واشگنٹن: امریکی صدر ڈونلڈ ٹرمپ نے جو بائیڈن کی بیماری کا سن کر افسردگی کا اظہار کیا ہے۔
تفصیلات کے مطابق صدر ڈونلڈ ٹرمپ نے اپنے سوشل میڈیا پلیٹ فارم ٹروتھ سوشل پر لکھا کہ وہ اور خاتون اوّل میلانیا ٹرمپ جو بائیڈن کی حالیہ طبی تشخیص کے بارے میں سن کر دکھی ہیں۔
انھوں نے سابق خاتون اوّل جِل بائیڈن کا حوالہ دیتے ہوئے کہا ’’ہم جِل اور خاندان کے لیے اپنی پرتپاک اور نیک خواہشات کا اظہار کرتے ہیں، اور ہم جو کی تیز اور کامیاب صحت یابی کے خواہش مند ہیں۔‘‘
سابق امریکی صدر بارک اوباما نے ایکس پر ایک پوسٹ میں کہا کہ وہ اور ان کی اہلیہ مشیل پورے بائیڈن خاندان کے بارے میں فکر مند ہیں۔ اوباما نے کہا کینسر کے لیے کامیاب علاج تلاش کرنے کے لیے جو بائیڈن سے زیادہ کسی نے بھی کام نہیں کیا، اور مجھے یقین ہے کہ وہ اپنے اس عزم اور وقار کے ساتھ اس چیلنج کا مقابلہ کریں گے، ہم جلد اور مکمل صحت یابی کے لیے دعاگو ہیں۔
سابق امریکی صدر جو بائیڈن کینسر میں مبتلا ہو گئے
سابق نائب صدر کملا ہیرس، جنھوں نے بائیڈن کے ماتحت کام کیا، نے X پر لکھا کہ وہ اور ان کے شوہر ڈف ایمہوف بائیڈن کے خاندان کو اپنی دعاؤں میں رکھے ہوئے ہیں۔ انھوں نے لکھا ’’جو ایک فائٹر ہیں اور میں جانتی ہوں کہ وہ اس چیلنج کا مقابلہ اسی طاقت، لچک اور امید کے ساتھ کریں گے، جسے ہم نے ہمیشہ ان کی زندگی اور قیادت میں مشاہدہ کیا۔‘‘
