پشاور(31 اگست 2025): خیبر پختونخوا میں پی ڈی ایم اے نے بارشوں اور سیلاب سے ہونے والے نقصانات کی ابتدائی رپورٹ جاری کی ہے۔
تفصیلات کے مطابق خیبر پختونخوا میں پی ڈی ایم اے (پختونخوا ڈیزاسٹر مینجمنٹ اتھارٹی) نے 30 اگست سے جاری بارشوں اور سیلاب سے ہونے والے جانی و مالی نقصان کی ابتدائی رپورٹ جاری کی ہے۔
پی ڈی ایم اے کے مطابق 30 اگست سے جاری بارشوں کے باعث صوبے بھر میں جانی و مالی نقصان کی تصدیق کی ہے، بارشوں سے مختلف حادثات میں 5 افراد جاں بحق ہوئے ہیں۔
پی ڈی ایم اے ترجمان کا کہنا ہے کہ خیبرپختونخوا میں بارشوں اور حادثات میں 5 افراد زخمی بھی ہوئے، بارشوں اور اربن فلڈنگ کے باعث 6 گھروں کو نقصان پہنچا ہے، حادثات پشاور، جنوبی وزیرستان، خیبر اور ایبٹ آباد میں پیش آئے، متاثرہ اضلاع کی ضلعی انتظامیہ کو امدادی سرگرمیاں تیز کرنے کی ہدایت کی ہے، متاثرہ اضلاع کی انتظامیہ کو امدادی سرگرمیاں تیز کرنے کی ہدایت جاری کی ہے۔
واضح رہے کہ پشاور میں ہوئی بارش سے نواحی علاقوں کے نالے بھپر گئے، ندی نالوں کا پانی رہائشی علاقوں میں داخل ہوگیا، کشتیوں کے ذریعے 300 لوگوں کو نکالا گیا، بڈھنی نالہ میں پانی خطرے کے نشان تک پہنچنے پر قریبی رہائشیوں نے سامان محفوظ مقام پر منتقل کیا گیا ہے۔
وزیر اعلی خیبر پختونخوا علی امین گنڈاپور نے تیز بارشوں کی وجہ سے ضلع پشاور اور خیبر کے مختلف علاقوں میں اربن فلڈنگ کے پیش نظر متعلقہ ضلعی انتظامیہ، پی ڈی ایم اے اور ریسکیو کے اعلی حکام کو فوری طور پر متاثرہ علاقوں میں پہنچنے اور ریسکیو آپریشنز کی بذات خود نگرانی کرنے کی ہدایت کی۔
