Tag: بارش

ملک بھر میں سورج کی روشنی سے بجلی پیدا کرنے والے سولر پینلز کی طلب میں تیزی سے اضافہ ہو رہا ہے، تاہم ان پینلز کی بہتر کارکردگی اور حفاظت کیلئے احتیاطی تدابیر اختیار کرنا بھی ضروری ہیں۔

سولر پینلز گھروں اور بازاروں میں بجلی کے متبادل ذرائع کے طور پر بہت مقبول ہیں، تاہم ان پینلز کی مناسب دیکھ بھال نہ کی جائے تو مختلف موسمی حالات، خاص طور پر بارشوں سے انہیں نقصان پہنچنے کا قوی اندیشہ ہوتا ہے۔

یہ بات بھی مدنظر رکھیں کہ بارش سولر پینلز کی کارکردگی کو کافی حد تک کم کرسکتی ہے اور اگر مناسب طریقے سے توجہ نہ دی جائے تو خرابی کی صورت میں اس کی مرمت پر کافی اخراجات بھی آسکتے ہیں۔

زیر نظر مضمون میں بارش کے دوران سولر پینلز کی حفاظت اور ان کی بہترین کارکردگی کو یقینی بنانے کے مؤثر طریقوں پر بات کی گئی ہے۔

باقاعدہ صفائی اور دیکھ بھال

سولر پینلز پر ہونے والی گندگی، درختوں کے پتوں، گرد و غبار اور دیگر اشیاء کو باقاعدگی سے نرم برش یا کپڑے سے صاف کریں، یہ چیزیں سورج کی روشنی براہ راست پڑنے سے رکنے کا باعث بنتی ہیں۔

پینلز پر ہونے والی گندگی اور گہرے داغ دھبوں کو صاف کرنے کیلیے نرم کپڑا استعمال کریں اور کسی بھی ایسے تیز کیمیکل کا استعمال نہ کریں جو اس کی پلیٹ کو خراش یا نقصان پہنچا سکتا ہو۔

اپنے سولر سسٹم کو تباہ ہونے سے بچانے کیلئے بارشوں کے موسم میں سولر پینل اور فریمز کا بغور جائزہ لیں اگر کوئی مسئلہ نظر آئے تو اسے فوری طور پر حل کریں تاکہ مزید خرابی سے بچا جا سکے۔

اعلیٰ معیار کی تنصیب

سولر پینلز نصب کرتے ہوئے اس بات کو یقینی بنائیں کہ پینلز بہترین زاویے پر نصب کیے گئے ہیں اور مناسب سمت میں ہیں تاکہ سورج کی روشنی کو زیادہ سے زیادہ جذب کر سکیں اور ان پر پانی نہ ٹھہرے۔ پینل کی تنصیب کسی اچھے ٹیکنیشن سے کرائیں۔

اچھی کوالٹی کا میٹریل استعمال کریں، سستے سامان اور ٹیکنیشن سے انسٹالیشن نہ کرائیں۔ یہ آپ کے اہل خانہ کی جان کے لیے بھی بہت بڑا خطرہ ہے۔

اعلیٰ معیار کا ماؤنٹنگ سسٹم کا استعمال کریں تاکہ تیز ہواؤں اور طوفانی بارش کے باوجود پینلز اپنی جگہ سے نہ ہٹیں یا خراب نہ ہوں۔

سولر پینلز کے کورز

سولر پینلز کے ان کورز کو ترجیح دیں جو طوفانی بارش کے دوران استعمال کیے جاسکیں۔ یہ کورز موسم صاف ہونے پر آسانی سے واپس کھینچے جاسکتے ہیں۔

اس کے علاوہ ان علاقوں کے لیے جہاں بارش اکثر اور شدت سے ہوتی ہے مستقل کورز ایک موزوں آپشن ہو سکتے ہیں۔ اگرچہ یہ کم لچکدار ہوتے ہیں لیکن مستقل کورز آپ کے سولر پینلز کے لیے مستقل حفاظت کا ذریعہ بنتے ہیں۔

سولر پینلز پر کوٹنگز

اپنے سولر پینلز پر ہائیڈرو فوبک کوٹنگز لگائیں تاکہ وہ پانی سے محفوظ رہ سکیں اور اسے ان قطروں کی شکل اختیار کرنے سے روک سکیں جو کارکردگی کو کم کرتے ہیں، یہ کوٹنگز پینلز کو زنگ لگنے سے بھی بچا سکتی ہیں۔

اینٹی ریفلیکٹو کوٹنگز سولر پینلز کی کارکردگی کو بہتر بنا سکتی ہے کیونکہ یہ چمک کو کم کرتی ہیں اور روشنی کو زیادہ جذب کرتی ہیں۔

اوپر بیان کیے گئے مؤثر اور ثابت شدہ طریقوں پر عمل کر کے آپ اپنے سولر پینلز کو بارش کے نقصان دہ اثرات سے محفوظ رکھ سکتے ہیں اور ان کی طویل مدتی کارکردگی کو یقینی بنا سکتے ہیں۔