بھارت کی مختلف ریاستوں میں مون سون بارشوں کا سلسلہ جاری ہے، بادل پھٹنے، لینڈ سلائڈنگ، سیلاب اور نشیبی علاقے زیر آب آنے سے مشکلات میں اضافہ ہوگیا ہے۔ ایسے میں محکمہ موسمیات نے مزید بارشوں کی پیش گوئی کردی ہے۔
بھارتی میڈیا رپورٹس کے مطابق دہلی میں بھی بارش کا امکان ظاہر کیا گیا ہے۔ محکمہ موسمیات کا کہنا ہے کہ دہلی میں 16 اگست سے 20 اگست تک بارش کا امکان ہے۔
رپورٹس کے مطابق محکمہ موسمیات نے اگلے سات دنوں کے اندر اتر پردیش، اتراکھنڈ، مہاراشٹر، گوا، کونکن، کرناٹک، تلنگانہ، پنجاب، ہریانہ، مدھیہ پردیش، تمل ناڈو، کیرالہ، ساحلی آندھرا پردیش، رائل سیما، ہماچل پردیش، بہار، مغربی بنگال، اوڈیشہ، سکم چھتیس گڑھ، جھارکھنڈ، اروناچل پردیش، تریپورہ، ناگالینڈ، میزورم اور میگھالیہ میں موسلا دھار بارش کی پیش گوئی کی ہے۔
بھارت کے محکمہ موسمیات کی طرف سے اگلے چار دن کے لئے آرینج اور یلو الرٹ جاری کیا گیا ہے۔ اس دوران تیز بارش، آندھی طوفان اور بجلی گرنے کا بھی امکان ہے۔
اس کے علاوہ کونکن، گوا میں 16 اور 18 اگست کے دوران الگ الگ مقامات پر موسلا دھار بارش کا امکان ظاہر کیا گیا ہے، اس دوران مدھیہ پردیش میں بھی بارش ہونے کا امکان ظاہر کیا گیا ہے۔
رپورٹس کے مطابق اگلے سات دنوں میں مہاراشٹر میں الگ الگ مقامات پر شدید بارش ہو سکتی ہے جبکہ 16 سے 19 اگست کے درمیان مشرقی راجستھان اور اتراکھنڈ میں الگ الگ مقامات پر بارش ہونے کا امکان ہے۔
رپورٹس کے مطابق 19 اگست کو جھارکھنڈ، 16 اور 17 سے 21 اگست کے دوران اوڈیشہ، مدھیہ پردیش، چھتیس گڑھ میں کچھ مقامات پر تیز بارش کا امکان ہے۔ ان علاقوں میں کئی جگہوں پر گرج چمک اور بجلی گرنے کا بھی خدشہ ہے۔
سات دنوں کے دوران ساحلی کرناٹک اور تلنگانہ میں کچھ مقامات پر شدید بارش ہو سکتی ہے۔ کیرالہ اور ماہے، ساحلی آندھرا پردیش اور ینم میں کچھ مقامات پر تیز بارش ہوسکتی ہے۔
سعودی عرب میں شدید بارشوں کا الرٹ، کونسے علاقے متاثر ہوں گے ؟
19 اگست تک جنوبی جنزیرہ نما ہندوستان میں تیز رفتار ہوائیں چلنے کا امکان ہے، اگلے پانچ دنوں کے دوران رائل سیما، تمل ناڈو اور تلنگانہ میں گرج چمک اور بجلی کے ساتھ موسلا دھار بارش کا امکان ہے۔
