق وزیر اعظم ہاؤس میں ہونے والی ملاقات میں اہم ملکی امور پر تبادلہ خیال کیا گیا۔

بابر اعوان نے وزیر اعظم عمران خان کو مختلف آئینی، قانونی اور سیاسی امور پر بریفنگ بھی دی، بابر اعوان نے کہا کہ حکومت نے معاشی حالات میں بہتری کے لیے جو اقدامات اٹھائے ہیں وہ بر وقت ہیں، قومی اور عالمی سطح پر معیشت کے مثبت اعشاریے بھی حوصلہ افزا ہیں، حالات میں بہتری کے ثمرات عوام تک جلد پہنچ جائیں گے۔

ملاقات میں وزیر اعظم عمران خان نے حکومتی ترجیحات پر گفتگو کی، انھوں نے کہا کہ وہ ادارے اتنے مضبوط کر دیں گے جتنے پہلے کبھی نہیں ہوئے، ٹرانسپیرنسی، احتساب، شفافیت اور ریفارمز ان کی سب سے بڑی ترجیحات ہیں۔

وزیراعظم عمران خان آج ‘احساس کفالت پروگرام’ کا آغاز کریں گے

اداروں سے متعلق عمران خان کا کہنا تھا کہ اداروں کا نام ریاست بھی ہے اور جمہوریت بھی، بڑے کرپٹ جب ملک لوٹیں گے تو پکڑے بھی جائیں گے، احتساب کے ساتھ ساتھ عوامی فلاح و بہبود بھی حکومت کی ترجیح ہے، جس کے لیے احساس پروگرام لایا گیا، اس کے تحت نچلے طبقے کو اوپر اٹھائیں گے۔

خیال رہے کہ آج وزیر اعظم عمران خان احساس کفالت پروگرام کا افتتاح کریں گے، پروگرام کے تحت بیوہ خواتین سمیت نادارافراد کی مالی امداد اور انتہائی مستحق افراد کو 2 ہزار روپے ماہانہ رقم دی جائے گی۔

اسلام آباد: وزیر اعظم عمران خان نے نیب قوانین میں اصلاحات کا فیصلہ کیا ہے، اس سلسلے میں قانونی ٹیم کے ساتھ مشاورت مکمل کر لی گئی ہے۔

تفصیلات کے مطابق وزیر اعظم عمران خان نے احتساب کےعمل میں تبدیلی کا فیصلہ کیا ہے، نیب قوانین میں اصلاحات سے متعلق مشاورت بھی مکمل کر لی گئی ہے، ذرایع کا کہنا ہے کہ نیب قوانین میں اہم تبدیلیاں لا کر انھیں مزید بہتر بنایا جائے گا۔

ذرایع کے مطابق یہ فیصلہ گورننس کی بہتری اور کاروباری سرگرمیوں کے فروغ کے لیے کیا گیا ہے، وزیر اعظم عمران خان کی ہدایت پر قانونی ٹیم نے اس پر کام بھی شروع کر دیا ہے۔

سابق وزیر قانون بابر اعوان نے سوشل میڈیا پر اپنے بیان میں کہا ہے کہ ملک کے احتسابی نظام کے قانون میں ریفارمز لائی جا رہی ہیں، وزیر اعظم عمران خان سے اس سلسلے میں اہم ملاقات ہوئی، نیب قوانین میں قابل ذکر تبدیلیاں لاکر مزید بہتر بنایا جا رہا ہے، ان اصلاحات سے نظام حکومت میں بہتری آئے گی اور کاروباری سرگرمیوں کو فروغ ملے گا۔

خیال رہے کہ پی ٹی آئی کی حکومت نے پہلے ہی نیب قوانین میں ترامیم کا عندیہ دیا تھا، اکتوبر میں وفاقی کابینہ بھی نیب ترمیمی آرڈیننس کی منظوری دے چکی ہے۔ اس کا تعلق 5 کروڑ سے زائد کی کرپشن کرنے والے ملزم کو انکوائری، انویسٹی گیشن یا ٹرائل کے دوران بھی سی کلاس میں رکھے جانے سے تھا، سی کلاس جیل سے متعلق ترمیمی بل کے سب سیکشن 10 میں نئی شق بھی شامل کی گئی۔

اسلام آباد: وزیر اعظم عمران خان نے کہا ہے کہ این آر او مانگنے والے احمقوں کی جنت میں رہتے ہیں، قانون کی حکمرانی سے کسی صورت پیچھے نہیں ہٹوں گا۔

تفصیلات کے مطابق معروف قانون دان بابر اعوان سے ملاقات میں وزیر اعظم عمران خان نے دو ٹوک پیغام دیا ہے کہ کرپشن دیمک ہے، احتساب ہمیشہ پہلی ترجیح رہے گی، رول آف لا سے کسی صورت پیچھے نہیں ہٹوں گا۔

دریں اثنا، وزیر اعظم عمران خان نے ڈاکٹر بابر اعوان سے ملاقات کے دوران نواز شریف کے ای سی ایل کیس سمیت آئینی، قانونی و سیاسی امور پر مشاورت کی۔ وزیر اعظم نے کہا کہ ادارے پاکستان کو مضبوط رکھنے کے لیے ایک پیج پر ہیں، عوامی ریلیف کے لیے اس ماہ بڑے اقدامات سامنے آئیں گے، اداروں کی تعمیر نو اور مضبوطی کے بغیر کام نہیں چلے گا۔

وزیراعظم پاکستان نے کہا کہ ملک میں انصاف کا بول بالا چاہتا ہوں، میڈیا قوم کی تعلیم و تربیت کا فرض ادا کرے۔

دوسری جانب بابر اعوان نے کہا کہ اصلاحاتی ایجنڈے کے تحت ادارے مضبوط ہو رہے ہیں، وزیراعظم کی انتھک کوششوں، اکنامک ریفارمز سے مثبت تبدیلیاں آ رہی ہیں۔

تحریک انصاف کے رہنما نے کہا کہ اکنامک ریفارمز کے ثمرات بہت جلد غریب عوام تک پہنچیں گے، معیشت کی درستگی کے لیے بروقت اقدامات کو پذیرائی مل رہی ہے، وقت ثابت کرے گا کٹھن فیصلے قوم کے مفاد میں تھے۔ انہوں نے مزید کہا کہ احساس پروگرام کے تحت غریب عوام تک ریلیف پہنچے گا۔