گجرات: بھارت میں بھی طوفان بیپر جوائے کی شدت برقرار ہے، آئی ایم ڈی نے 9 ریاستوں میں ہائی الرٹ جاری کردیا جبکہ گجرات میں طوفان کے باعث بارش کا سلسلہ شروع ہوگیا۔
بھارتی میڈیا رپورٹ کے مطابق ہندوستانی محکمہ موسمیات (آئی ایم ڈی) نے کہا ہے کہ گوا، راجستھان، مہاراشٹرا،گجرات سمیت 9 ریاستوں میں انتظامیہ کو ہائی الرٹ کردیاگیا ہے۔
بھارتی محکمہ موسمیات کا کہنا ہے طوفان کل ریاست گجرات کے ضلع کچھ سے ٹکرائے گا، اس طوفان سے ممبئی اورپاکستان کے ساحلی علاقے متاثر ہوں گے۔
رپورٹ میں کہا گیا ہے کہ طوفان کے باعث ریاست گجرات کے مختلف ضلع پور بندر اور دوارکا میں جم کر بارش ہوئی ہے جس کی وجہ سےکئی علاقے زیرآب آگئے۔
میڈیا رپورٹ کے مطابق گجرات میں ہنگامی حالت نافذ کردی گئی ہے، 70 سے زیادہ ٹرین منسوخ کردی گئی، بندگاہ پر تمام آپریشنز معطل کردی گئی جبکہ کچھ کا علاقہ پوری طرح خالی کرالیا گیا ہے۔
رپورٹ کے مطابق طوفان سے کم نقصان ہو اس کے لیے حکومت، فوج اور دیگر سکیورٹی ایجنسیوں نے تقریباً 47 ہزار سے زائد افراد کو محفوظ مقامات پر منتقل کردیا گیا ہے۔
بھارتی حکام کا کہنا ہے شیلٹرز ہوم میں لوگوں کیلئے سہولیات یقینی بنا رہے ہیں، اس کے علاوہ ممبئی بھی طوفان کی زد میں ہے، طوفان کے باعث ساحل پر اونچی لہریں اُٹھ رہی ہیں، جس کے بعد حکام نے لوگوں کی آمد پر پابندی لگادی ہے۔
