Tag: بالی ووڈ

بالی ووڈ اداکارہ عالیہ بھٹ خود سے متعلق بے بنیاد خبریں شائع ہونے پر میڈیا پر برس پڑی ہیں۔

حال ہی میں اداکار رنبیر کپور کے ساتھ شادی کے بندھن میں بندھنے والی خوب صورت اداکارہ عالیہ بھٹ نے حمل اور نجی زندگی سے متعلق خبریں شائع کرنے پر میڈیا کو کڑی تنقید کا نشانہ بنایا۔

عالیہ بھٹ نے انسٹاگرام پر اپنے ردعمل میں کہا کہ ’میں خاتون ہوں، کوئی پارسل نہیں!‘

دراصل بالی ووڈ کی خبریں شائع کرنے والی ایک ویب سائٹ ’پنک ولا‘ امریکا نے انسٹاگرام پر پوسٹ میں کہا تھا کہ عالیہ بھٹ جولائی کی وسط میں ممبئی واپس آئیں گی، اور رنبیر کپور اپنی اہلیہ کو لینے لندن جائیں گے۔

ویب سائٹ نے یہ خبر بھی دی کہ چوں کہ وہ ماں بننے والی ہیں اس لیے عالیہ شوٹنگ کے بعد آرام کریں گی۔

خبر میں یہ دعویٰ بھی کیا گیا کہ اداکارہ نے حمل کی منصوبہ بندی اس طرح کی ہے کہ ان کا کوئی کام ادھورا نہ رہے، وہ اپنی فلم ’ہارٹ آف سٹون‘ اور ’راؤکی اور رانی کی پریم کہانی‘ کو جولائی سے پہلے مکمل کرلیں گی۔

یہ خبر شائع ہونے کے بعد عالیہ بھٹ نے پنک ولا سمیت میڈیا چینلز کو شدید تنقید کا نشانہ بنایا۔ انھوں نے انسٹاگرام پر اسٹوری شیئر کرتے ہوئے کہا ہم ابھی بھی لوگوں کے دماغ میں رہتے ہیں، اور ابھی بھی پدر شاہی دنیا میں رہتے ہیں۔

خبروں پر عالیہ بھٹ کا ری ایکشن خاصا تیز رہا، رنبیر کپور کے لینے آنے کی خبر پر کہا کہ کسی کو ضرورت نہیں ہے کہ وہ کسی کو لینے آئیں، میں خاتون ہوں کوئی پارسل نہیں ہوں۔

اداکارہ نے یہ بھی کہا کہ مجھے آرام کی بالکل ضرورت نہیں ہے، لیکن اچھی خبر یہ ہے کہ آپ کو خبر دینے کے لیے ڈاکٹرز ہوں گے، یہ 2022 ہے، کیا ہم پرانی قدیم سوچ سے باہر بھی آئیں گے؟

عالیہ بھٹ نے غصے میں طنز بھی کیا کہ ’کیا اب مجھے جانے کی اجازت ہے، کیوں کہ میرا شاٹ (شوٹنگ کے لیے) تیار ہے۔‘

واضح رہے کہ عالیہ بھٹ نے پیر کے روز انسٹاگرام پر اپنے حمل کے بارے میں پوسٹ لگائی تھی جس کے بعد انٹرنیٹ پر عالیہ بھٹ اور رنبیر کپور کے بارے میں خوب چرچا ہو رہا ہے۔

عالیہ بھٹ رواں برس اپنے شوہر رنبیر کپور کے ساتھ ’براہمسترا‘ فلم میں نظر آئیں گی، وہ نیٹ فلکس کی فلم ’ڈارلنگ‘ بھی کر رہی ہیں، جب کہ 2023 میں ان کی دو فلمیں ’جی لے ذرا‘ اور ’راؤکی اور رانی کی پریم کہانی‘ ریلیز کی جائیں گی۔ وہ فلم ’ہارٹ آف سٹون‘ میں گال گیڈٹ کے ساتھ ہالی وڈ میں بھی ڈیبیو کریں گی۔