ہانگ کانگ میں ہونے والی شدید بارشوں کے باعث نظام زندگی درہم برہم ہوگیا ہے، جبکہ شدید بارشوں نے 140سالہ ریکارڈ توڑ دیا ہے۔
بین الاقوامی خبر رساں ادارے کی رپورٹ کے مطابق سیلاب کی وجہ سے سڑکیں بہہ گئی ہیں اور ٹرینوں سمیت ٹرانسپورٹ کا نظام بھی درہم برہم ہوچکا ہے، شدید بارشوں سے رہائشی علاقے زیر آب آچکے ہیں۔
محکمہ موسمیات کے مطابق ہانگ کانگ میں جمعرات کو ایک گھنٹے کے دوران 70 ملی میٹر بارش ریکارڈ کی گئی جس نے تقریباً 140 سالوں کا ریکارڈ توڑا ہے۔ مقامی میڈیا کا اس حوالے سے کہنا ہے کہ ہانگ کانگ میں سیلابی صورتحال کی وجہ سے اسکول، دفاتر اور کاروبار کو بھی بند کردیا گیا ہے۔
انتظامیہ کے مطابق بارش سے زیادہ متاثر ہونے والے مختلف علاقوں میں پھنسے ہوئے لوگوں کو نکالنے کے لئے ریسکیو آپریشن کیا جارہا ہے، لینڈ سلائیڈنگ سے زمینی راستے بھی منقطع ہوگئے ہیں۔
دوسری جانب ترکیہ کے شمال مغربی علاقوں میں شدید بارشیں اور سیلاب نے تباہی مچا دی ہے، مختلف حادثات میں 7 افراد ہلاک اور 31 زخمی ہو چکے ہیں۔
استنبول میں ایک ماہ کی متوقع بارشیں چھ گھنٹے میں برس گئیں، جس سے رہائشی علاقے پانی میں ڈوب گئے، اور شہر کی سڑکیں دریا بن گئیں، گاڑیاں ریلوں میں بہہ گئیں، ایک جگہ سیلابی ریلا کنٹینرز تک بہا لے گیا، اور میٹرو اسٹیشن میں بھی پانی داخل ہو گیا، بارشوں سے شدید متاثرہ علاقوں مں امدادی سرگرمیاں بھی جاری ہیں۔
یونان اور بلغاریہ میں بارشوں اور سیلاب سے حادثات کے نتیجے میں 4 افراد ہلاک ہو گئے ہیں، دوسری جانب برازیل میں بھی سیلاب سے پر سو تباہی پھیلی نظر آ رہی ہے، جہاں مخلتف حادثات میں 31 افراد ہلاک ہو گئے ہیں، ریو گرانڈے ریاست کا بڑا حصہ ملیا میٹ ہو گیا، اور سینکڑوں مکانات تباہ ہو گئے، لاجیڈو اور روکاسیلز شہر بھی پانی میں ڈوب گئے ہیں۔
موسمیاتی تبدیلیوں کے اثرات دنیا بھر میں سامنے آ رہے ہیں، امریکا، برطانیہ، آسٹریا اور نیدرلینڈز میں گرمی نے دیرے ڈال لیے ہیں، کئی ملکوں میں گرمی نے اگلے پچھلے سب ریکارڈ تور دیے، انسان، چرند پرند سب ہی گرمی سے ہلکان ہیں، دوسری جانب اسپین میں بارشوں نے تباہی مچا دی ہے، جہاں نظامِ زندگی درہم برہم ہو کر رہ گیا ہے، اور یونان میں جنگلاتی آگ بھی تاحال قابو میں نہیں آ سکی ہے۔
