ARYNews.tv | Urdu – Har Lamha Bakhabar

Tag: بارش

  • کیا آج کراچی میں بارش ہوگی؟ محکمہ موسمیات کا بیان جاری

    کیا آج کراچی میں بارش ہوگی؟ محکمہ موسمیات کا بیان جاری

    کراچی (21 اگست 2025): محکمہ موسمیات نے کہا ہے کہ شہر قائد میں آج بھی بادل برسنے کا امکان ہے۔

    تفصیلات کے مطابق محکمہ موسمیات نے آج جمعرات کو بھی کراچی کے مختلف علاقوں میں بارش کی پیش گوئی کی ہے، گزشتہ روز کہیں درمیانی تو کہیں تیز بارش ریکارڈ کی گئی تھی۔

    ماہرین موسمیات کا کہنا ہے کہ سندھ میں بارش کا سبب بننے والا سسٹم آج بھی فعال رہے گا، ہوا کے کم دباؤ کے باعث سندھ میں مزید بارشوں کا امکان ہے، اور آج دوپہر کے وقت گرج چمک والے بادل بننے کی توقع ہے۔

    محکمہ موسمیات کے مطابق کراچی میں دوپہر سے شام، اور رات کے دوران تیز بارش اور ہوائیں چل سکتی ہیں، بعض مقامات پر موسلا دھار بارش کا بھی امکان ہے، جب کہ شہری علاقوں میں اربن فلڈنگ کا خطرہ برقرار ہے۔

    کراچی : بارش کے بعد سے شہر بھر میں بجلی کا بریک ڈاؤن جاری

    تاہم محکمے کا کہنا ہے کہ آج رات سے سسٹم کی شدت میں کمی کا امکان ہے، اور بارشوں کا یہ سلسلہ جمعہ تک جاری رہ سکتا ہے۔ دوسری طرف کراچی میں آج کم سے کم درجہ حرارت 28 ڈگری سینٹی گریڈ ریکارڈ کیا گیا ہے، جب کہ زیادہ سے زیادہ درجہ حرارت 31 ڈگری سینٹی گریڈ رہنے کا امکان ہے۔

  • کراچی کی بارش نے سرفراز احمد کو کیسے متاثر کیا؟

    کراچی کی بارش نے سرفراز احمد کو کیسے متاثر کیا؟

    کراچی (20 اگست 2025): شہر قائد میں شدید بارش نے ہر خاص وعام شہری کو پریشان کیا سابق قومی کپتان سرفراز احمد بھی اس سے متاثر ہوئے۔

    گزشتہ روز سے جاری بارش نے جہاں کراچی کو پانی پانی کرتے ہوئے روشنیوں کے شہر سے ایک بڑے سوئمنگ پول میں تبدیل کر دیا، جس میں انسان سمیت گاڑیاں، پولیس بھی تیرتی نظر آئی۔

    متعلقہ اداروں کی غفلت نے باران رحمت سے زحمت بننے والی اس بارش نے شہر قائد کے تمام خاص وعام کو پریشانی میں مبتلا کیا۔ پاکستان کرکٹ ٹیم کے سابق کپتان سرفراز احمد بھی اس سے متاثر ہوئے بغیر نہ رہ سکے۔

    ہوا کچھ یوں کہ کراچی میں حسب روایت بارش کے ساتھ ہی بجلی کی بندش بہت طویل ہوگئی اور کچھ علاقے تو ایسے ہیں کہ وہاں پورا دن گزرنے کے بعد بجلی نے اپنی جھلک تک نہیں دکھائی ہے۔

    سرفراز احمد بھی بجلی کی طویل بندش اور بارش کے بعد بھی بحال نہ ہونے پر شدید اذیت میں مبتلا ہو گئے جس کا اظہار انہوں نے اپنی انسٹا گرام اسٹوری کے ذریعہ کیا۔

    چیمپئنز ٹرافی کے فاتح سابق قومی کپتان اس موقع پر اپنے جذبات پر قابو نہ رکھ سکے اور بجلی کی فوری بحالی کے لیے کے الیکٹرک کے آگے ہاتھ جوڑ لیے اور کہا کہ بفرزون کے رہائشی 10 گھنٹوں سے بجلی سے محروم ہیں۔

    انسٹا گرام اسٹوری پر پیغام شیئر کرتے ہوئے کے الیکٹرک حکام کو مخاطب کیا اور ان سے درخواست کی کہ بھائی مہربانی کر کے بفرزون کی بجلی بحال کر دو۔ 10 گھنٹے ہو گئے ہیں اور اب تو یو پی ایس بھی بند ہو گیا ہے۔

    واضح رہے کہ کراچی میں گزشتہ روز سے شروع ہونے والی بارش کا سلسلہ وقفے وقفے سے تاحال جاری ہے اور مختلف حادثات میں 15 افراد زندگی کی بازی ہار چکے ہیں۔

    شہر قائد میں گزشتہ روز بارش شروع ہوتے ہی کے الیکٹرک کے سینکڑوں فیڈر ٹرپ کر گئے تھے۔ بیشتر علاقے 24 گھنٹے سے زائد کا وقت گزرنے کے باوجود اب بھی تاریکی میں ڈوبے ہوئے ہیں۔

  • کراچی: بارش کے دوران 11ہزار کی نفری لوگوں کی مدد کرتی رہی، ایڈیشنل آئی جی

    کراچی: بارش کے دوران 11ہزار کی نفری لوگوں کی مدد کرتی رہی، ایڈیشنل آئی جی

    کراچی: ایڈیشنل آئی جی جاوید عالم اوڈھو نے کہا ہے کہ 11ہزار کے قریب نفری لوگوں کی مدد کرتی رہی، کافی گاڑیاں کو حادثات پیش آئے۔

    شہرقائد میں صرف ایک روز کی بارش نے ہی پورے شہر کا بُرا حال کردیا ہے جگہ جگہ سڑکیں ٹوٹ پھوٹ کا شکار ہوچکی ہیں، شہریوں کو آمد و رفت میں مشکلات کا سامنا ہے، کئی علاقوں میں بارش کا پانی گھروں میں داخل ہوا، شہریوں کو گزشتہ رات گھر واپس پہنچنے میں شدید پریشانی کا سامنا کرنا پڑا۔

    ایڈیشنل آئی جی جاوید عالم اوڈھو نے کراچی کی صورتحال پر گفتگور کرتے ہوئے کہا کہ بارش کے دوران شہریوں کو بہت تکلیف ہوئی۔

    انھوں نے کہا کہ بارش کے دوران کافی گاڑیاں کو حادثات پیش آئے، سڑکیں کھدی ہوئی تھیں جس کی وجہ سے گاڑیوں کو نقصان ہوا، کافی حد تک بارش کا پانی کم ہوگیا ہے۔

    جاوید عالم نے کہا کہ کورنگی میں صرف ایک علاقے میں 259 ملی میٹر بارش ہوئی، سوئی گیس کے کام کی وجہ سے مشکلات زیادہ ہوئیں۔

    ایڈیشنل آئی جی جاوید عالم اوڈھو کا کہنا تھا کہ قدرتی آفات کا سامنا کررہے ہیں، کورنگی کراسنگ تک روڈ بند ہے پانی نکال رہے ہیں۔

    https://urdu.arynews.tv/karachi-electricity-not-restored-in-most-areas/

  • کراچی کی سڑکوں پر درجنوں گاڑیاں لاوارث کھڑی ہونے کا انکشاف

    کراچی کی سڑکوں پر درجنوں گاڑیاں لاوارث کھڑی ہونے کا انکشاف

    کراچی (20 اگست 2025): گزشتہ روز شہر قائد میں موسلادھار بارش کے تین اسپیل برسنے کے بعد جہاں سڑکیں ڈوب گئی تھیں وہاں شہریوں کو نقل و حمل میں شدید پریشانی کا سامنا کرنا پڑا، اور بے شمار لوگوں کی گاڑیاں اور موٹر سائیکلیں خراب ہو گئیں۔

    اب انکشاف ہوا ہے کہ کراچی کی سڑکوں پر درجنوں گاڑیاں لاوارث کھڑی ہیں، بالخصوص نیشنل اسٹیڈیم سے سوک سینٹر تک درجنوں گاڑیاں لاوارث کھڑی پائی گئی ہیں۔ شہری ایندھن کی کمی اور خرابی کے باعث گاڑیاں سڑک پر ہی چھوڑ کر گھر جانے پر مجبور ہوئے۔

    کام اور دفاتر سے گھروں کو جانے والے ہزاروں شہری گزشتہ روز کئی کئی گھنٹے تک سڑکوں پر اپنی خراب بائیکوں اور کاروں کے ساتھ کھڑے دکھائی دیے، جگہ جگہ مکینکوں پر بھی رش لگا رہا جو من مانے پیسے وصول کرتے رہے۔

    کراچی میں ایک دن بارش کے تین اسپیل، مزید دو روز تیز بارش کی پیشگوئی

    جناح اسپتال کے قریب سے یہ اطلاع بھی ملی کہ قومی ادارہ امراض قلب سے ڈسچارج مریض گھروں کو نہیں جا سکے، شام 6 بجے ڈسچارج ہونے والے مریض بارش کی وجہ سے رات گئے تک اسپتال ہی میں پھنسے رہے۔

    واضح رہے کہ کراچی میں مختلف علاقوں سے تاحال بارش کے پانی کی نکاسی نہیں ہو سکی ہے، گرومندر، ایم اے جناح روڈ سے بارش کا پانی نہیں نکل سکا، سپریم کورٹ کراچی رجسٹری کے اطراف بھی بارش کا پانی موجود ہے، اور بارش کے پانی سے خراب متعدد گاڑیاں تاحال شارع فیصل پر بھی موجود ہیں۔

    آئی آئی چندریگر روڈ پر اسٹیٹ بینک بلڈنگ اور اطراف میں پانی موجود ہے، ٹاور اور اطراف کی سڑکوں پر سے بارش کے پانی کی نکاسی نہیں ہو سکی ہے، شاہین کمپلیکس اور اطراف میں بھی بارش کا پانی کھڑا ہے۔

    خیال رہے کہ سندھ حکومت نے آج شہر میں تعطیل کا اعلان کر رکھا ہے، محکمہ موسمیات نے کہا ہے کہ بارش برسانے والاسسٹم آج بھی فعال ہے، اور آج ہونے والی بارش کی شدت بھی زیادہ ہونے کی پیشگوئی ہے۔ ادھر آج ڈی جی میٹ نے اے آر وائی نیوز کے پروگرام میں بتایا کہ کراچی میں 24 گھنٹوں کے دوران بہت زیادہ بارش ہوئی، ارلی وارننگ سسٹم سے پہلے ہی بتا دیا گیا تھا کہ اس بار شدید بارش ہوگی، اگر نکاسی نہیں ہوئی تو تھوڑی بارش میں بھی اربن فلڈنگ صورت حال بنے گی۔

  • کراچی میں ایک دن بارش کے تین اسپیل، مزید دو روز تیز بارش کی پیشگوئی

    کراچی میں ایک دن بارش کے تین اسپیل، مزید دو روز تیز بارش کی پیشگوئی

    کراچی (20 اگست 2025): شہر قائد میں ایک دن بارش کے تین اسپیل نے نکاسی آب کا نظام فیل کر دیا، محکمہ موسمیات نے مزید دو روز تیز بارشوں کی پیشگوئی بھی کر دی ہے۔

    تفصیلات کے مطابق گزشتہ روز کراچی میں بارش کے تین اسپیل برسے، جس نے شہر میں نکاسی کا نظام ٹھپ کر کے رکھ دیا، اور طوفانی بارش کے بعد شہر میں اربن فلڈنگ کی صورت حال پیدا ہو گئی۔

    بارش شروع ہونے کے بعد چند گھنٹوں بعد کراچی کے کئی علاقے ڈوب گئے، سڑکوں پر پانی کے ریلے بہتے رہے، سب سے بڑی شاہراہ شارع فیصل بھی اس بار پانی میں ڈوب گئی اور گاڑیاں پھنس گئیں، لوگوں کا فیول ختم ہو گیا تو انھیں گاڑیاں سڑک پر چھوڑنی پڑیں۔

    میئر کراچی مرتضیٰ وہاب نے شارع فیصل کا دورہ کیا اور اس موقع پر میڈیا سے گفتگو میں کہا کہ 6 گھنٹے کی بارش کے بعد جمع ہونے والا پانی اب نکل رہا ہے، برساتی نالے صاف ہیں اور پانی کی نکاسی ہو رہی ہے۔

    شہر میں سیلابی صورت حال کے باعث گھر سے نکلنے والے شہری دفتر نہیں پہنچ سکے تھے، جب کہ دفتر سے گھر کے لیے نکلنے والے افراد کو شدید اذیت کا سامنا کرنا پڑا، لیاری ایکسپریس وے پر دباؤ بڑھنے سے ٹریفک کی بدترین صورت حال بھی پیدا ہوئی، یہاں تک کہ مختلف علاقوں میں اسکول کے بچے بھی رُل گئے، اسکول وینیں سڑک پر بند ہو گئیں، ڈرائیوروں کے فون بند تھے اور والدین پریشان ہوتے رہے، دوپہر کو نکلے بچے شام اور رات کو پہنچ پائے۔

    سڑکوں پر جگہ جگہ موٹر سائیکلیں پانی میں بند ہو گئیں اور لوگ مکینک ڈھونڈتے رہے، مکینکوں نے بھی بائیکیں اسٹارٹ کرنے کے معمول سے بہت زیادہ معاوضہ وصول کیا، رکشوں اور آن لائن رائڈز نے بھی کرائے بڑھائے۔

    محکمہ موسمیات کا کہنا ہے کہ کراچی میں مزید 2 روز تک بارش کا امکان ہے، آج اور کل زیادہ بارش ہو سکتی ہے، گزشتہ 12 گھنٹوں کے دوران گلشن حدید میں سب سے زیادہ 170 ملی میٹر بارش ہوئی۔ اولڈ ائیرپورٹ ایریا میں 158، جناح ٹرمینل پر 152.8 ملی میٹر بارش ریکارڈ کی گئی۔

  • بھارت میں شدید بارشوں سے معمولات زندگی مفلوج، اسکول و کالج بند

    بھارت میں شدید بارشوں سے معمولات زندگی مفلوج، اسکول و کالج بند

    بھارت کے مہاراشٹر میں موسلا دھار بارش نے بڑے پیمانے پر تباہی مچادی، اب تک ریاست میں 7 افراد زندگی کی بازی ہار چکے ہیں جبکہ دو سو سے زیادہ افراد بادل پھٹنے اور سیلابی صورتحال میں پھنس گئے ہیں۔

    بھارتی میڈیا رپورٹس کے مطابق بارش سے سب سے زیادہ متاثر ممبئی ہوا ہے، جہاں موسلا دھار بارش ہورہی ہے، سڑکیں ندی نالوں کا منظر پیش کر رہی ہیں، گاڑیاں پانی میں پھنسی ہوئی ہیں۔

    رپورٹس کے مطابق شدید بارش کے سبب ممبئی میونسپل کارپوریشن (بی ایم سی) نے اسکولوں اور کالجوں کو بند رکھنے کا اعلان کردیا ہے، موسم کی صورتحال دیکھتے ہوئے سبھی تعلیمی اداروں میں چھٹی کا فیصلہ کیاگیا ہے۔

    محکمہ موسمیات کے مطابق 18 اگست صبح ساڑھے آٹھ بجے سے 19 اگست صبح ساڑھے پانچ بجے تک وکرولی میں 194.5 ملی میٹر، سانتا کروز میں 185 ملی میٹر، جوہو میں 173.5 ملی میٹر اور بائیکولا میں 167 ملی میٹر بارش ریکارڈ کی گئی۔

    رپورٹس کے مطابق باندرہ میں 157 ملی میٹر جبکہ کولابہ اور مہالکشمی میں بالترتیب 79.8 اور 71.9 ملی میٹر بارش ریکارڈ کی گئی ہے۔

    بارش کے بعد اندھیری سب وے میں پانی بھر جانے پر اسے بند کرنا پڑا جبکہ چیمبور کے بی ایم سی کے ماتحت اسپتال تک مریضوں کو پہنچانے میں اہل خانہ کو سخت مشکلات پیش آئیں۔ کئی لوگوں کو اپنے بیمار رشتہ داروں کو کندھوں پر لاد کر اسپتال پہنچانا پڑا۔

    موسلا دھار بارش کے باعث نہ صرف سڑکیں جام ہوگئیں بلکہ فضائی پروازیں بھی متاثر ہوئیں۔ ممبئی ایئرپورٹ پر آمد و رفت میں تاخیر ہوئی اور کئی پروازیں وقت پر روانہ نہ ہو سکیں۔

    انڈیگو اور دیگر ایئرلائنز نے مسافروں کو ہدایت دی ہے کہ وہ سفر سے پہلے اپنی فلائٹ کی اپ ڈیٹ چیک کریں اور ٹریفک کے سبب وقت سے پہلے ایئرپورٹ پہنچنے کی کوشش کریں۔

    رپورٹس کے مطابق ریاست کے دیگر اضلاع میں بھی صورتحال خطرناک ہے، ناندیڑ میں 200 سے زائد لوگ بارش کے پانی میں پھنس گئے، اسی طرح تھانے کے کلیان علاقے میں لینڈ سلائیڈنگ سے چار گھروں کو نقصان پہنچا۔

    کراچی میں بھی بادل برس پڑے، مختلف علاقوں میں موسلادھار بارش

    محکمہ موسمیات نے ممبئی سمیت تھانے اور پال گھر میں ریڈ الرٹ جاری کیا ہے اور شہریوں کو غیر ضروری سفر سے بچنے کی ہدایت دی گئی ہے۔ ممبئی میں 21 اگست تک مزید بارش کا امکان اظہار کیا گیا ہے۔

  • کراچی میں بارش ، کے الیکٹرک کے 350 فیڈرز ٹرپ کرگئے

    کراچی میں بارش ، کے الیکٹرک کے 350 فیڈرز ٹرپ کرگئے

    کراچی: موسلا دھار بارش کے باعث 350 سے زائد فیڈرز ٹرپ کرگئے ، جس کے بعد مختلف علاقوں میں بجلی کی فراہمی معطل ہوگئی۔

    تفصیلات کے مطابق کراچی کے مختلف علاقوں میں وقفے وقفے سے موسلا دھار بارش کا سلسلہ جاری ہے جس کے نتیجے میں کے- الیکٹرک کے 350 سے زائد فیڈرز ٹرپ ہو گئے اور متعدد علاقوں میں بجلی کی فراہمی معطل ہو گئی۔

    منظور کالونی، ڈی ایچ اے، اختر کالونی، ایف بی ایریا بلاک 2 اور 6، سلطان آباد، مائی کلاچی روڈ کے اطراف، گلشن اقبال بلاک 4، عزیز آباد اور کورنگی کے مختلف علاقوں میں بجلی بند ہے۔

    ترجمان کے ای نے بتایا ادارے کا بجلی تقسیمی نظام مستحکم ہے اور اس وقت کراچی کو 2100 میں سے 1770 سے زائد فیڈرز سے بلاتعطل بجلی کی فراہمی جاری ہے تاہم فیلڈ ٹیموں کی کوششوں سے متاثرہ فیڈرز کی بحالی کا عمل تیزی سے جاری ہے۔

    مزید پڑھیں : کراچی میں بارش، کے الیکٹرک نے ہدایات جاری کر دیں

    بحال کیے جانے والے علاقوں میں ڈیفنس پاسپورٹ آفس، سرور شہید روڈ، کلفٹن بلاک 8 اور 9، پی ای سی ایچ ایس بلاک 2، مین شاہراہِ قائدین، گلستان جوہر کے بلاک 3 اور 14، بلدیہ ٹاؤن کے سیکٹر 4-A، سعید آباد، پاکستان نیوی ہاؤسنگ اسکیم ماڑی پور، اورنگی کے قطر اسپتال، اقبال مارکیٹ، شاہ ولی اللہ نگر، اوتھل و سرجانی کے چیزال آباد، کریم دینو گُڈو گوٹھ اور حب ڈیم کے علاقے شامل ہیں۔

    ترجمان نے کہا کہ حفاظتی پروٹوکول کے تحت نشیبی علاقے اور تجاوزات والے علاقوں میں بجلی عارضی طور پر منقطع کی جاتی ہے۔ ادارے کا عملہ مکمل طور پر متحرک ہے اور شہری انتظامیہ و ایمرجنسی مینجمنٹ کے متعلقہ اداروں کے ساتھ مسلسل رابطے میں ہے۔

    صارفین بجلی کی ایمرجنسی شکایت کے لیے 118 پر رابطہ کر سکتے ہیں، یا کے ای واٹس ایپ، سوشل میڈیا چینلز اور کے ای لائیو ایپ کے ذریعے فوری اطلاع دے سکتے ہیں۔

  • کراچی میں بھی بادل برس پڑے، مختلف علاقوں میں موسلادھار بارش

    کراچی میں بھی بادل برس پڑے، مختلف علاقوں میں موسلادھار بارش

    کراچی (19 اگست 2025): شہر قائد میں بھی بادل برس پڑے، مختلف علاقوں میں موسلادھار بارش برسی ہے۔

    تفصیلات کے مطابق گزشتہ رات سے کراچی کے مختلف علاقوں میں ہلکی بارش کا سلسلہ شروع ہو گیا ہے، جو آج صبح تیز برسات میں بدل گیا، تاہم تھوڑی دیر کی بارش سے کراچی میں سڑکیں تالاب کا منظر پیش کرنے لگی ہیں، بارش کے باعث شہر کے کئی نشیبی علاقے زیر آب آ گئے، ٹاور، گرو مندر، صدر موبائل مارکیٹ اور اطراف میں سڑکوں پر پانی جمع ہو گیا ہے۔

    جن علاقوں میں موسلادھار بارش ہوئی ان میں طارق روڈ، عزیز آباد، شارعِ قائدین، بوٹ بیسن، لیاقت آباد، حسن اسکوائر، نارتھ ناظم آباد، سائٹ ایریا، کلفٹن، ڈیفنس، قیوم آباد، شارع فیصل، ائیرپورٹ، قائد آباد، ملیر، لانڈھی، کورنگی شامل ہیں۔

    صوابی : طوفانی بارشیں، 8 مکانات منہدم، درجنوں افراد جاں بحق

    کراچی کے دیگر علاقوں گلستان جوہر، گلشن اقبال، فیڈرل بی ایریا، اسکیم 33، صفورا چورنگی، ملیر کینٹ اور اطراف، نارتھ کراچی، منگھو پیر، سرجانی ٹاؤن، تیسر ٹاؤن میں بھی موسلادھار بارش برسی، نارتھ ناظم آباد اور اطراف میں گرج چمک کے ساتھ تیز بارش ہوئی ہے۔

    محکمہ موسمیات کے مطابق ملک کے بالائی علاقوں میں آج بھی شدید بارشوں کا امکان ہے، موسمیات نے آئندہ چوبیس گھنٹوں کے دوران کشمیر، گلگت بلتستان، مری، گلیات میں موسلا دھار بارش کی پیشگوئی کی ہے، کوئٹہ، ژوب، قلات، لاہور، اٹک، راولپنڈی، اسلام آباد، پشاور، نوشہرہ، تھرپارکر، عمر کوٹ، مٹھی اور ٹھٹھہ میں شدید بارش سے نشیبی علاقے زیرآب آنے کا خدشہ ہے۔

  • سندھ میں بارش کے دوران آندھی اور بجلی گرنے کی پیشگوئی

    سندھ میں بارش کے دوران آندھی اور بجلی گرنے کی پیشگوئی

    کراچی (18 اگست 2025): آج سے 22 اگست تک سندھ بھر میں تیز بارشوں کا امکان ہے اس دوران اربن فلڈنگ آندھی اور بجلی گرنے کے بھی امکانات ہیں۔

    اے آر وائی نیوز کے مطابق محکمہ موسمیات نے موسم سے متعلق نئی پیشگوئی جاری کی ہے۔ اس کے مطابق ملک بھر میں مون سون کا طاقتور سسٹم اثر انداز ہوچکا ہے۔ اس نئے سسٹم کے تحت آج سے 22 اگست تک بارشوں کا امکان ہے۔

    مون سون کے اس نئے سسٹم کے تحت سندھ میں موسلا دھار بارشیں متوقع ہیں۔ محکمہ موسمیات کی جانب سے جاری پیشگوئی کے مطابق صوبے میں آندھی کے ساتھ موسلا دھار بارشوں کا امکان اور نشیبی علاقوں میں اربن فلڈنگ کا خطرہ ہے جب کہ بارش کے ساتھ آندھی چلنے اور بجلی گرنے کے خدشات بھی موجود ہیں۔

    آج سے شروع ہونے والے مون سون سسٹم کے تحت جیکب آباد، شکارپور، لاڑکانہ، قمبر، شہداد کوٹ، گھوٹکی، سکھر، کشمور اور نوشہروفیروز میں بارش متوقع ہے، جس کا سلسلہ 22 اگست تک جاری رہ سکتا ہے۔

    اس کے علاوہ دادو، میرپورخاص، شہید بے نظیر آباد، حیدر آباد میں وقفے وقفے سے ان پانچ دنوں کے دوران بارش کا امکان ہے جب کہ جامشورو، ٹنڈو محمد خان، ٹھٹھہ، سجاول میں بھی بادل برس سکتے ہیں۔

    محکمہ موسمیات نے اسی دوران تھرپارکر میں بھی درمیانی اور تیز شدت کے ساتھ بارش کا امکان ظاہر کیا ہے۔

    کراچی میں بھی آج سے 22 اگست تک بادل برسیں گے۔ محکمہ موسمیات کے مطابق بھارتی راجستھان پر موجود سائیکلونک سرکولیشن کے اثرات 18 اگست کی شام یا رات تک کراچی میں داخل ہوں گے، جس کے نتیجے میں شہر میں بارشوں کا آغاز ہوگا۔

    موسم کا حال بتانے والوں نے کہا آج شہر میں ہلکی سے درمیانی شدت کی بارش متوقع ہے جبکہ 20 اور 21 اگست کو گرج چمک کے ساتھ تیز اور موسلادھار بارشوں کا امکان ہے، وقفے وقفے سے بارشوں کا سلسلہ 22 اگست تک جاری رہ سکتا ہے۔

  • کراچی کے مختلف علاقوں میں کہیں ہلکی کہیں تیز بارش

    کراچی کے مختلف علاقوں میں کہیں ہلکی کہیں تیز بارش

    کراچی کے مختلف علاقوں میں کہیں ہلکی کہیں تیز بارش ہوئی ہے، جس سے شہر کا موسم خوشگوار ہوگیا ہے۔

    شہر قائد میں آج صبح سے موسم کافی گرم اور تیز دھوپ نکلی ہوئی تھی، تاہم شام کے اوقات میں ہونے والی برسات نے شہر کا موسم خوشگوار کردیا، بارش کے بعد کراچی میں گرمی میں بھی کمی واقع ہوئی ہے۔

    کراچی والے تیار ہوجائیں ! شدید بارشوں کی پیش گوئی

    نارتھ کراچی، نیوکراچی، سرجانی ٹاؤن اور اطراف میں بارش ہوئی جبکہ منگھوپیر روڈ، سائٹ ایریا اور ناردرن بائی پاس پر بھی بادل برسے۔

    اس کے علاوہ کراچی کے مرکزی علاقعے نارتھ ناظم آباد اور نصرت بھٹو کالونی میں بھی بارش ہوئی جس سے حبس کا زور ٹوٹ گیا۔

    https://urdu.arynews.tv/karachi-rainfirst-time-a-judicial-magistrates-notice-on-the-situation/