ممبئی: بالی ووڈ اور تنازعات کا چولی دامن کا ساتھ رہا ہے، رواں برس 2022 میں بھی بھارتی فلم انڈسٹری کو بڑے تنازعات کا سامنا رہا۔
1: ٹوئٹر پر بائیکاٹ ٹرینڈ
’مسٹر پرفیکشنسٹ‘ عامر خان کی فلم ’لال سنگھ چڈھا‘ ابھی ریلیز نہیں ہوئی تھی کہ سوشل میڈیا پر اس کے خلاف ایک طوفان اٹھ کھڑا ہوا، ٹوئٹر پر اس فلم کے خلاف باقاعدہ طور پر بائیکاٹ کا ٹرینڈ چلایا گیا۔ صارفین نے ہیش ٹیگ کا استعمال کرتے ہوئے لوگوں سے فلم نہ دیکھنے کے لیے کہا۔ اس ٹرینڈ سے یہ بات واضح طور پر سامنے آئی کہ ٹرولز کے ایک گروپ کی جانب سے فلم کے خلاف پھیلائی جانے والی نفرت کا اثر باکس آفس کی کمائی پر پڑا۔
عامر خان کی یہ فلم مشہور ہالی ووڈ فلم ’فاریسٹ گمپ‘ کا ری میک تھی، بہت اچھی بنی تھی لیکن بائیکاٹ ٹرینڈ نے اسے فلاپ ثابت کر دیا۔ اس نفرت انگیز مہم کے دوران عامر خان کی ایک پرانی ویڈیو وائرل کی گئی جس میں انھوں نے کہا تھا کہ بھارت میں بڑھتی ہوئی عدم برداشت کی وجہ سے ان کی اہلیہ اپنے ملک میں رہنے سے ڈرتی ہیں۔
2: دی کشمیر فائلز پروپیگنڈا فلم قرار دے دی گئی
کشمیر فائلز نامی یہ فلم کہیں بہت پسند کی جا رہی تھی، اور کہیں پر اس پر سوالات بھی اٹھائے جا رہے تھے، یہ کہا جا رہا تھا کہ یہ فلم کشمیری مسلمانوں کے خلاف بنائی گئی ہے۔ لیکن ’دھماکا‘ اس وقت ہوا جب گزشتہ ماہ گوا میں منعقد ہونے والے انٹرنیشنل فلم فیسٹیول آف انڈیا میں اس کی اسکریننگ کی گئی، اور اختتامی تقریب میں فیسٹیول کی جیوری کے سربراہ اسرائیلی فلم ساز نادو لیپڈ نے حاضرین سے خطاب کرتے ہوئے اس فلم کو ’پروپیگنڈا اور بے ہودہ‘ قرار دے دیا۔
لیپڈ نے اپنے خطاب میں کہا کہ ہم سب 15 ویں فلم دی کشمیر فائلز کو دیکھ کر پریشان اور حیران تھے، یہ ہمیں ایک پروپیگنڈا اور بے ہودہ فلم کی طرح محسوس ہوئی، اور اس طرح کے باوقار فلمی میلے کے لیے یہ ایک نامناسب فلم ہے، جہاں پر فن کارانہ صلاحیتوں کی بنیاد پر مقابلہ کیا جاتا ہے۔ اس کے بعد فلم کے ہدایت کار وویک اگنی ہوتری سمیت بہت سے لوگوں نے نادو پر تنقید شروع کر دی، یہاں تک کہ اگنی ہوتری نے نادو کو چیلنج کیا کہ وہ ثابت کریں کہ فلم حقیقت میں کیسے غلط ہے۔ تاہم اس کے بعد جیوری کے دیگر ارکان نے بھی نادو لیپڈ کی حمایت کی۔
3: رنویر سنگھ کا برہنہ فوٹو شوٹ
رواں برس کے شروع میں بالی ووڈ اداکار رنویر سنگھ اس وقت ایک بڑے تنازعے کا شکار ہو گئے، اور ان کے خلاف باقاعدہ طور پر ایف آئی آر بھی درج کرائی گئی، جب انھوں نے ایک میگزین کے لیے برہنہ فوٹو شوٹ کروایا۔ رنویر کے فوٹو شوٹ کی تصاویر 21 جولائی کو آن لائن پوسٹ کی گئی تھیں، جن میں وہ بغیر کپڑے پہنے نظر آ رہے تھے۔
ممبئی پولیس نے رنویر کے خلاف تعزیرات ہند کی مختلف دفعات جیسا کہ 292 (فحش کتابوں کی فروخت وغیرہ)، 293 (نوجوانوں کو فحش اشیا کی فروخت)، 509 (لفظ، اشارہ یا عمل سے عورت کی توہین کرنا) کے تحت مقدمہ درج کیا تھا۔
4: جیکولین فرنینڈس کا منی لانڈرنگ اسکینڈل
بالی ووڈ اداکارہ جیکولین فرنینڈس کا نام منی لانڈرنگ کے ایک بڑے اسکینڈل میں اس وقت آیا جب 17 اگست 2022 کو دہلی کی ایک عدالت میں مجرم سکیش چندر شیکر کے خلاف 200 کروڑ روپے کی منی لانڈرنگ کیس میں ایک ضمنی چارج شیٹ میں جیکولین کا نام بھی بہ طور ملزم درج کیا گیا۔
بھارتی قانون نافذ کرنے والے ادارے ای ڈی نے اس معاملے میں جیکولین فرنینڈس کو کئی بار پوچھ گچھ کے لیے بھی طلب کیا، ای ڈی کی چارج شیٹ کے مطابق ملزم سکیش نے اداکارہ جیکولین اور نورا فتیحی کو کئی مہنگے تحائف بھیجے تھے۔ جیکولین کا سکیش سے سامنا 20 اکتوبر 2021 کو ہوا تھا۔ جیکولین نے بتایا کہ سکیش چندر شیکھر نے اس کے لیے مختلف مواقع پر پرائیویٹ جیٹ ٹرپ اور ہوٹل میں قیام کا انتظام کیا تھا۔ واضح رہے کہ جیکولین فی الحال ضمانت پر ہیں اور مجرم سکیش سلاخوں کے پیچھے ہے۔
5: فلم لائیگر کی فنڈنگ کہاں سے ہوئی؟
بھارتی ادارے ای ڈی نے اداکار وجے دیوراکونڈا سے پی ایم ایل اے کیس کے سلسلے میں 9 گھنٹے سے زیادہ تفتیش کی، ادارے نے تحقیقات اس وقت شروع کی جب کانگریس لیڈر بکا جڈسن نے اگست میں ای ڈی کے پاس شکایت درج کرائی کہ کئی سیاست دانوں نے لائیگر میں اپنا غیر قانونی پیسہ لگایا ہے، اور کئی لوگوں نے فلم میں اپنے کالے دھن کو سفید کرنے کے لیے سرمایہ کاری کی۔
اداکار وجے سے فیما (فارن ایکسچینج مینجمنٹ ایکٹ، 1999) کی مبینہ خلاف ورزی سے متعلق ایک معاملے میں پوچھ گچھ کی گئی تھی، اس سے پہلے 17 نومبر کو ای ڈی نے ’لائیگر‘ کے پروڈیوسر چارمی کور اور ہدایت کار پوری جگناتھ سے بھی پوچھ گچھ کی۔
فلم لائیگر شائقین کو متاثر کرنے میں ناکام رہی اور یہ باکس آفس پر فلاپ ثابت ہوئی۔
