ARYNews.tv | Urdu – Har Lamha Bakhabar

Tag: بارش

  • کراچی میں بارش کب ہوگی ؟ نئی پیش گوئی سامنے آگئی

    کراچی میں بارش کب ہوگی ؟ نئی پیش گوئی سامنے آگئی

    کراچی : محکمہ موسمیات نے کراچی میں بارش کے حوالے سے نئی پیش گوئی کردی۔

    تفصیلات کے مطابق ملک کے مختلف شہروں میں بادل برسنے سے جاتی سردی لوٹ آئی ہے۔

    محکمہ موسمیات نے آج کراچی میں ہلکی بارش کی پیشگوئی کرتے ہوئے کہا کراچی میں مطلع ابر آلود رہنے کا امکان ہے اور آئندہ چند روز تک پارہ پینتیس ڈگری سینٹی گریڈ تک جا سکتا ہے۔

    لاہور، جہلم، جھنگ، ساہیوال، شیخوپورہ، جڑنوالہ، ڈسکہ اور محسن وال میں وقفے وقفے سے بارش کے ساتھ ٹھنڈی ہوائیں چلنے لگیں۔

    اسلام آباد اور راولپنڈی میں کبھی ہلکی کبھی تیز بارش سے موسم سہانا ہوگیا ہے۔

    کوئٹہ اور پنجگور سمیت بلوچستان کے بیشتر علاقوں میں وقفے وقفے سے بارش کا سلسلہ جاری ہے۔

    نتھیا گلی، ایبٹ آباد اور مانسہرہ سمیت بالائی علاقوں میں برفباری سے ہرسو سفیدی چھاگئی۔

    محکمہ موسمیات نے آج خیبر پختونخوا، بلوچستان ،پنجاب،گلگت بلتستان اور کشمیرمیں بارش اور پہاڑوں پرمزید برف باری کی پیش گوئی کی ہے۔

    لاہور میں گزشتہ روز شروع ہونے والی بارش وقفے وقفے سے جاری ہے، بارش کے باعث موسم سرد ہوگیا ہے، محکمہ موسمیات کے مطابق آج مزید بارش کا امکان ہے جبکہ سکھرسمیت گردو نواح میں ہلکی بارش سے جاتی سردی لوٹ آئی۔

  • چیمپئنز ٹرافی: افغانستان اور آسٹریلیا کا آج میچ بارش کی نذر ہوا تو کیا ہوگا؟

    چیمپئنز ٹرافی: افغانستان اور آسٹریلیا کا آج میچ بارش کی نذر ہوا تو کیا ہوگا؟

    چیمپئنز ٹرافی میں آج افغانستان اور آسٹریلیا کے درمیان ڈو آر ڈائی میچ کھیلا جائے گا میچ کے بارش سے متاثر ہونے کا خدشہ ظاہر کیا جا رہا ہے۔

    آئی سی سی چیمپئنز ٹرافی میں گروپ بی کا اہم میچ آج قذافی اسٹیڈیم لاہور میں افغانستان اور آسٹریلیا کے درمیان کھیلا جا رہا ہے۔ آسٹریلیا کے تین اور افغانستان کے دو پوائنٹس ہیں۔ افغان ٹیم جیتی تو فائنل کا ٹکٹ کٹوا لے گی اگر ہاری تو سیمی فائنل کی دوڑ سے باہر ہو جائے گی۔

    تاہم آج کا میچ بارش سے متاثر ہونے کا خدشہ بھی ظاہر کیا جا رہا ہے۔ اگر میچ بارش کے باعث نہ ہوسکا تو دونوں ٹیموں کو ایک، ایک پوائنٹ مل جائے گا اور گروپ بی میں سیمی فائنل میں جانے کی جنگ انتہائی دلچسپ مرحلے میں داخل ہو جائے گی۔

    آج کا میچ اگر نہ کھیلا گیا ایک ایک پوائنٹ ملنے سے آسٹریلیا چار پوائنٹ کے ساتھ سیمی فائنل کا ٹکٹ کٹوا لے گا۔ تاہم افغانستان کے تین پوائنٹ کے ساتھ اس دوڑ میں برقرار رہنے کے معمولی سے امکانات برقرار رہیں گے، لیکن اس کا انحصار جنوبی افریقہ اور آسٹریلیا کے اگلے گروپ میچ کے نتیجے پر ہوگا۔

    جنوبی افریقہ کے بھی تین پوائنٹ ہیں تاہم اس کا رن ریٹ 2.14 جب کہ افغانستان کا منفی 0.305 ہے۔ اس صورت میں آسٹریلیا سے بڑی شکست کی صورت میں رن ریٹ گرنے کی صورت میں ہی افغانستان کا سیمی فائنل کھیلنے کا چانس ہوگا، بصورت دیگر نتیجہ کچھ بھی نکلے کینگروز کے ساتھ پروٹیز بھی سیمی فائنل کے لیے کوالیفائی کر جائیں گے۔

    اگر آج کے میچ کے حوالے سے افغانستان اور آسٹریلیا کے باہمی میچوں کا تقابل کریں تو کینگروز ناقابل شکست ہیں۔ چاروں میچوں میں آسٹریلیا نے افغان ٹیم کو چت کیا ہے۔تاہم افغانستان نے دو روز قبل انگلینڈ کو شکست دی ہے اور اس کے حوصلے بلند ہیں۔

    واضح رہے کہ گروپ اے سے نیوزی لینڈ اور بھارت پہلے ہی سیمی فائنل کے لیے کوالیفائی کر چکی ہیں۔ میزبان اور دفاعی چیمپئن پاکستان سمیت انگلینڈ اور بنگلہ دیش میگا ایونٹ سے باہر ہو چکے ہیں۔

    چیمپئنز ٹرافی کا ایک سیمی فائنل دبئی اور دوسرا لاہور میں بالترتیب 5 اور 6 مارچ کو کھیلا جائے گا۔ بھارت اگر فائنل میں پہنچا تو پھر 9 مارچ کو فائنل میچ دبئی بصورت دیگر لاہور میں کھیلا جائے گا۔

  • چیمپئنز ٹرافی: آسٹریلیا اور جنوبی افریقا کا میچ بارش کے باعث منسوخ

    چیمپئنز ٹرافی: آسٹریلیا اور جنوبی افریقا کا میچ بارش کے باعث منسوخ

    راولپنڈی: چیمپئنز ٹرافی میں جنوبی افریقا اور آسٹریلیا کا میچ بارش کے باعث منسوخ کردیا گیا۔

    راولپنڈی میں بارش کے باعث جنوبی افریقا اور آسٹریلیا کے میچ کا ٹاس بھی ممکن نہیں ہوسکا، آسٹریلیا، جنوبی افریقا کی ٹیموں کو ایک، ایک پوائنٹ دے دیا گیا ہے۔

    میچ منسوخ ہونے کے بعد دونوں ٹیموں کے تین تین پوائنٹس ہوگئے۔

    گروپ بی میں جنوبی افریقا پہلے اور آسٹریلیا دوسرے نمبر پر موجود ہے، انگلینڈ کا تیسرا اور افغانستان کا چوتھا نمبر ہے۔

    اس وقت بھی جڑواں شہروں اسلام آباد اور راولپنڈی میں وقفے وقفے سے بارش کا سلسلہ جاری ہے اور محکمہ موسمیات نے آج دن بھر بارش کی پیشگوئی کر رکھی ہے۔

    چیمپئنز ٹرافی میں گروپ بی میں شامل مذکورہ دونوں ٹیموں نے ایک، ایک میچ جیت رکھا ہے۔ آسٹریلیا نے روایتی حریف انگلینڈ جب کہ جنوبی افریقہ نے افغانستان کو شکست دی۔ آج جو بھی ٹیم فتح حاصل کرے گی وہ سیمی فائنل میں رسائی کے امکانات کو قوی کرے گی۔

    واضح رہے کہ میگا ایونٹ کے گروپ ون سے بھارت اور نیوزی لینڈ نے سیمی فائنل کے لیے کوالیفائی کر لیا ہے۔ دفاعی چیمپئن ومیزبان پاکستان اور بنگلہ دیش دونوں ایونٹ سے باہر ہوچکے ہیں۔

    اب پاکستان اور بنگلہ دیش کے درمیان 27 فروری کو لاہور میں کھیلا جانے والا میچ محض ایک رسمی کارروائی کی حیثیت رکھتا ہے۔

    میگا ایونٹ کے سیمی فائنل 5 اور 6 مارچ کو دبئی اور لاہور میں کھیلے جائیں گے۔ اگر بھارت فائنل کے لیے کوالیفائی کرتا ہے تو یہ میچ دبئی بصورت دیگر فائنل میچ 9 مارچ کو قذافی اسٹیڈیم لاہور میں کھیلا جائے گا۔

  • کراچی والے تیار ہوجائیں : بارش سے متعلق بڑی پیش گوئی سامنے آگئی

    کراچی والے تیار ہوجائیں : بارش سے متعلق بڑی پیش گوئی سامنے آگئی

    کراچی : محکمہ موسمیات نے کراچی میں بارش کے حوالے سے بڑی پیش گوئی کردی، بارش برسانے والا سسٹم دو مارچ تک برقرار رہے گا۔

    تفصیلات کے مطابق ملک میں بارشوں اور برفباری کا نیا سلسلہ انٹری دے چکا ہے، جو سات دن تک جاری رہے گا، بارش برسانے والا سسٹم بیشتر شہروں پر اثر انداز ہوگا ۔

    محکمہ موسمیات نے کراچی میں آج ہلکی بارش کا امکان ظاہر کرتے ہوئے کہا کہ شہر میں آج موسم ابرآلود رہے گا۔

    موسم کا حال بتانے والوں کا کہنا تھا کہ شمالی اور پہاڑی علاقوں میں گرج چمک کے ساتھ بارش اور برفباری ہوگی، جبکہ پنجاب، خیبرپختونخوا اور اسلام آباد میں ژالہ باری کا بھی امکان ہے۔

    بارش اور برفباری سے مری، گلیات، ناران، کاغان اور دیگر پہاڑی علاقوں میں سڑکیں بند اور پھسلن کا خطرہ ہے۔

    کشمیر اور گلگت بلتستان میں پچیس فروری سے دو مارچ تک شدید بارشوں اور برف باری کا امکان ہے ، محکمہ موسمیات کے مطابق بلوچستان اور سندھ کے کچھ حصوں میں چھبیس فروری تک بادل برس سکتے ہیں ۔

    لاہور میں صبح سویرے بارش کے بعد سردی کی شدت میں اضافہ ہوگیا ہے جبکہ آئندہ 24 گھنٹے کے دوران شہر میں ہلکی بارش کا امکان ہے۔

    پشاور اور گرد و نواح میں ہلکی بارش اور ٹھنڈی ہواؤں کا سلسلہ جاری ہے، جس سے موسم خوشگوار اور سرد ہو گیا ہے۔۔ محکمہ موسمیات کے مطابق بارشوں کا سلسلہ دو مارچ تک جاری رہنے کا امکان ہے۔

    بلوچستان میں بھی مغربی ہواؤں کا سسٹم داخل ہونے سے کوئٹہ اور چمن میں موسلادھار بارش وقفے وقفے سے جاری ہے۔

  • ملک بھرمیں آئندہ ہفتے سے بارشوں کا نیا اسپیل داخل ہوگا

    ملک بھرمیں آئندہ ہفتے سے بارشوں کا نیا اسپیل داخل ہوگا

    ملک بھر میں آئندہ ہفتے سے بارشوں کا نیا اسپیل داخل ہونے کا امکان ہے، محکمہ موسمیات نے بتایا کہ 24فروری سے مغربی ہوا کاسسٹم ملک میں داخل ہو گا۔

    تفصیلات کے مطابق محکمہ موسمیات کا کہنا ہے کہ پنجاب، خیبر پختونخوا اور اسلام آباد میں ژالہ باری کا امکان ہے، شمالی اور پہاڑی علاقوں میں بارش اور برفباری ہوگی، گلگت بلتستان، کشمیر میں 25فروری سے 2مارچ تک بارش اور برفباری کا امکان ہے۔

    کےپی میں 24فروری سے یکم مارچ تک بارش اور بالائی علاقوں میں برفباری متوقع ہے، پنجاب اور اسلام آباد میں 25فروری سے یکم مارچ تک گرج چمک کےساتھ بارش کا امکان ظاہر کیا گیا ہے۔

    محکمہ موسمیات نے بتایا کہ مری اور گلیات میں برفباری متوقع ہے، 24 سے 26فروری تک کوئٹہ، زیارت اور قریبی علاقوں میں بارش اور برفباری ہوسکتی ہے۔

    ملک کے مختلف شہروں میں بارش سے خشک سالی کا خطرہ ٹل گیا، سردی میں اضافہ

    25 سے26 فروری تک لاڑکانہ، سکھر اور ملحقہ علاقوں میں ہلکی بارش کا امکان ظاہر کیا گیا ہے، مری، گلیات، ناران، کاغان اور دیگر پہاڑی علاقوں میں سڑکیں بند ہیں، پھسلن کا خطرہ ہے۔

    محکمہ موسمیات کا مزید کہنا تھا کہ خیبر پختونخوا اور کشمیر میں فلیش فلڈ کا امکان ہے، پہاڑی علاقوں میں لینڈ سلائیڈنگ کا خدشہ ہے۔

  • ملک کے مختلف شہروں میں بارش ، جاتی سردی لوٹ آئی

    ملک کے مختلف شہروں میں بارش ، جاتی سردی لوٹ آئی

    کراچی : ملک کے مختلف شہروں میں بارش کے باعث جاتی سردی لوٹ آئی، کئی علاقوں میں درجہ حرارت نقطہ انجماد سے نیچے آگیا۔

    تفصیلات کے مطابق ملک کے مختلف شہروں میں بارش کے بعد موسم خوشگوار ہوگیا۔

    محکمہ موسمیات نے بتایا کہ شمال مشرقی پنجاب،گلگت بلتستان اور شمال مغربی بلوچستان میں چند مقامات پربارش ہوئی۔

    بالائی علاقوں میں برفباری کے بعد شدید سردی کی لہر برقرار ہے اور کئی علاقوں میں درجہ حرارت نقطہ انجماد سےنیچے ہے۔

    کالام میں منفی چار،مالم جبہ میں منفی تین ، راولا کوٹ اور مری میں منفی دو ڈگری سینٹی گریڈ ریکارڈ کیا گیا۔

    مزید پڑھیں : کراچی میں موسم کی تبدیلی سے متعلق محکمہ موسمیات کا اہم بیان

    لاہور میں رات گئے ہلکی بوندا باندی کے بعد موسم سرد ہوگیا، محکمہ موسمیات کے مطابق آئندہ چوبیس گھنٹے کے دوران وقفے وقفے سے بارش کا سلسلہ جاری رہے گا۔

    دوسری جانب کراچی میں مطلع جزوی ابرآلود،صبح اور رات میں خنکی رہنے کا امکان ہے۔

    محکمہ موسمیات کے مطابق آج تیزدھوپ کےساتھ موسم گرم رہے گا اور زیادہ سے زیادہ درجہ حرارت بتیس ڈگری تک جانے کا امکان ہے۔

  • ملک کے مختلف شہروں میں بارش سے خشک سالی کا خطرہ ٹل گیا، سردی میں اضافہ

    ملک کے مختلف شہروں میں بارش سے خشک سالی کا خطرہ ٹل گیا، سردی میں اضافہ

    اسلام آباد : ملک کے مختلف شہروں میں بارش سے خشک سالی کا خطرہ ٹل گیا اور جاتی سردی لوٹ آئی۔

    تفصیلات کے مطابق راولپنڈی اوراسلام آباد میں علی الصبح بارش سے جل تھل ایک ہوگیا جبکہ پنجاب اور خیبرپختونخوا کے مختلف شہروں میں بارش کے بعد جاتی سردی لوٹ آئی۔

    بارش کے باعث طویل خشک سالی کا خاتمہ ہوگیا ، خشک سالی کے خاتمہ پر چہرے کھل اٹھے، بارش کے بعد خشک سالی کی وجہ سے پھیلی بیماریوں کا بھی خاتمہ متوقع ہے۔

    رات گئے لاہور،فیصل آباد، سرگودھا، اوکاڑہ، پاکپتن، ملتان، ڈیرہ غازی خان، بہاولپور، مظفر گڑھ اور رحیم یار خان میں سمیت پنجاب کے مختلف شہروں میں رات گئے بادل برس پڑے۔

    کوئٹہ،پشاور،سبی، کوہلو سمیت بلوچستان کے مختلف اضلاع میں بھی ہلکی بارش ہوئی جبکہ سوات میں بارشیں اور بالائی علاقوں میں برفباری کاسلسلہ جاری ہے۔

    راولپنڈی میں بارش سے خشک سالی ایمرجنسی ختم ہوگئی اور خطرہ ٹل گیا تاہم شہری پانی کا استعمال انتہائی احتیاط سے کریں گاڑیوں اور فرش دھونے اور پانی کے ضیاع پر پابندی کا اطلاق جاری رہے گا اور خلاف ورزی کرنے والوں کے خلاف کارروائی کی جائے گی۔

    بارش کے نتیجہ میں زیر زمین پانی کے لیول میں بہتری آئے گی اور اگر بارش کا سلسلہ مسلسل جاری رہا تو پانی کے ذخائر اور زیر زمین پانی کے لیول میں بہتری کی توقع ہے جبکہ خان پور ڈیم راول ڈیم میں پانی میں کی آمد میں اٖضافہ متوقع ہے۔

    دوسری جانب محکمہ موسمیات نے آج اسلام آباد، راولپنڈی، لاہور دیر، چترال، کشمیر اور گلگت بلتستان میں اکثر مقامات پر بارش اور پہاڑوں پر برفباری کی پیشگوئی کی ہے۔

    محکمہ موسمیات کے مطابق بالائی پنجاب ، اسلام آباد،بالائی خیبرپختونخوا ،کشمیر اورگلگت بلتستان میں اکژ مقامات پروقفے وقفےسےتیز ہواؤں اور گرج چمک کے ساتھ بارش اور پہاڑوں پر برفباری کا امکان ہے

    اس دوران چندمقامات پر شدید بارش اور برفباری جبکہ خطہ پوٹھوہار اور شمال مشرقی پنجاب میں چند مقامات پر ژالہ باری ہو سکتی ہے۔

    اسلام آباد اور گردونواح میں مطلع ابر آلود رہنے کے علاوہ تیز ہواؤں اور گر ج چمک کے ساتھ وقفے وقفےسے بارش متوقع ہے تاہم اس دوران چند مقامات پر ژالہ باری ہو سکتی ہے۔

    سندھ کے بیشتر اضلاع میں موسم خشک رہنے اور بلوچستان کے بیشتراضلاع میں موسم سرد اور خشک رہنے کا امکان ہے۔

  • سعودی عرب میں مکہ مکرمہ اور مدینہ سمیت متعدد شہروں میں بارش

    سعودی عرب میں مکہ مکرمہ اور مدینہ سمیت متعدد شہروں میں بارش

    سعودی عرب میں محکمہ موسمیات کا کہنا ہے کہ گزشتہ روز جدہ میں مطلع ابر آلود رہا جبکہ مکہ مکرمہ اور مدینہ سمیت متعدد شہروں میں ہلکی بارش سے موسم خوشگوار ہوگیا۔

    سعودی خبر رساں ادارے کی رپورٹ کے مطابق محکمہ موسمیات کا کہنا تھا کہ مکہ مکرمہ شہر کے علاوہ بحرہ، جموم، رہاط، مدرکہ اور الکامل دوپہر دو بجے تک بارش ہوسکتی ہے جبکہ طائف، اضم، میسان میں شام 4 بجے تک بارش کا امکان ہے۔

    بیان میں کہا گیا ہے کہ ’جدہ، حدہ، القنفذہ اور اللیث میں رات 10 بجے تک مطلع ابر آلود اور تیز ہوا چلنے کا امکان ہے‘۔

    محکمہ موسمیات نے مدینہ منورہ سے متعلق کہا کہ ’الرایس، ینبع، الحناکیہ، المہد اور وادی الفرع میں بھی مطلع ابر آلود رہے گا اور ہلکی بارش ہوگی جبکہ بعض علاقوں میں گرج چمک ہوتی رہے گی‘۔

    ’اسی طرح ریاض ریجن کے متعدد شہروں میں گرد آلود ہوا چلے گی اور بعض علاقوں میں درمیانے درجے کی بارش ہوگی‘۔

    ’مشرقی ریجن میں بھی ملتی جلتی کیفیت ہوگی جہاں دوپہر دو بجے تک بارش کا امکان ہے‘۔

    دوسری جانب ایران کے جزیرے ہرمز کے ’ریڈ بیچ‘ پر شدید بارشوں کے باعث سرخ رنگ کا سیلاب آ گیا ہے، جسے دیکھ کر انٹرنیٹ صارفین حیران رہ گئے ہیں۔

    اس جزیرے کو رینبوئی لینڈ بھی کہا جاتا ہے، جہاں تیز بارشوں کی وجہ سے سیلابی صورت حال پیدا ہو جاتی ہے اور قدرتی طور پر پانی کا رنگ سرخ ہو جاتا ہے۔

    برازیل میں شدید بارشوں کے باعث لینڈ سلائیڈنگ، متعدد ہلاک

    مٹی کے سرخ رنگ کی وجہ جزیرہ ہرمز کی آتش فشاں چٹانوں میں موجود ہیماٹائٹ اور آئرن آکسائیڈ ہے، جس کو گولک کہتے ہیں، خلیج فارس کا یہ جزیرہ سالٹ ڈوم ہے، جس میں مٹی اور آتش فشاں چٹانوں کی تہیں موجود ہیں۔

  • سعودی عرب: مدینہ منورہ سمیت متعدد شہروں میں بارشوں کا الرٹ جاری

    سعودی عرب: مدینہ منورہ سمیت متعدد شہروں میں بارشوں کا الرٹ جاری

    سعودی عرب میں موسمیات کے قومی مرکز کا کہنا ہے کہ جمعرات سے پیر تک مملکت کے بیشترعلاقوں میں کہیں ہلکی جبکہ بعض جگہ موسلا دھار بارش ہوسکتی ہے۔

    عرب خبر رساں ادارے کی رپورٹ کے مطابق موسمیاتی مرکز کا کہنا ہے کہ مکہ مکرمہ ریجن کے علاقے طائف، میسان، اضم، العرضیات، المویہ، الخرمہ، شہر مقدس، بحرہ، رنیہ، تربہ، الجموم اور خلیص میں جمرات سے اتوار تک بارش کے ساتھ تیز گرد آلود ہوا چلنے کا امکان ہے۔‘

    جمعرات سے پیر تک الباحہ ریجن کے بعض علاقے بھی بارش کی لپیٹ میں رہیں گے۔

    اس کے علاوہ سعودی عرب میں نجران، مدینہ منورہ، ریاض، قصیم، حاالجوف اور شمالی حدود کے علاقوں میں بھی بارش کا سلسلہ پیر تک جاری رہے گا۔

    دوسری جانب ایران کے جزیرے ہرمز کے ’ریڈ بیچ‘ پر شدید بارشوں کے باعث سرخ رنگ کا سیلاب آ گیا ہے، جسے دیکھ کر انٹرنیٹ صارفین حیران رہ گئے ہیں۔

    اس جزیرے کو رینبوئی لینڈ بھی کہا جاتا ہے، جہاں تیز بارشوں کی وجہ سے سیلابی صورت حال پیدا ہو جاتی ہے اور قدرتی طور پر پانی کا رنگ سرخ ہو جاتا ہے۔

    برازیل میں شدید بارشوں کے باعث لینڈ سلائیڈنگ، متعدد ہلاک

    مٹی کے سرخ رنگ کی وجہ جزیرہ ہرمز کی آتش فشاں چٹانوں میں موجود ہیماٹائٹ اور آئرن آکسائیڈ ہے، جس کو گولک کہتے ہیں، خلیج فارس کا یہ جزیرہ سالٹ ڈوم ہے، جس میں مٹی اور آتش فشاں چٹانوں کی تہیں موجود ہیں۔

  • سردی کی ایک بار پھر واپسی کا امکان، بارش کی بھی پیشگوئی

    سردی کی ایک بار پھر واپسی کا امکان، بارش کی بھی پیشگوئی

    فروری جیسے جیسے آگے بڑھ رہا ہے موسم بھی تبدیل ہو رہا ہے تاہم ایک بار پھر سردی کی واپسی کا امکان ہے اور بارش بھی ہو سکتی۔

    یہ پیشگوئی کی ہے بھارتی محکمہ موسمیات نے ملک کے شمالی اور شمال مشرقی علاقوں دہلی، اتر پردیش اور تلنگانہ سے متعلق جب کہ اس حوالے سے الرٹ بھی جاری کیا ہے۔

    بھارتی میڈیا کے مطابق اس وقت ملک کے شمالی حصوں میں موسم سردی سے بتدریج گرمی کی طرف جا رہا ہے تاہم محکمہ موسمیات نے اگلے چند روز میں سردی کی واپسی کی پیشگوئی کر دی ہے۔

    محکمہ موسمیات کے مطابق شمال مشرقی بنگلہ دیش میں طوفانی ہواؤں کا ایک دائرہ بنتا نظر آ رہا ہے۔ اس کی وجہ سے اگلے پانچ دنوں تک اروناچل پردیش، آسام، میگھالیہ گرج چمک کے ساتھ تیز بارش ہو سکتی ہے اور بعض مقامات پر آسمانی بجلی گرنے کا بھی امکان ہے جب کہ پہاڑی علاقوں میں برفباری کی بھی پیشگوئی کی گئی ہے۔

    محکمہ موسمیات نے اترپردیش کے مشرقی اور مغربی علاقوں میں اس دوران دھند پڑنے اور راجھستان میں موسم خشک رہنے کی پیشگوئی کی ہے۔

    https://urdu.arynews.tv/karachi-weather-fluctuation/