Tag: بالی ووڈ

الف سے ایکسٹرا ہوتا ہے اور ہوتی بھی ہے۔ یعنی ایکسٹرا مرد بھی ہوتے ہیں اور عورتیں بھی۔

فلم میں جب کسی گلی محلے یا بازار کا سین دکھایا جاتا ہے تو اس میں چلنے پھرنے والے لوگوں کی اکثریت ایکسٹرا ہوتی ہے۔ وہ پان بیچنے والا ایکسٹرا ہے اور وہ جو دکان پر کھڑا ہو کر "ایک پونا کالا کانڈی” پان کی فرمائش کر رہا ہے وہ بھی ایکسٹرا ہے۔

بادشاہ کے درباری ایکسٹرا ہوتے ہیں۔ وہ دربان جو لال رنگ کا چوغا پہنے سنہرے رنگ کی موٹھ والی چھتری ہاتھ میں لیے بادشاہ کے آگے چل رہا ہے اور بلند بانگ لہجے میں چلا رہا ہے: "باادب باملاحظہ ہوشیار” وہ بھی ایکسٹرا ہے۔

کبھی کبھی بادشاہ بھی ایکسٹرا ہوتے ہیں۔ جیسے وہ آج کل اکثر ملکوں میں ہوتے ہیں۔ یعنی سنہری وردی پہنے تخت پر بیٹھے ہیں۔ مگر مجال نہیں کہ اپنی مرضی سے اپنے جوتے کا تسمہ بھی کھول سکیں۔

مجھے آج کل کے بادشاہوں اور فلم کے ایکسٹرا لوگوں کو دیکھ کر بڑی ہم دردی ہوتی ہے مگر دراصل یہ لوگ کسی ہم دردی کے محتاج نہیں ہیں۔

فلم کے ایکسٹرا فلمی دنیا میں سب سے کم کماتے ہیں۔ مہینے میں کسی کو پانچ دن تو کسی کو دس دن کام ملتا ہے۔ باقی دن یہ مانگے تانگے سے کس طرح چلاتے ہیں، بھگوان ہی بہتر جانتا ہے مگر پھر بھی یہ فلمی دنیا سے الگ نہیں ہو سکتے۔ کسی قیمت پر الگ نہیں ہو سکتے۔ اگر یقین نہ آئے تو کسی فلمی ایکسٹرا کو جو مہینے میں بڑی مشکل سے پچیس روپے کماتا ہے، پچاس روپے کی دربانی پیش کر کے دیکھ لیجیے۔ وہ ٹھوکر مار دے گا۔ کام کو بھی اور آپ کو بھی۔

اسے فلمی دنیا میں پانچ دن کام کر کے باقی پچیس دن بھوکا مرنا منظور ہے، مگر وہ کوئی اور کام نہیں کر سکتا۔

دراصل یہ ایکسٹرا وہ لوگ ہوتے ہیں، جو ہیرو یا ہیروئین بننے کی خواہش میں ہزاروں کی تعداد میں اپنے گھر چھوڑ کر اپنے ماں باپ، بھائی بہن، خاوند، بیوی بچے سب چھوڑ کر بمبئی چلے آتے ہیں اور بھیڑوں کی طرح ایک سیٹ سے دوسرے سیٹ پر دھکیلے جاتے ہیں۔

ان میں سے ہر مرد یا عورت کی آنکھوں میں ایک خواب بستا ہے۔ کبھی وہ ہیرو یا ہیروئین بن جائیں گے۔ اور بدقسمتی سے فلمی دنیا میں چند ایسی مثالیں موجود ہیں کہ کبھی ایک ایکسٹرا دو سال تک ایکسٹرا رہا پھر اچانک ہیرو بن گیا۔ ایک لڑکی جو پانچ سال تک ایکسٹرا رہی اچانک ہیروئین بن گئی۔ اور امپالا میں بیٹھ گئی۔ اس لیے یہ خواب کسی ایکسٹرا کی آنکھوں سے نہیں ہٹایا جا سکتا۔

(ممتاز ادیب اور افسانہ نگار کرشن چندر کے مضمون الف سے ایکٹر، ایکٹریس، اشتہار: فلمی قاعدہ سے انتخاب)

ممبئی : بالی ووڈ کے نامور اور باصلاحیت اداکار نوازالدین صدیقی نے کرونا کی وجہ سے فلمیں بند ہونے کے بعد کھیتی باڑی شروع کردی۔

بھارتی میڈیا رپورٹ کے مطابق 46 سالہ اداکارہ نے 20 سال قبل جس کام سے دوری اختیار کی اور بالی ووڈ کی دنیا میں داخل ہوئے اب سینیما بند ہونے کے بعد وہ واپس اُسی طرف چلے گئے ہیں۔

نوازالدین صدیقی نے سماجی رابطے کی ویب سائٹ ٹویٹر پر اپنی ویڈیو شیئر کی جس میں وہ کھیتوں میں کام کررہے ہیں،  اُن کے کپٹروں سے اندازہ ہورہا ہے کہ انہوں نے  دن بھر مشقت کی۔

اداکار کے کپڑوں پر مٹی اور پسینے کے نشانات واضح ہیں اور وہ نہر کے پاس بیٹھ کر شام کے وقت منہ دھو رہے ہیں۔ یہ ویڈیو شائد نواز الدین صدیقی نے اپنا دن بھر کا کام ختم کرنے کے بعد بنائی ہوگی تاکہ وہ منہ ہاتھ دھو کر گھر کے لیے روانہ ہوں۔

سوشل میڈیا پر ویڈیو شیئر ہونے کے بعد صارفین اور مداحوں نے نوازالدین صدیقی کو کھیتی باڑی کا کام کرتے دیکھ کر حیرانی کا اظہار کیا۔

Done for the day !!! pic.twitter.com/1oXDUS4E8m

— Nawazuddin Siddiqui (@Nawazuddin_S) June 22, 2020

بھارتی میڈیا رپورٹ کے مطابق نواز الدین صدیقی ان دنوں ریاست اترپردیش میں واقع  اپنے آبائی گاؤں بدھانا میں ہیں اور وہ خود کو مصروف رکھنے کے لیے کاشت کاری کررہے ہیں۔

یاد رہے کہ اس سے قبل تقریباً چار برس پہلے نواز الدین صدیقی نے بھارتی میڈیا سے گفتگو کرتے ہوئے بتایا تھا کہ وہ خود کسان رہ چکے ہیں اس لیے اُن کو درپیش مسائل سے بخوبی واقف ہیں۔

این ڈی ٹی وی کی رپورٹ کے مطابق نواز الدین صدیقی نے بہت چھوٹی عمر سے کاشت کاری شروع کر دی تھی، ان کے والد نواب الدین صدیقی خود بھی ایک کسان تھے، انہوں نے اپنے صاحبزادے پر زور دیا کہ وہ تعلیم حاصل کریں اور کھیتی باڑی کے کام سے دور رہیں۔