Tag: باسط علی

بنگلہ دیش کے خلاف تین ٹی 20 میچوں کی سیریز کیلیے قومی ٹیم میں فاسٹ بولر شاہین شاہ آفریدی کو شامل نہ کرنے پر باسط علی بول پڑے۔

اے آر وائی نیوز کے پروگرام اسپورٹس روم میں سابق ٹیسٹ کرکٹر اور موجودہ تجزیہ کار باسط علی نے دورہ بنگلہ دیش کے لیے اعلان کردہ قومی ٹی 20 اسکواڈ کا پوسٹ مارٹم کر دیا اور شاہین شاہ آفریدی کو اسکواڈ کا حصہ نہ بنانے پر شدید ردعمل کا اظہار کیا ہے۔

باسط علی نے کہا کہ بنگلہ دیش کے خلاف تین ٹی 20 میچوں کی سیریز کے لیے شاہین شاہ آفریدی کو شامل نہیں کیا بلکہ سلمان مرزا کو اسکواڈ کا حصہ بنایا۔ کیا شاہین شاہ پاکستانی نہیں؟ کیا اس نے اپنی ٹیم کو پی ایس ایل چیمپئن نہیں بنوایا۔ کیا ٹورنامنٹ میں خود پرفارمنس نہیں دی۔ تو پھر کیوں اس کو قومی اسکواڈ میں شامل نہیں کیا گیا اور کیوں اس کے ساتھ مسلسل زیادتی کی جا رہی ہے۔

سابق کرکٹر نے کہا کہ مان لیا کہ بابر اور رضوان کے ساتھ ٹی 20 میں اسٹرائیک ریٹ کا مسئلہ ہے، لیکن شاہین شاہ کے ساتھ کیا مسئلہ ہے۔ کہا جاتا کہ رویے کا مسئلہ ہے اور جو یہ بات بولتا ہے اس کا مجھے معلوم ہے۔ کیونکہ جو بول رہے ہیں وہ سینئر کھلاڑیوں کو ٹیم میں نہیں چاہتے۔

ان کا کہنا تھا کہ جس طرح ماضی میں رویے کا جواز بنا کر احمد شہزاد اور عمر اکمل کو ٹیم سے باہر کیا گیا۔ اب وہی رویہ شاہین شاہ کے ساتھ رکھا جا رہا ہے۔ میں کوچ اور کپتان کو مشورہ دوں گا کہ ایسا نہ کرو۔

باسط علی نے کہا کہ ہمارے کرکٹ کے اداروں میں اتنے بڑے بڑے پروفیسرز آ گئے ہیں۔ ان کے فیصلوں پر تو ہم صرف سر پکڑتے ہیں کہ یہ کر کیا رہے ہیں۔ بنگلہ دیش ٹور کے لیے صرف دو فاسٹ بولرز شامل کیے گئے ہیں جب کہ آدھا تیتر اور آدھا بٹیر کے مترادف آل راؤنڈرز پر زیادہ انحصار کیا گیا ہے۔ اللہ کرے ٹیم وہاں سے جیت کر آئیں، لیکن اگر انہوں نے تیز وکٹ بنا دی تو پھر پاکستان ٹیم کیا کرے گی۔

ان کا کہنا تھا کہ کرکٹ سے بڑا کوئی نہیں، ویسٹ انڈیز کے ٹور کے بعد سب کے کھاتے کھل جائیں گے۔

باسط علی نے دورہ بنگلہ دیش کے لیے دیگر کچھ کھلاڑیوں کی سلیکشن اور کچھ کو باہر کرنے پر بھی سوالات اٹھائے۔

بنگلہ دیش کیخلاف ٹی 20 سیریز کیلیے قومی اسکواڈ کا اعلان

واضح رہے کہ آج بنگلہ دیش کیخلاف تین ٹی 20 میچوں کی سیریز کے لیے پاکستان ٹیم کا اعلان کیا گیا۔ اسکواڈ میں سابق کپتان بابر اعظم، محمد رضوان، نسیم شاہ، حسن علی اور شاہین شاہ آفریدی جگہ بنانے میں ناکام رہے۔

سابق کرکٹر باسط علی کا کہنا ہے کہ شاہین آفریدی کو کہا تھا تم لمبی ریس کے گھوڑے ہو۔

اے آر وائی پوڈ کاسٹ میں گفتگو کرتے ہوئے سابق کرکٹر باسط علی نے کہا کہ ہم جونیئر کے چیف سلیکٹر بھی رہے جب ہمیں فون کوئی کرتا تھا کہ یہ لڑکا باسط بھائی اچھا ہے ہم کہتے تھے کہ اپنے کام سے کام رکھو، ہمیں اپنی آنکھوں پر بھروسہ ہے جب کوئی انڈر 19 کا میچ ہوتا تھا تو میں دو گھنٹے پہلے جاتا تھا۔

انہوں نے کہا کہ اپنی واک کرتا تھا اور دیکھ رہا ہوتا تھا کہ کون لڑکا کس طرح ٹریننگ کررہا ہے، شاہین آفریدی انڈر 16 کا کھلاڑی تھا اسے ہم نے سلیکٹ نہیں کیا تو کہنے لگا کہ باسط بھائی میں نے پرفارم کیا سب سے زیادہ آؤٹ ہے۔

باسط علی کے مطابق انہوں نے کہا کہ اب تم انڈر 19 ورلڈ کپ کھیلوں گے، اس کے بعد وہ انڈر 19 کھیلا تو اس نے 17 آؤٹ کیے تھے تو وہ لمبی ریس کا گھوڑا تھا۔

باسط علی نے کہا کہ شاہین آفریدی کی فٹنس کے مسائل ہیں، اسے فور ڈے کرکٹ کھیلنی چاہیے، جتنی زیادہ کرکٹ کھیلے گا اتنا اچھا ہوگا۔

سابق کرکٹر نے کہا کہ نسیم شاہ کو انڈر 19 میں بیک انجری ہوئی وہ کہے جائے میں ٹھیک ہوگیا ہوں، ہم نے ڈاکٹرز سے پوچھا تو انہوں نے کہا دو سے تین ماہ لگیں گے، پھر نسیم کو سمجھایا کہ بیٹا جلدی نہ کرو، ہم نے وقار یونس، عمران خان کی بیک انجری دیکھی ہے، تم پاکستان سے کھیلو گے۔

انہوں نے کہا کہ کراچی کے نیشنل اسٹیڈیم میں میچ ہورہا تھا محمد حسنین کے والد میرے برابر میں آکر بیٹھ گئے میری نظریں میچ کی طرف تھیں وہ کہنے لگے یہ بچہ بولنگ کررہا ہے کیسا ہے؟ میں نے پوچھا آپ کا اس سے کیا رشتہ ہے؟ وہ کہنے لگے میرا بیٹا ہے، میں نے کہا آپ میرے ساتھ کھانا کھائیں اور حیدرآباد واپس چلے جائیں یہ بچہ پاکستان سے کھیلے گا۔

باسط علی نے کہا کہ بڑے بڑے وزرا کے فون آئے کہ یہ لڑکا انڈر 19 میں جانا چاہیے، اب ایک لڑکے نے 7 میچوں میں 4 آؤٹ کرے ہیں تو میں اسے کیسے بھیج دوں، میں نے کہا نہیں جائے گا تو وہ کہنے لگے آپ جانتے ہیں میں کون ہوں، میں نے کہا آپ جو کوئی بھی ہیں چیئرمین کو بول کر مجھے ہٹوا دیں لیکن یہ لڑکا نہیں جائے گا۔

سابق کرکٹر باسط علی نے کہا کہ سلمان علی آغا کو جمعہ جمعہ آٹھ دن ہوئے ہیں کپتان بنے ہوئے، یہ ابھی سے اپنی فلاسفی شروع کررہے ہیں۔

اے آر وائی نیوز کے پروگرام میں گفتگو کرتے ہوئے پاکستان کے سابق بیٹر اور موجودہ تجزیہ کار باسط علی کا کہن تھا کہ انھوں نے مائنڈ سیٹ بنا لیا ہے اسلام آباد یونائیٹڈ والا، یہ غلط ہے نظر آرہا ہے، باتیں باہر آرہی ہیں، دیکھ لیں ٹیم میں اسلام آباد یونائیٹڈ کے کتنے پلیئرز ہیں۔

باسط علی نے کہا صرف اس سال کے نہیں بلکہ جو پہلے سے کھیلتے ہوئے آرہے ہیں پچھلے 4 سالوں میں، آپ نام لیں میں بتاتا ہوں کہ کون کون نہیں ہیں۔

سابق کرکٹر کامران اکمل نے کہا کہ نیوزی لینڈ میں تین، چار اسپنرز کو لے کر گئے تھے، پاکستان میں سیریز ہونی ہے گرمی ہے، اسپنرز کا کام ہوگا، یہاں پر آپ نے اسپیشلسٹ رکھے ہی نہیں۔

انھوں نے کہا کہ یہ وینیوز کتنے غلط منتخب کرتے ہیں، پی ایس ایل بھی لاہور، کراچی اور پنڈی میں، اس سیریز میں بھی چھوٹے شہروں کو میزبانی نہیں دی گئی، جب تک آپ چھوٹے شہروں میں کرکٹ کولے کر نہیں جائیں گے تو کرکٹ کیسے پرموٹ ہوگی۔

اسپورٹس میزبان نجیب الحسنین نے کہا کہ ہماری سلیکش کو بلاوجہ برائی لینے کا شوق ہے، بنگلہ دیش کے خلاف سیریز میں صرف دو کھلاڑی سفیان مقیم اور عباس آفریدی ہوتے تو شاید اتنی بات نہ ہوتی، عباس آفریدی کے ساتھ تو شدید زیاتی ہوئی۔

سابق ٹیسٹ کرکٹر باسط علی کی والدہ رضائے الٰہی سے انتقال کرگئیں۔

اے آر وائی نیوز کے مطابق چیئرمین پی سی بی محسن نقوی نے باسط علی کی والدہ کے انتقال پر اظہار افسوس کیا اور کہا کہ اللہ تعالیٰ مرحومہ کی روح کو جوار رحمت میں جگہ دے اور سوگوار خاندان کو ناقابل تلافی نقصان برداشت کرنے کا حوصلہ عطا فرمائے۔

واضح رہے کہ باسط علی چیمپئنز ٹرافی 2025 کے دوران اے آر وائی کے اسپورٹس شوز ’ہر لمحہ پرجوش‘ اور ’اسپورٹس روم‘ میں ٹیموں کی کارکردگی پر تجزیہ پیش کرتے تھے۔