پشاور: سنی اتحاد کونسل کے بابر سلیم سواتی اسپیکر خیبرپختونخوا اسمبلی منتخب ہوگئے۔
تفصیلات کے مطابق خیبر پختونخوا اسمبلی میں اسپیکر اور ڈپٹی اسپیکر کیلئے ووٹنگ کی گئی جہاں اسپیکر خیبرپختونخوا اسمبلی کے الیکشن کے لیے 106 ووٹ ڈالے گئے۔
اسپیکر مشتاق غنی نے بتایا کہ بابر سلیم سواتی نے 89 اور احسان اللہ میاں خیل نے 17 ووٹ لیے، جس کے بعد بابر سلیم سواتی نے اسپیکر کا حلف اٹھا لیا۔
بابر سلیم سواتی نے اسپیکر خیبرپختونخوا اسمبلی کے عہدے کا حلف اٹھانے کے بعد کہا کہ بانی پی ٹی آئی، علی امین گنڈاپور، لیڈر شپ اور ہاؤس کا مشکور ہوں۔
واضح رہے کہ خیبر پختونخوا اسپیکر کے عہدے کیلئے بابر سلیم سواتی اور احسان اللہ میاں خیل مدمقابل تھے جبکہ ڈپٹی اسپیکر کے عہدے کیلئے ثریا بی بی اور ارباب وسیم کے درمیان مقابلہ تھا۔
