Tag: بارش

کراچی: شہر قائد کے مختلف علاقوں میں موسم سرما کی دوسری بارش کے بعد شہر میں سردی میں تھوڑا اضافہ ہو گیا۔

تفصیلات کے مطابق آج صبح سویرے کراچی کے مختلف علاقوں میں بارش ہوئی ہے، ترجمان محکمہ موسمیات کا کہنا ہے کہ شہر میں مغربی سسٹم کے اثرات بارش کی صورت میں نظر آنے لگے ہیں۔

جن علاقوں میں بارش ہوئی ان میں گلشن اقبال، ناظم آباد، سائٹ، اورنگی، منگھوپیر، بفر زون، گلستان جوہر، کلفٹن شامل ہیں، بارش کہیں ہلکی ہوئی کہیں تیز، بارش کی وجہ سے ہوا سرد ہو گئی، تاہم حبس بھی پیدا ہونے کا امکان ہے۔

محکمہ موسمیات کا کہنا ہے کہ سب سے زیادہ بارش ناظم آباد میں 3.5 ملی میٹر ریکارڈ کی گئی، کراچی ائیر پورٹ پر محکمہ موسمیات کے سینٹر پر 2.6 ملی میٹر، صدر کے علاقے میں 2.5، شاہ فیصل اور مسرور بیس پر 1.5، سرجانی ٹاؤن میں 1.2، نارتھ کراچی اور کیماڑی میں 0.5، جناح ائیر پورٹ پر 0.6، جب کہ گلستان جوہر میں 0.8 ملی میٹر بارش ریکارڈ کی گئی۔

محکمہ موسمیات کا کہنا ہے کہ بارش برسانے والا مغربی سلسلہ 2 سے 3 گھنٹے میں شہر سے نکل جائے گا اور مطلع بالکل صاف ہو جائے گا۔

کل رات کوئٹہ، زیارت، چاغی، دالبندین، نوکنڈی، سبی، ژوب اور گرد و نواح میں بارش ہوئی تھی، جب کہ چمن میں کوژک، خواجہ عمران اور دوبندی کے پہاڑی سلسلے پر برف باری ہوئی، چمن شہر اور گرد و نواح میں وقفے وقفے سے بارش بھی ہوئی۔

کوژک ٹاپ پر برف باری کے باعث کوئٹہ چمن شاہراہ پر ٹریفک کی روانی متاثر ہو گئی، ڈپٹی کمشنر بشیر بڑیچ کا کہنا تھا کہ لیویز شاہراہ سے برف ہٹانے میں مصروف ہیں۔

کراچی: ملک میں کڑاکے کی سردی پڑ رہی ہے، کراچی کے مختلف علاقوں میں بوندا باندی شروع ہو گئی ہے، پنجاب کے مختلف شہروں میں بھی بارش کی پیش گوئی کی گئی ہے۔

تفصیلات کے مطابق شہر کراچی کے مختلف علاقوں میں آج صبح سویرے بوندا باندی سے سردی میں مزید اضافہ ہو گیا ہے، جن علاقوں میں بوندا باندی ہوئی ہے ان میں سائٹ، بلدیہ، صدر، ہاکس بے، اورنگی ٹاؤن، ایف بی ایریا اور نارتھ کراچی شامل ہیں۔

محکمہ موسمیات کا کہنا ہے کہ آج کراچی میں دن بھر مطلع جزوی ابر آلود اور سرد رہے گا، آج کم سے کم درجہ حرارت 9.5 ڈگری سینٹی گریڈ ریکارڈ کیا گیا، موجودہ درجہ حرارت 14 ڈگری سینٹی گریڈ ہے جب کہ زیادہ سے زیادہ درجہ حرارت 22 ڈگری تک رہنے کا امکان ہے، ہوائیں 34 کلو میٹر فی گھنٹہ کی رفتار سے چل رہی ہیں، ہوا میں نمی کا تناسب 41 فی صد ہے، کوئٹہ کی شمال مشرقی سمت سے چلنے والی ہواؤں سے سردی بڑھ گئی ہے۔

محکمہ موسمیات نے آج پنجاب کے مختلف شہروں میں بھی بارش کی پیش گوئی کی ہے، گوجرانوالہ، گجرات، حافظ آباد، منڈی بہاؤالدین، نارووال، سیالکوٹ، راولپنڈی اور سرگودھا کے اضلاع میں بھی بارش کی توقع ظاہر کی گئی ہے۔ لاہور شہر میں دھند کے باعث سردی کی شدت میں اضافہ ہو گیا ہے، لاہور میں آج زیادہ سے زیادہ درجہ حرارت 17 ڈگری تک رہنے کا امکان ہے۔

ادھر کوئٹہ شہر اور گرد و نواح میں موسم سرما کی پہلی برف باری شروع ہو گئی ہے، صبح 5 بجے سے ہلکی برف باری کا سلسلہ وقفے وقفے سے جاری ہے۔

کراچی: ایران سے بارش برسانے والا سسٹم کراچی میں داخل ہونے کے بعد شہر قائد کے مختلف علاقوں میں بارشوں کا سلسلہ شروع ہو گیا ہے، کے الیکٹرک نے شہریوں کو احتیاطی تدابیر اختیار کرنے کا مشورہ دے دیا ہے۔

تفصیلات کے مطابق ترجمان کے الیکٹرک نے کہا ہے کہ بارش کی صورت میں احتیاط کی جائے، غیر قانونی ذرایع سے بجلی کا حصول ہرگز نہ کیا جائے، شہری ٹوٹے ہوئے تاروں، بجلی کے کھمبوں اور پی ایم ٹیز سے دور رہیں۔

ترجمان کے الیکٹرک کے مطابق بارش کی صورت میں بچوں کا خاص خیال رکھا جائے اور احتیاط برتیں، برقی آلات ننگے پاؤں یا گیلے ہاتھ کے ساتھ نہ چھوئیں، بارش اور کھڑے پانی میں پانی کی موٹر جیسے برقی آلات کا غیر محفوظ استعمال حادثات کا سبب بن سکتا ہے۔

یہ بھی پڑھیں:  نیپرا نے کے الیکٹرک پر 50 ملین روپے جرمانہ عائد کر دیا

ترجمان نے بتایا کہ کسی بھی شکایت کی صورت میں 118 پر فوری رابطہ کیا جائے۔

خیال رہے کہ گزشتہ روز چیف میٹرلوجسٹ نے کہا تھا کہ ایران سے بارش برسانے والا سسٹم کراچی میں داخل ہو چکا ہے، سسٹم بلوچستان سے کراچی میں داخل ہوا، سسٹم کے تحت آج دن بھر شہر کے مختلف علاقوں میں ہلکی بارش کی توقع ہے۔

چیف میٹرلوجسٹ کے مطابق سسٹم سے تیز بارش کی کوئی توقع نہیں ہے، بارش برسانے والاسسٹم سندھ سے پنجاب، پھر شمالی علاقہ جات جائے گا، بوندا باندی کی وجہ سے آج دن خصوصاً رات میں ٹھنڈ ہوگی۔