تعلیم اور پیشہ وارانہ زندگی کو ایک ساتھ چلانا نہایت ہی محنت طلب کام ہے جسے نہایت کم لوگ مکمل کر پاتے ہیں۔ صحیح طریقہ تعلیم مکمل کرنے کے بعد پیشہ وارانہ زندگی میں داخل ہونا ہی ہے۔

لیکن بعض افردا کو اپنی تعلیم کے زمانے میں ہی بہتر مواقع میسر ہوجاتے ہیں اور وہ عملی زندگی میں قدم رکھ دیتے ہیں۔ ایسے میں یا تو ان کی تعلیم دیر سے مکمل ہوتی ہے، یا پھر ادھوری ہی رہ جاتی ہے۔

بالی ووڈ فنکار بھی اس سے مستثنیٰ نہیں۔ بالی ووڈ کے کئی فنکار نوجوانی کے زمانے سے ہی بالی ووڈ میں جدوجہد کر رہے ہیں اور آج ان کا شمار صف اول کے فنکاروں میں ہوتا ہے۔ لیکن اس کی قیمت انہیں اپنی تعلیمی سفر کو قربان کر کے چکانی پڑی۔

کچھ اداکار، اداکار گھرانے سے تعلق رکھنے کے باعث بہت جلد اس شعبے میں آگئے یوں ان کی تعلیم بھی ادھوری رہ گئی۔

آج ہم آپ کو ایسے ہی بالی ووڈ فنکاروں کے بارے میں بتا رہے ہیں جو نہایت کم تعلیم یافتہ ہیں، لیکن اپنے شعبہ میں نہایت کامیاب ہیں۔

:کرینہ کپور

کپور خاندان کی باصلاحیت چشم و چراغ کرینہ کپور نے صرف 20 سال کی عمر میں پہلی فلم میں کام کیا تھا۔ اس وقت وہ ممبئی کے مٹھی بائی کالج میں کامرس کی تعلیم حاصل کر رہی تھیں۔

مگر پہلی فلم کے بعد ہی وہ فلم انڈسٹری میں بے پناہ مصروف ہوگئیں جس کے باعث وہ اپنی تعلیم مکمل نہ کرسکیں۔

کرینہ کپور وکالت کی تعلیم حاصل کرنا چاہتی تھیں مگر ان کی عملی مصروفیات ان کے شوق کی تکمیل میں آڑے آگئیں۔

:دپیکا پڈوکون

دپیکا پڈوکون اس وقت بالی ووڈ کی سب سے زیادہ معاوضہ لینے والی اداکارہ ہیں لیکن ماضی میں وہ نہایت نالائق طالبہ تھیں۔

انہوں نے گریجویشن مکمل کرنا بھی گوارا نہیں کیا اور اس سے قبل ہی اپنے خوابوں کی تکمیل کے لیے فلمی دنیا میں قدم رکھا دیا۔

:کترینہ کیف

کترینہ کیف بھی انہی اداکاروں میں سے ایک ہیں جو اپنی تعلیم مکمل نہ کرسکیں۔ انہوں نے بہت کم عمری سے ہی ماڈلنگ کا آغاز کردیا تھا جس کے باعث ان کی تعلیم ادھوری رہ گئی۔

:عامر خان

بالی ووڈ کے مسٹر پرفیکشنسٹ عامر خان اپنے شعبے کے لیے تو نہایت محنت، خلوص اور لگن سے کام کرتے ہیں، لیکن زمانہ طالب علمی میں وہ ایک نالائق طالب علم تھے اور انہیں تعلیم سے کوئی دلچسپی نہیں تھی۔

وہ نرسی منجی کالج میں زیر تعلیم رہے مگر تعلیم میں عدم دلچسپی کے باعث انہوں نے اسے ادھورا ہی چھوڑ دیا۔

:سلمان خان

معروف اداکار سلمان خان نے اپنی اسکول کی تعلیم مکمل کرنے کے بعد باندرا کے سینٹ سٹینلاز ہائی اسکول میں داخلہ لیا، لیکن وہ وہاں اپنی تعلیم مکمل نہ کرسکے۔

:رنبیر کپور

رنبیر کپور متعدد انٹرویوز میں اس بات کا اعتراف کر چکے ہیں کہ وہ اپنے زمانہ طالب علمی میں نہایت نالائق طالب علم تھے اور بہت کم عمری میں ہی اپنی تعلیم چھوڑ چکے تھے۔

:کاجول

کاجول کو پہلی فلم کی پیشکش 16 سال کی عمر میں ہوئی تھی۔ وہ اس وقت اسکول میں زیر تعلیم تھیں اور فلم مکمل ہونے کے بعد اپنی پڑھائی کو پھر سے شروع کرنا چاہتی تھیں لیکن فلمی مصروفیات کے سبب ایسا ممکن نہ ہوکا۔

آخر کار اسکول انتظامیہ نے ان کا نام اسکول سے خارج کردیا جس کے بعد کاجول نے بھی دل پر پتھر رکھ کر تعلیم کو خیر باد کہہ دیا اور اداکاری کو ہی اپنا اوڑھنا بچھونا بنا لیا۔

:سونم کپور

سونم کپور نے بارہویں جماعت کے بعد اپنی پڑھائی روک دی تھی اور اس کا انہیں بے حد افسوس ہے۔

وہ کئی انٹرویوز میں اپنے عزم کا اظہار کر چکی ہیں کہ وہ پھر سے اپنی تعلیم کا سلسلہ جوڑیں گی اور ادب میں گریجویشن کی ڈگری حاصل کریں گی۔

:ایشوریا رائے بچن

سابق ملکہ حسن ایشوریا رائے بچن بھی ایک اوسط درجے کی طالبہ تھیں۔ وہ جے ہند کالج میں زیر تعلیم تھیں مگر انہوں نے اس ڈگری کو ادھورا چھوڑ دیا۔ بعد ازاں انہوں نے اپنا شعبہ تبدیل کر کے آرکیٹیکچرل کالج میں داخلہ لیا مگر یہاں بھی اپنی تعلیم مکمل نہ کرسکیں۔

اسی دوران وہ مس یونیورس کا مقابلہ جیت گئیں اور انہیں فلموں اور ماڈلنگ کی بے شمار پیشکشیں موصول ہونا شروع ہوگئیں جس کے بعد انہوں نے مکمل طور پر تعلیم کو خیر باد کہہ دیا۔