چین کے شہر نانجنگ میں ’عمودی جنگل‘ اگانے پر غور شروع کردیا گیا۔ یہ جنگل دو تجارتی عمارتوں پر اگائے جائیں گے۔

عمودی باغبانی کا تصور چند عشروں قبل ہی پرانا ہے جس میں زمین کے بجائے دیواروں پر باغبانی کی جاتی ہے۔ اس مقصد کے لیے عمارت کی دیوار سے ذرا سے فاصلے پر مختلف سہاروں کے ذریعہ پودے اگائے جاتے ہیں جو نشونما پا کر دیوار کو ڈھانپ لیتے ہیں۔

مختلف گھروں اور عمارتوں کی دیواروں کو اس طریقے سے سبز کردینا اس عمارت کے درجہ حرات کو کم رکھتا ہے جو موسم کی حدت سے لڑنے میں مددگار ثابت ہوتا ہے۔

چین میں بھی دو تجارتی عمارتوں پر عمودی جنگل اگائے جانے کا منصوبہ زیر غور ہے۔ اگر یہ منصوبہ کامیابی سے پایہ تکمیل تک پہنچ جاتا ہے تو یہ نہ صرف چین بلکہ ایشیا کا پہلا عمودی جنگل ہوگا۔

:عمودی باغبانی کے فوائد

ماہرین کا کہنا ہے کہ دنیا کی تیزی سے اضافہ ہوتی آبادی کے باعث جنگلات اور درختوں کو کاٹ کر مختلف رہائشی و تعمیراتی منصوبے بنائے جا رہے ہیں۔ اس سے شہروں سے سبزہ بالکل ختم ہو کر شدید گرمی، اور آلودگی کا سبب بن رہا ہے۔

ایسے میں ماہرین کا خیال ہے کہ عمودی باغبانی کرنا وقت کی اہم ضرورت ہے اور ہمیں بہت جلد اس کی طرف رجوع کرنا ہوگا۔

ماہرین کے مطابق عمارتوں کی دیواروں پر پودے اگانے اور انہیں سر سبز کرنے سے اس علاقے کی آلودگی میں کمی واقع ہوگی۔

اس جگہ کے افراد کو تازہ ہوا میسر آئے گی اور وہ دھوئیں اور گھٹن زد ہوا میں سانس لینے سے کسی حد تک بچ جائیں گے۔

سبزہ اور پودے چونکہ کسی جگہ کے ماحول کو خوشگوار بناتے ہیں لہٰذا عمارتوں کے جنگل کے درمیان میں موجود سبزہ، کنکریٹ اور لوہے کے بوجھ میں کمی کرے گا۔

سبزے کی موجودگی سے لوگوں کے ڈپریشن اور ذہنی دباؤ میں بھی کمی واقع ہوگی۔

اس طریقے سے دیواروں پر مختلف سبزیاں بھی اگائی جاسکتی ہیں جس سے علاقے کی ایک محدود آبادی اپنی غذائی ضروریات میں خود کفیل ہوسکتی ہے۔ انہیں سستی، تازہ اور صاف سبزیاں میسر ہوں گی جبکہ مجموعی طور پر اس سے کسی ملک کی زراعت اور معیشت کے بوجھ پر بھی کمی واقع ہوگی۔

ماہرین اس ضمن میں شہری زراعت کو بھی شہری منصوبہ بندی کا حصہ بنانے پر زور دیتے ہیں۔

اس طریقے سے مختلف عمارتوں کی چھتوں پر زراعت کر کے نہ صرف شہر میں سبزے کی مقدار کو بڑھایا جاسکتا ہے بلکہ بڑھتی ہوئی آبادی کی غذائی ضروریات بھی پوری کی جاسکتی ہیں۔

عمودی باغبانی کا کامیاب تجربہ اس سے قبل کئی ممالک میں کیا جاچکا ہے۔ میکسیکو میں ایک بڑے پل کے ستونوں پر عمودی باغبانی کی گئی جس سے اس پل کے اطراف میں ٹریفک کے شور، دھویں اور آلودگی میں نمایاں کمی دیکھنے میں آئی۔

پیرس: فرانس کے دارالحکومت پیرس میں ایک نیا قانون منظور کیا گیا ہے جس کے تحت اب شہریوں کو کہیں بھی پودے اگانے کی اجازت ہوگی۔

اس سے قبل پیرس کی خوبصورتی کو برقرار رکھنے کے لیے پابندی عائد تھی کہ کوئی بھی شخص بغیر کسی منصوبہ بندی کے کہیں پر بھی باغبانی نہیں کر سکتا۔ لیکن اب نہ صرف اس پابندی کو کالعدم قرار دے دیا گیا ہے بلکہ پیرس کے رہائشیوں پر زور دیا جارہا ہے کہ وہ زیادہ سے زیادہ باغبانی کریں۔

پیرس کی میئر این ہڈ لاگو کے ایک منصوبے کے تحت شہر کے مزید 100 ایکڑ رقبے کو سنہ 2020 تک سبزے میں تبدیل کردیا جائے گا۔ اس مقصد کے لیے شہریوں پر زور دیا جارہا ہے کہ وہ اپنی رہائشی اور کام کرنے والی عمارتوں میں باغبانی کا آغاز کریں، اور اس قانون کی منظوری بھی اسی سلسلے کی ایک کڑی ہے۔

باغبانی کرنے والے افراد کو اس بات کا بھی پابند کیا گیا ہے کہ وہ پودے اگانے کے لیے مکمل طور پر قدرتی طریقے استعمال کریں گے اور کیڑے مار ادویات سے پرہیز کریں گے۔

قانون کی منظوری کے بعد شہریوں کو 3 سال کا قابل تجدید اجازت نامہ بھی جاری کیا جارہا ہے جس کے تحت وہ سبزیاں، پھل، پھول اور دیگر پودے اگا سکتے ہیں۔

شہری حکومت کی جانب سے باغبانی کا آغاز کرنے والے افراد کو ایک پلانٹنگ کٹ بھی دی جارہی ہے جس میں کھاد اور بیج موجود ہوتے ہیں۔

واضح رہے کہ دنیا بھر میں گرم موسموں کی تباہ کاری اور بڑھتی آبادی کی ضروریات کو مدنظر رکھتے ہوئے اس بات پر زور دیا جارہا ہے کہ شہروں میں بڑے پیمانے پر عمارتوں کی چھتوں، اور خالی جگہوں پر مختلف اقسام کے پودے اگائے جائیں۔

ماہرین کی تجویز ہے کہ شہروں میں سبزیوں اور پھلوں کو اگایا جائے تو کسی شہر کی غذائی ضروریات پوری کی جاسکتی ہیں اور کسی ملک کی معیشت اور زراعت پر پڑنے والا بوجھ بھی کم کیا جاسکے گا۔

شہری زراعت ۔ مستقبل کی اہم ضرورت *