اسلام آباد: بارڈر ہیلتھ سروسز کے عملے کی نااہلی کا ایک اور واقعہ سامنے آ گیا، منکی پاکس کے مشتبہ مریض ایئرپورٹ سے اسپتال منتقلی کے دوران فرار ہو گئے۔
ذرائع کے مطابق منکی پاکس کے مشتبہ مریض لیبیا سے ڈیپورٹ ہو کر اسلام آباد پہنچے تھے، جہاں سے انھیں پمز اسپتال منتقل کیا جا رہا تھا، تاہم اس دوران وہ بارڈر ہیلتھ سروسز کے عملے کی نا اہلی کی وجہ سے فرار ہو گئے۔
ذرائع کا کہنا ہے کہ لیبیا سے بے دخل پاکستانیوں کو خصوصی فلائٹ سے پاکستان لایا گیا تھا، اور ان کی فلائٹ 8 ستمبر کی رات کو اسلام آباد پہنچی تھی، چاروں مسافروں میں منکی پاکس علامات پائی گئی تھیں۔
ذرائع بی ایچ ایس کے مطابق اسکریننگ کے دوران چار مشتبہ مسافروں کو الگ کیا گیا تھا، جن کے پمز اسپتال منتقل کرنے کا فیصلہ ہوا، اور پھر ان کے فارم تیار کر کے ایمبولینس میں سوار کیا گیا، تاہم ایئر پورٹ سے نکلنے کے بعد مشتبہ مریض ایمبولینس سے اتر کر فرار ہو گئے۔
منکی پاکس کے مشتبہ مریض کوائف فارم بھی ساتھ لے کر فرار ہوئے ہیں، فرار ہونے والوں میں رحمان طارق، علی حمزہ، ذوالقرنین، نعیم شامل ہیں، ادھر بارڈر ہیلتھ سروسز نے مشتبہ منکی پاکس مریضوں کے فرار پر چپ سادھ لی ہے۔
