ARYNews.tv | Urdu – Har Lamha Bakhabar

Tag: بالاکوٹ

  • ایڈونچر کے شوقین سیاح تیار ہوجائیں‌! اب بیرون ممالک جانے کی ضرورت نہیں

    ایڈونچر کے شوقین سیاح تیار ہوجائیں‌! اب بیرون ممالک جانے کی ضرورت نہیں

    بالاکوٹ : پاکستان میں پہلی مرتبہ ہاٹ ائیر بیلون لانچ کردیا گیا، یہ ایڈونچر سیاحت کے شوقین افراد کے لئے کسی عجوبہ سے کم نہیں۔

    تفصیلات کے مطابق دنیا کے بلند ترین ہارٹ ایئر بیلون کو پاکستان میں پہلی مرتبہ سیاحتی مقام پر لانچ کردیا گیا، ضلع مانسہرہ کے تاریخی مقام بالاکوٹ میں پاکستان کے پہلے ہاٹ ائیر بیلون کا باقاعدہ افتتاح کیا گیا۔

    یہ پاکستان میں ونٹر ٹورازم اور بین الاقوامی سیاحت کے فروغ میں سنگ میل ثابت ہوگا۔

    بیلون پائلٹ عبدالباسط کا کہنا ہے کہ ایڈونچر کے شوقین سیاحوں کو اب بیرون ممالک جانے کی ضرورت نہیں، وہ ہاٹ ائیر بیلون میں بیٹھ کر دریائے کنہار سمیت کاغان ویلی کے بلندو بالا سیاحتی مقامات کے دلکش نظاروں سے خوب لطف اندوز ہو سکیں گے۔

    یاد رہے ترکی، تھائی لینڈ اور چائنہ جیسے ملک دنیا بھر سے ہاٹ ائیر بلوننگ کے ذریعے سیاحوں کی دلچسپی حاصل کرنے میں کامیاب ہو چکے ہیں۔

    خیال رہے ہاٹ ایئر بیلون رائیڈز پیشہ ورانہ کمپنیاں چلاتی ہیں جو اپنے صارفین کو محفوظ اور پرلطف تجربات فراہم کرنے کا وسیع تجربہ رکھتی ہیں۔ یہ کمپنیاں جدید آلات استعمال کرتی ہیں اور سخت حفاظتی پروٹوکول پر عمل کرتی ہیں، تاکہ مسافر پرواز کے دوران اپنی حفاظت اور آرام کے بارے میں پراعتماد رہ سکیں۔

    ARY News Urdu- انٹرٹینمنٹ، انفوٹینمنٹ میگزین

  • سستی بجلی کی پیداوار کے لیے انقلابی قدم

    سستی بجلی کی پیداوار کے لیے انقلابی قدم

    پشاور: خیبر پختون خوا میں سستی بجلی کی پیداوار کے لیے بالا کوٹ ہائیڈرو پاور پراجیکٹ کی تعمیر کے سلسلے میں معاہدے پر دستخط ہو گئے۔

    تفصیلات کے مطابق ایشین ترقیاتی بینک اور کے پی حکومت کے درمیان بالاکوٹ ہائیڈرو پاور پراجیکٹ کی تعمیر کے معاہدے پر دستخط ہو گئے، منصوبے کی مجموعی لاگت 750 ملین ڈالر ہے۔

    ذرائع کے پی حکومت کا کہنا ہے کہ منصوبے کے لیے 580 ملین ڈالر ایشین ترقیاتی بینک فراہم کرے گا، جب کہ باقی رقم صوبائی حکومت ادا کرے گی، بالاکوٹ ہائیڈرو پاور پراجیکٹ 6 سال کی مدت میں تعمیر کی جائے گی۔

    اس منصوبے سے 300 میگا واٹ بجلی پیدا ہوگی اور صوبائی حکومت کو اس سے سالانہ 14 ارب روپے ملیں گے، خیال رہے کہ بالا کوٹ ہائیڈرو پاور پراجیکٹ دریائے کنہار پر تعمیر کیا جائے گا۔

    جلد ہی اس اہم منصوبے کا سنگ بنیاد رکھا جائے گا، توقع ہے وزیر اعظم عمران خان خود اس منصوبے کا سنگ بنیاد رکھیں گے، اس منصوبے کی تعمیر کے دوران روزگار کے 1200 سے زائد مواقع پیدا ہوں گے۔

    علاوہ ازیں، وزیر اعلیٰ کے پی کے معاون خصوصی کامران بنگش نے بتایا ہے کہ قبائلی اضلاع میں تاریخ میں اتنا ترقیاتی کام نہیں ہوا جتنا ہم نے کیا، یہاں پہلے سال 24 ارب روپے کے ترقیاتی کام ہوئے، انضمام کے دوسرے سال 26 ارب سے زائد کے ترقیاتی کام ہوئے۔

  • دریائے کنہار پر بجلی گھر کی تعمیر کا منصوبہ، اے ڈی بی کے ساتھ معاہدہ

    دریائے کنہار پر بجلی گھر کی تعمیر کا منصوبہ، اے ڈی بی کے ساتھ معاہدہ

    اسلام آباد: حکومت پاکستان اور ایشین ڈیولپمنٹ بینک (اے ڈی بی) میں بالا کوٹ پن بجلی منصوبے کے معاہدے پر دستخط ہو گئے۔

    تفصیلات کے مطابق 300 میگا واٹ بالاکوٹ ہائیڈرو پاور پراجیکٹ کی تعمیر میں اہم پیش رفت ہوئی ہے، حکومت پاکستان اور ایشیائی ترقیاتی بینک کے درمیان منصوبے کی فنانسنگ ایگریمنٹ پر دستخط ہو گئے۔

    معاہدے کے تحت اے ڈی بی پاکستان کو بالاکوٹ پن بجلی منصوبے کے لیے آسان شرائط پر 300 ملین امریکی ڈالر فراہم کرے گا، اس حوالے سے آج دستخط کی تقریب منعقد ہوئی، جس میں وفاقی وزیر اقتصادی امور عمر ایوب اور وزیر اعلیٰ کے پی نے شركت کی۔

    ایشیائی ترقیاتی بینک یہ قرضہ 27 سال کی مدت کے لیے فراہم کر رہا ہے، جب کہ یہ منصوبہ 85 ارب روپے کی مجموعی لاگت سے 6 سال کے عرصے میں مکمل کیا جائے گا۔

    وفاقی وزیر عمر ایوب نے منصوبے سے متعلق بتایا کہ یہ پن بجلی گھر مانسہرہ میں دریائے کنہار پر تعمیر کیا جائے گا، جس سے 300 میگا واٹ بجلی پیدا ہو سکے گی، اور یہ پاور پراجیکٹ ماحول دوست سستی توانائی کے حصول میں مددگار ہو گا۔

    خیبر پختون خوا کے وزیر اعلیٰ محمود خان نے کہا کہ جلد ہی اس اہم منصوبے کا سنگ بنیاد رکھا جائے گا، توقع ہے وزیر اعظم عمران خان خود اس منصوبے کا سنگ بنیاد رکھیں گے، اس منصوبے کی تعمیر کے دوران روزگار کے 1200 سے زائد مواقع پیدا ہوں گے۔

    انھوں نے کہا موجودہ حکومت صوبے میں پن بجلی کے مواقع سے بھر پور استفادے کے لیے مؤثر اقدامات اٹھا رہی ہے۔

  • سیاحوں پر ناران کاغان جانے کے لیے کوئی پابندی نہیں: انتظامیہ

    سیاحوں پر ناران کاغان جانے کے لیے کوئی پابندی نہیں: انتظامیہ

    وادئ کاغان: مقامی انتظامیہ نے کہا ہے کہ ناران کاغان کے کچھ ہوٹل جزوی بندش کے بعد کھول دیے گئے ہیں، سیاحوں پر ناران کاغان جانے کے لیے کوئی پابندی نہیں ہے۔

    اے آر وائی نیوز کے مطابق ناران کاغان کی انتظامیہ نے کچھ ہوٹلز کی بندش کے حوالے سے بیان جاری کرتے ہوئے کہا ہے کہ مذکورہ ہوٹل اسٹاف میں کرونا کیسز رپورٹ ہوئے تھے جس پر انھیں بند کر دیا گیا تھا، تاہم اب ان ہوٹلوں کو ڈس انفیکٹ کرنے کے بعد کھول دیا گیا ہے۔

    انتظامیہ نے بتایا کہ ناران کاغان کے ہوٹلوں میں احتیاطی تدابیر پر مکمل عمل درآمد یقینی بنایا گیا ہے، 5 ایسے ہوٹل ہیں جن میں اسمارٹ لاک ڈاؤن نافذ کیا جا رہا ہے۔

    کرونا وائرس کیسز کی بنیاد پر ناران کے ہوٹلز بند کیے جانے کے بعد احتجاج کیا جا رہا ہے

    معاون خصوصی اطلاعات خیبر پختون خوا کامران بنگش نے بھی اس سلسلے میں بیان جاری کیا ہے کہ سیاحتی مقامات پر کسی بھی قسم کی پابندی زیر غور نہیں، کاغان ڈویلپمنٹ اتھارٹی اور انتظامیہ نے ہوٹلز انتظامیہ کے نمونے لیے تھے، 7 ہوٹلز اور ریسٹورنٹس کے افراد میں کرونا کی تشخیص ہوئی ہے اس لیے ان پر اسمارٹ لاک ڈاؤن نافذ کر دیا گیا ہے۔

    یاد رہے کہ گزشتہ ماہ 18 تاریخ کو ایس او پیز کی خلاف ورزی پر انتظامیہ نے کارروائی کرتے ہوئے ناران میں درجنوں ہوٹلز کو سیل کر دیا تھا، اسسٹنٹ کمشنر بالاکوٹ کی جانب سے ناران میں موجود سیاحوں کو انخلا کے لیے اگلے دن دوپہر 12 بجے تک کا وقت دیا گیا تھا اور سیاحوں کے خلاف کارروائی کا بھی عندیہ دیا تھا۔

    اسسٹنٹ کمشنر بالاکوٹ نے ناران میں 40 ہوٹل سیل کیے، ہوٹل مالکان پہلے ہی کرونا سے معاشی طور پر شدید متاثر تھے

    اے سی بالاکوٹ نے ہدایت جاری کی تھی کہ جب تک پابندی ہے عوام سیاحتی علاقوں کا رخ نہ کریں۔ اس کارروائی کے بعد ناران میں ہوٹل ایسوسی ایشن اور شہریوں نے احتجاجی مظاہرہ بھی کیا تھا۔

    اگلے دن ڈپٹی کمشنر نے بیان جاری کیا کہ سیاحتی مقامات حکومتی ہدایت پر بند کیے گئے ہیں، اس لیے سیاح شوگراں کاغان اور ناران جانے سے گریز کریں۔

  • بھارتی ایئر فورس نے بالاکوٹ حملے میں ناکامی تسلیم کرلی

    بھارتی ایئر فورس نے بالاکوٹ حملے میں ناکامی تسلیم کرلی

    نئی دہلی : بھارتی ایئرفورس حکام نے پہلی بار بالاکوٹ ایئر اسٹرائیک کے حوالے سے اپنی ناکامی کا اعتراف کرتے ہوئے تسلیم کر لیا ہے کہ اس حملے میں بھارتی فضائیہ مطلوبہ ہدف حاصل کرنے میں کامیاب نہیں ہوئی۔

    تفصیلات کے مطابق بھارتی ایئرفورس کی رپورٹ جس کا عنوان ”حاصل شدہ سبق‘ ‘تھا میں اس بات کا اعتراف کیا گیا ہے کہ بھارتی ٹیکنیشنز کی جانب سے ہتھیاروں کی پروگرامنگ کے کوڈ میں تبدیلی کی بدولت میراج2000 ایئرکرافٹ اپنا مطلوبہ ہدف پورا نہیں کرسکا۔

    بھارتی ایئر فورس حکام کی جانب سے جاری اس رپورٹ سے قبل بھارتی وزیر خارجہ سشما سوراج نے بھی ایک تقریب کے دوران اس بات کا اعتراف کیا تھا کہ بالا کوٹ حملے میں نہ توکوئی پاکستانی شہری یا فوجی ہلاک ہوا اور نہ ہی کوئی شخص زخمی ہوا۔

    بھارتی ایئرفورس حکام کی تازہ رپورٹ نے آسٹریلیا کے اسٹرٹیجک پالیسی انسٹیٹیوٹ کی رپورٹ کی تصدیق کردی ہے جس میں کہا گیا تھا کہ بھارت کے پرسیشن گائیڈڈ ہتھیاروں (پی جی ایمز) کی پروگرامنگ کو صحیح طریقے سے سیٹ نہیں کیا گیا تھا جس کی وجہ سے بھارتی ایئرفورس نے مطلوبہ اہداف حاصل نہیں کیے۔

    حکام کی رپورٹ نے بھارتی ایئر فورس کی جانب سے ایئر کرافٹ میں نصب جدید سسٹم کی مہارت پر بھی سوال اٹھائے ہیں۔

    بھارتی ایئرفورس کے ایک سینئر اہلکار نے ہندوستان ٹائمز کو بتایا کہ بالاکوٹ اسٹرائیک سے ثابت ہوا کہ ایئر کرافٹ میں جدید ہتھیاروں کے استعمال کے لیے بھارت کو اوای ایم سسٹم کی اشد ضرورت ہے اگرچہ اس سسٹم کی لاگت بہت زیادہ ہے۔

  • غیرملکی صحافیوں، سفراء اور دفاعی اتاشیز کا دورہِ بالاکوٹ ، آئی ایس پی آر نے بھارت کے دعوے کی حقیقت دنیا کو دکھا دی

    غیرملکی صحافیوں، سفراء اور دفاعی اتاشیز کا دورہِ بالاکوٹ ، آئی ایس پی آر نے بھارت کے دعوے کی حقیقت دنیا کو دکھا دی

    راولپنڈی: پاک فوج کے ترجمان نے کہا ہے کہ عالمی میڈیا، سفیروں اور دفاعی اتاشیز نے بالا کوٹ کے مقام کا دورہ کیا اور انہوں نے اپنی آنکھوں سے تمام حقیقت دیکھ لی۔

    پاک فوج کے شعبہ تعلقاتِ عامہ (آئی ایس پی آر) کی جانب سے جاری ہونے والے اعلامیے کے مطابق انٹرنیشنل میڈیا،سفیروں اور ڈیفنس اتاشیز نے بالاکوٹ اور جابہ کے مقام کا دورہ کیا، تمام لوگوں نے بھارتی دعوے کی حقیقت کو اپنی آنکھوں سے دیکھ لیا۔

    آئی ایس پی آر کے مطابق انٹرنیشنل میڈیا نمائندوں میں اکثر  ایسے صحافی شامل تھے جو بھارت میں کام کررہے ہیں، انہیں میجر جنرل آصف غفور نے بھارت کی جانب سے کیے جانے والے جھوٹے دعوے پر تمام صورتحال سے آگاہ کیا۔ ڈی جی آئی ایس پی آر نے زمینی حقائق اور دیگرشواہد کے حوالے سے بھی وفدکوآگاہ کیا جبکہ میجر جنرل آصف غفور نے نےوفدکوبھارتی بم کریٹر بھی دکھائے، صحافیوں اور مبصرین کے وفد نے اُس مقام کا بھی دورہ کیا جہاں مدرسہ واقع ہے۔

    وفد نے مدرسے کے طلبا اور اساتذہ سے بھی بات چیت کی جبکہ مدرسہ بھی دیکھا جو اپنی جگہ پر موجود ہے۔ ڈی جی آئی ایس پی آر کا کہنا تھا کہ بھارت جھوٹےدعوؤں کےبجائےسچائی تسلیم کرے اور خطے میں امن کے فروغ کے لیے ذمہ دار ریاست کا کردار ادا کرے اور مقبوضہ کشمیر کی بگڑتی صورتحال پر توجہ دے۔  آئی ایس پی کے مطابق بعد ازاں وفد نے آرمی پبلک اسکول سوات کا دورہ کیا اور مختلف حصوں کا معائنہ بھی کیا علاوہ ازیں عالمی میڈیا کے نمائندوں نے مالاکنڈمیں بحالی نو مرکز کابھی دورہ کیا۔

    مزید پڑھیں: بالاکوٹ میں بھارت کی فضائی کارروائی ناکام رہی، برطانوی نشریاتی ادارے کی رپورٹ

    اسی سے متعلق: بالاکوٹ حملہ ،برطانوی نیوزا یجنسی نے بھارتی دعویٰ جھوٹ قرار دے دیا

    یہ بھی پڑھیں:  بالا کوٹ اسکرپٹ: بھارتی وزیر نے لڑکیوں کے اسکول کو مدرسہ بنا دیا

    واضح رہے کہ 25 اور 26 فروری کی درمیانی شب بھارتی طیاروں نے پاکستانی فضائی حدود کی خلاف ورزی کی تھی اور اُس کے جہاز بالاکوٹ میں واقع جابا کے مقام پر اپنا ایمونیشن گراکر فرار ہوگئے تھے۔ بعد ازاں بھارت نے بالاکوٹ حملے کو کامیاب کارروائی قرار دیا تھا اور دعویٰ کیا تھا کہ انڈین فضائیہ کی کارروائی میں 300 سے ساڑھے تین سو افراد مارے گئے جبکہ حقیقت میں فیول ٹینک کے دھماکوں سے صرف درخت تباہ ہوئے تھے۔

    اسے بھی پڑھیں: بھارتی جھوٹ پھر بے نقاب، پاک فوج نے ناقابل تردید ثبوت پیش کردیئے

    بھارتی دعوے کے بعد امریکی اور برطانوی نشریاتی اداروں کی تحقیقاتی ٹیموں نے سیٹلائٹ اور تصاویر کی مدد سے رپورٹ تیار کی تھی جس میں انہوں نے بھارتی فضائیہ کے دعوے کو مضحکہ خیز قرار دیا تھا۔ یہ بھی یاد رہے کہ 27 فروری کو بھارتی طیاروں نے ایک بار پھر پاکستانی فضائی حدود کی خلاف ورزی کی کوشش کی تھی مگر اس بار پاک فضائیہ کے شیر دلوں نے بھرپور جواب دیتے ہوئے دو بھارتی طیارے مار گرائے تھے جس کے نتیجے میں ایک پائلٹ ابھی نندن کو بھی حراست میں لیا گیا تھا۔

  • بالاکوٹ اسکرپٹ، مودی سرکار ثبوت دینے میں تاحال ناکام، بھارتی صحافی نے میڈیا کو آئینہ دکھا دیا

    بالاکوٹ اسکرپٹ، مودی سرکار ثبوت دینے میں تاحال ناکام، بھارتی صحافی نے میڈیا کو آئینہ دکھا دیا

    نئی دہلی: بھارتی حکومت پاکستانی علاقے بالاکوٹ میں کارروائی کے ثبوت فراہم کرنے میں تاحال ناکام ہے جس کے بعد مودی سرکار کو ہرطرف سے ہزیمت کا سامنا کرنا پڑ رہا ہے۔

    بھارتی صحافی راج دیپ سردیسائی نے بھارتی حکومت اور میڈیا کو تنقید کا نشانہ بناتے ہوئے کہا ہے کہ بالا کوٹ حملے کے نام پر قومی سلامتی کے ساتھ کھیل بند کیا جانا چاہیے۔

    سماجی رابطے کی ویب سائٹ پر اُن کا کہنا تھا کہ بھارتی میڈیا پر غیر تصدیق شدہ اموات منظر عام پر لانے کا احمقانہ فیصلہ کس نے کیا؟ سوال یہ پیدا ہوتا ہے کہ 300 سے 350 افراد کے مارے جانے کی خبر چینلز کو حکومت ، بی جے پی آئی ٹی سیل نے دی یا پھر میڈیا نے خود ہی قیاس آرائیاں کی تھیں؟۔

    مزید پڑھیں: پاکستان کے خلاف فضائی کارروائی، بھارتی وزیر نے حکومت کا جھوٹ بے نقاب کردیا

    انہوں نے بھارتی فضائی کارروائی کو بلاواسطہ ناکام قرار دیتے ہوئے کہا کہ حکومت پلوامہ کا بدلہ لینا چاہتی تھی مگر ناکام آپریشن کے بعد کرکٹ کے اسکور بورڈ کی طرح مرنے والوں کی تعداد پیش کی گئی۔

    یاد رہے کہ بھارت کی حکمراں جماعت، فوجی ترجمان اور چیلنز نے بالا کوٹ حملے کو کامیاب قرار دیتے ہوئے دعویٰ کیا تھا کہ فضائیہ کی کارروائی میں 300 سے 350 سے افراد مارے گئے۔

    بھارت کےباشعور صحافیوں اور اپوزیشن جماعتوں نے حکومت سے اتنی بڑی کامیابی کے دعوے پر جب ثبوت مانگے تو وہ ابھی تک پیش نہ کرسکے، بھارتی فضائیہ کے سربراہ نے پریس کانفرنس میں کہا کہ کارروائی کرنا ہمارا کام تھا ہلاکتوں کی تعداد یا بندوں کی گنتی حکومت کا کام ہے۔

    قبل ازیں بھارت کی بری، بحری اور فضائیہ فوج کے ترجمان نے نئی دہلی میں پریس کانفرنس کرتے ہوئے بالا کوٹ حملے کو کامیاب قرار دیا تھا مگر جب وہاں موجود صحافیوں نے ثبوت مانگنے شروع کیے تو فوجی ترجمان نے آئیں بائیں شائیں سے کام لیا اور بات گھمانے کی کوشش کی۔

    یہ بھی پڑھیں: ایف 16 طیارے کا استعمال؟ بھارتی میڈیا نے نسوار کی تھیلی بطور ثبوت پیش کردی

    بھارت کی اپوزیشن جماعتیں بھی مودی یا فوجی دعوے کو ماننے سے انکاری ہیں اور انہوں نے پروزور مطالبہ کررکھا ہے کہ اگر کارروائی کامیاب ہوئی تو اس کے ثبوت ، تصاویر قوم کے سامنے پیش کیے جائیں۔

  • بھارتی طیاروں نے پے لوڈ کہاں گرائے؟ خصوصی مناظر اے آر وائی نیوز پر

    بھارتی طیاروں نے پے لوڈ کہاں گرائے؟ خصوصی مناظر اے آر وائی نیوز پر

    بالاکوٹ: اے آر وائی نیوز نے بھی بھارت کے جھوٹ کا پول کھول دیا، نیوز ٹیم نے بالاکوٹ پہنچ کر حقیقت پوری دنیا کو دکھا دی۔

    تفصیلات کے مطابق اے آر وائی نیوز کی ٹیم نے بالاکوٹ میں جس جگہ کو دہشت گردوں کا کیمپ قرار دیا وہاں آبادی تھی ہی نہیں، نیوز ٹیم نے جابہ میں جا کر پے لوڈ سے بننے والے گڑھے بھی دیکھے۔

    [bs-quote quote=”ٹیم نے دیکھا کہ دہشت گردوں کا کوئی کیمپ نہ کوئی لاش ملی، نہ ہی کوئی آبادی تھی۔” style=”style-8″ align=”left”][/bs-quote]

    ٹیم نے بتایا کہ کیا ہزار کلو گرام کے بموں سے اتنے چھوٹے گڑھے پڑتے ہیں، ویڈیو میں غیر آباد پہاڑی علاقے میں بکھرے مٹی اور پتھرصاف دیکھے جا سکتے ہیں۔

    ویڈیو میں دیکھا جا سکتا ہے کہ ایک درخت تنے سے ٹوٹا پڑا ہے، ٹیم نے دیکھا کہ دہشت گردوں کا کوئی کیمپ نہ کوئی لاش ملی، نہ ہی کوئی آبادی تھی۔

    اے آر وائی نیوز کی ٹیم سب سے پہلے اس جگہ پہنچی جہاں پے لوڈ گرایا گیا، اور بھارتی حملے کی حقیقت بے نقاب کر دی، اینکر پرسن ارشد شریف نے بھارتی دعوؤں سے پردہ اٹھا دیا۔

    بھارتی طیارے نے جلدی بھاگنے کے لیے جہاں پے لوڈ گرایا وہاں ایک گڑھا بن گیا ہے، وہاں ایک درخت بھی ملا جس کو نقصان پہنچا۔ پے لوڈ کے گرنے سے صرف ایک شخص معمولی زخمی ہوا۔

    یہ بھی پڑھیں:  بھارتی صحافی اور عالمی میڈیا نے بھارتی سرجیکل اسٹرائیک کے دعوے کو مضحکہ خیز قرار دے دیا

    واضح رہے کہ اے آر وائی نیوز حقیقت دنیا کو بتاتا رہے گا، بھارت کے جھوٹے دعوؤں سے پردہ اٹھاتا رہے گا۔

    خیال رہے کہ گزشتہ روز رات کی تاریکی میں بزدل دشمن نے چھپ کر وار کی کوشش کی لیکن پاک فضائیہ نے بھارتی طیاروں کو ان کی اوقات دکھا دی، بھرپور ایکشن پر بھارتی طیارے بھاگ نکلے۔

  • بالاکوٹ شہر دوبارہ تعمیر کیا جائے گا، 13 سال بعد معاہدہ طے

    بالاکوٹ شہر دوبارہ تعمیر کیا جائے گا، 13 سال بعد معاہدہ طے

    اسلام آباد: 2005 کے ہول ناک زلزلے میں تباہ ہونے والے تاریخی شہر بالاکوٹ کو دوبارہ تعمیر کیا جائے گا، سپریم کورٹ کے حکم پر فریقین میں معاہدہ طے پا گیا۔

    تفصیلات کے مطابق سپریم کورٹ میں 2005 زلزلہ متاثرین کے فنڈ میں بے قاعدگیوں کے کیس کی سماعت ہوئی، عدالت نے فریقین کے درمیان معاہدہ کروایا۔

    [bs-quote quote=”ڈی سی مانسہرہ نئے شہر کے لیے 94 فی صد زمین فراہم کریں گے، 6 فی صد زمین قابضین سے خالی کرائی جائے گی۔” style=”style-7″ align=”left” color=”#dd3333″][/bs-quote]

    معاہدے کے مطابق زلزلہ متاثرین کی بحالی اور تعمیر نو کا ادارہ ایرا کا فنانس ڈویژن سالانہ ترقیاتی بجٹ سے ایک ارب فنڈ جاری کرے گا۔

    فریقین میں سیکریٹری اکنامک افیئرز، ڈی سی مانسہرہ، ایڈیشنل سیکریٹری فنانس، ڈی جی پیرا، ڈی جی ایرا اور صوبائی پولیس افسران شامل ہیں۔

    معاہدے کے مطابق چیف سیکرٹری خیبر پختونخوا کی سربراہی میں ایپکس کمیٹی قائم کی جائے گی، مذکورہ فریقین اس کمیٹی کا حصہ ہوں گے، یہ کمیٹی نئے بالاکوٹ شہر کی تعمیر کے لیے اقدامات کرے گی۔

    معاہدے میں طے ہوا ہے کہ ڈی سی مانسہرہ نئے شہر کے لیے 94 فی صد زمین فراہم کریں گے، 6 فی صد زمین قابضین سے خالی کرائی جائے گی، ضلعی پولیس ایرا کو ہر ممکن مدد فراہم کرے گی، چیف سیکریٹری کے پی اس پراجیکٹ کی اونر شپ لیں گے، ایرا اس منصوبے کا پی سی وَن تیار کر کے ایک ماہ میں ایکنک میں پیش کرے گی۔

    معاہدہ میں کہا گیا ہے کہ منصوبے کا تخمینہ 16 ارب روپے ہے، ایرا کو اس بات کا پابند بنایا گیا ہے کہ لاگت زیادہ نہ بڑھے۔

    یہ بھی پڑھیں:  زلزلہ متاثرین فنڈ کیس: چیف جسٹس ترقیاتی کاموں کا جائزہ لینےکےلیےبالاکوٹ روانہ

    یاد رہے کہ کشمیر اور صوبۂ خیبر پختونخوا میں 8 اکتوبر 2005 میں زلزلہ آیا تھا جس میں 70 ہزار سے زائد لوگ جاں بحق ہو گئے تھے۔ حکومتِ پاکستان نے متاثرہ علاقوں کی بحالی کے لیے ’ایرا‘ کے نام سے ایک ادارہ قائم کیا جس کے بجٹ میں بے ضابطگیاں پائی گئیں۔

    25 اپریل 2018 کو کیس کی سماعت کرتے ہوئے چیف جسٹس نے وزارتِ خزانہ اور ایرا کے حکام کی سرزنش کرتے ہوئے کہا تھا کہ زلزلہ متاثرین کے کمبل تک فروخت کیے گئے۔

    چیف جسٹس کے استفسار پر وزارتِ خزانہ نے عدالت کو آگاہ کیا تھا کہ بیرون ملک سے زلزلہ متاثرین کے لیے 2 ارب 89 کروڑ ڈالر امداد آئی، جب کہ اندرون ملک سے ملنے والی امداد کا حساب موجود نہیں ہے۔ عدالت کو یہ بھی بتایا گیا کہ عالمی کانفرنس میں زلزلہ متاثرین کے لیے 3 ارب 60 کروڑ ڈالر اکٹھے کیے گئے تھے۔

  • کاغان : سیاحوں کی گاڑی دریا میں گرنےسے5 افراد جاں بحق

    کاغان : سیاحوں کی گاڑی دریا میں گرنےسے5 افراد جاں بحق

    بالاکوٹ: وادی کاغان کی سیر کےلیےآنے والے سیاحوں کی گاڑی دریائے کنہار میں جا گری جس کے نتیجے میں 5 سیاح ڈوب کر جاں بحق اور ایک سیاح زخمی ہوگیا۔

    تفصیلات کےمطابق وادی کاغان کی سیروتفریح کے بعد گھر واپسی پرمانسہرہ کی طرف آتے ہوئے مہانڈری کے قریب پنجاب کےضلع بہاولپور سے تعلق رکھنے والے سیاحوں کی گاڑی بےقابو ہوکردریائےکنہار میں جا گری۔ حادثےمیں 5افراد جاں بحق ہوگئے۔

    حادثے میں احمد نامی سیاح بچ گیا جسے زخمی حالت میں مقامی افراد اور پولیس نے اسپتال منتقل کر دیا۔

    پولیس کاکہناہےکہ دریائے کنہار میں ڈوبنے والوں سیاحوں اور گاڑی کی تلاش کا عمل جاری ہے تاہم آخری اطلاعات تک ان کے بارے میں کوئی پتہ نہیں چل سکا۔

    بونیرمیں مسافر وین کھائی میں جاگری‘9افراد جاں بحق

    یاد رہےکہ رواں سال جنوری میں صوبہ خیبرپختونخواہ کےضلع بونیر میں مسافر وین کھائی میں جاگری جس کے نتیجے میں خواتین سمیت 9افراد جاں بحق ہوگئےتھے۔

    دریائے نیلم میں بس گرنے سے 20 افراد جاں بحق

    واضح رہےکہ گزشتہ سال ستمبر میں وادی نیلم کے قریب مسافر بس کھائی میں گرنے سے خواتین سمیت 20 افراد جاں بحق اور 5 زخمی ہوگئےتھے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔