Tag: بالی ووڈ

کراچی: ہر سال عید پر پاکستانی فلموں کے ساتھ بالی ووڈ فلمیں بھی پاکستان میں ریلیز کی جاتی ہیں لیکن رواں برس عید الاضحیٰ پر کوئی بالی ووڈ فلم ریلیز نہیں ہور ہی جس سے پاکستانی فلمسازوں نے سکھ کا سانس لیا ہے۔

رواں برس عید الاضحیٰ پر 3 پاکستانی فلمیں ’جاناں‘، ’زندگی کتنی حسین ہے‘ اور ’ایکٹر ان لا‘ ریلیز کی جائیں گی۔

اس سے قبل کئی پاکستانی فلم ساز اور ہدایت کار بھارتی فلمیں پاکستان میں ریلیز کرنے کی مخالفت اور مطالبہ کر چکے ہیں کہ پاکستان میں بالی ووڈ فلموں پر پابندی عائد کی جائے۔ ان کا کہنا ہے کہ بالی ووڈ فلموں کی ریلیز پاکستانی فلموں کے بزنس پر منفی اثر ڈالتی ہیں تاہم اس سلسلہ میں متعلقہ حکام کی جانب سے کوئی قدم نہیں اٹھایا گیا۔

خوش قسمتی سے اس بار عید پر پاکستانی فلمسازوں کی دعائیں قبول ہوگئیں اور رواں برس عید پر صرف پاکستانی فلمیں سینما گھروں کی زینت بننے جارہی ہیں۔

فلم ’جاناں‘ آئی آر کے فلمز، ایم ایچ پروڈکشنز اور اے آر وائی فلمز کی مشترکہ پیشکش ہے۔ ریحام خان، حریم فاروق، منیر حسین اور عمران کاظمی کی پروڈکشن میں بننے والی اس فلم کی ہدایات اظفر جعفری نے دی ہیں۔

فلم کی کاسٹ میں ارمینہ رانا خان، بلال اشرف اور علی رحمٰن مرکزی کردار ادا کر رہے ہیں جبکہ فلم کی دیگر کاسٹ میں مشی خان، عجب گل اور نیئر اعجاز شامل ہیں۔

فلم ’ایکٹر ان لا‘ کے مرکزی کرداروں میں فہد مصطفیٰ، مہوش حیات اوربھارت کے نامور اداکار اوم پوری شامل ہیں۔ فلم کی پرڈیوسر فضا علی ہیں جبکہ ہدایت کاری کے فرائض نبیل قریشی نے انجام دیے ہیں۔

فلم ’زندگی کتنی حسین ہے‘ میں مرکزی کرداروں میں معروف ڈرامہ اداکار سجل علی اور پاکستانی اداکارہ عمائمہ ملک کے بھائی فیروز خان شامل ہیں۔ یہ ان دونوں کی پہلی فلم ہے۔

فلم کے ڈائریکٹر انجم شہزاد ہیں جن کی ایک اور فلم ’ماہ میر‘ بھی رواں برس سینما گھروں کی زینت بن چکی ہے۔

تجزیہ نگاروں کا کہنا ہے کہ بالی ووڈ فلمیں ریلیز نہ ہونے کے باوجود بھی یہ اگر فلمیں شائقین کی توجہ حاصل کرنے میں ناکام رہیں تو یہ اس بات کا ثبوت ہوگا کہ ہماری فلم انڈسٹری کو مزید ترقی دینے کی ضرورت ہے۔

ممبئی: بھارتی عوام پاکستانی اداکار فواد خان کی بے حد دیوانی ہوچکی ہے اور اس کا ایک اور ثبوت اس وقت سامنے آگیا جب بھارتی عوام نے ایک ایوارڈ کے لیے نامور بالی ووڈ اداکاروں کو چھوڑ کر فواد خان کو ووٹ دینا شروع کردیا۔

شائقین کے ووٹ پر مبنی آؤٹ لک سوشل میڈیا ایوارڈز میں فواد خان کو موسٹ فیشنسٹا آف دا ایئر کی کیٹگری میں نامزد کیا گیا ہے۔ اس کیٹگری میں شاہ رخ خان سمیت بالی ووڈ کے دیگر کئی مشہور اور بڑے اداکار بھی شامل ہیں لیکن حیرت انگیز طور پر فواد خان ان سب کو پچھاڑتے نظر آرہے ہیں۔

اب تک سب سے زیادہ ووٹ بھارتی اداکارہ دیویانکا ترپاٹھی کو موصول ہوئے جن کی تعداد 56 فیصد رہی۔ ان کے بعد فواد خان شائقین کے پسندیدہ ترین فنکار بن گئے اور ان کے ووٹوں کی شرح 12 فیصد رہی۔

اس دوڑ میں کرن جوہر اور شاہ رخ خان بھی فواد خان سے پیچھے رہ گئے۔ شاہ رخ خان کو صرف 1 فیصد ووٹ موصول ہوئے جبکہ کرن جوہر کوئی بھی ووٹ حاصل کرنے میں ناکام رہے۔

پاکستانی ڈرامہ اداکار فواد خان بالی ووڈ میں دن بدن ترقی کا سفر طے کر رہے ہیں۔ ان کی آنے والی فلم کرن جوہر کی ہدایت کاری میں بننے والی ’اے دل ہے مشکل‘ ہے جس میں فواد خان نے رنبیر کپور، ایشوریا رائے اور انوشکا شرما کے ساتھ کام کیا ہے۔

ان کی فلم رواں برس 28 اکتوبر کو ریلیز کی جائے گی۔

ممبئی: کرن جوہر کی فلم ’اے دل ہے مشکل‘ کا ٹیزر جاری ہوتے ہی مقبولیت کی بلندیوں کو چھو چکا ہے۔ شائقین بے چینی سے فلم کی ریلیز کا انتظار کر رہے ہیں۔

فلم کے ٹیزر میں ایشوریا رائے اور رنبیر کپور کے کچھ بے باک مناظر بھی دکھائے گئے ہیں۔ بھارتی ویب سائٹس کا دعویٰ ہے کہ امیتابھ بچن اپنی بہو کے ان مناطر پر نہایت ناخوش ہیں اور اس بات پر ان کی اپنی بہو اور بیٹے سے ان بن بھی چل رہی ہے۔

رپورٹس کے مطابق فلم کی شوٹنگ کے دوران امیتابھ بچن نے ذاتی طور پر فلم کے ڈائریکٹر کرن جوہر سے ایشوریا کے بولڈ مناظر نہ فلمانے کی درخواست کی تھی۔ کرن جوہر کا کہنا تھا کہ یہ بولڈ مناظر فلم کے پلاٹ کے لیے ضروری ہیں اور ان میں کوئی قباحت نہیں۔

تاہم امیتابھ بچن اس وضاحت سے مطمئن نہ ہوسکے اور ٹیزر دیکھنے کے بعد وہ نہایت چراغ پا ہیں۔

ذرائع کے مطابق ٹیزر لانچ کے دن امیتابھ بچن اس بات پر اپنے بیٹے ابھیشک بچن سے الجھ بھی چکے ہیں۔ اس موقع پر ابھیشک بچن نے ایشوریا کا بھرپور ساتھ دیا اور کوئی خاص ردعمل نہ دیتے ہوئے فلم کا ٹیزر اپنے سوشل میڈیا اکاؤنٹس پر بھی شیئر کیا۔

فلم ’اے دل ہے مشکل‘ کرن جوہر کی ہدایت کاری میں بننے والی فلم ہے جس میں ایشوریا رائے ایک شاعرہ کا کردار ادا کررہی ہیں۔ فلم میں انوشکا شرما اور رنبیر کپور نے مرکزی کردار ادا کیا ہے جبکہ پاکستانی اداکار فواد خان بھی اس میں شامل ہیں۔

Aishwarya and Ranbir in Vienna during ADHM shoot by arynews

فلم رواں برس دیوالی کے موقع پر 28 اکتوبر کو سینما گھروں کی زینت بنے گی۔

ممبئی: بھارتی اداکار رنبیر کپور کا کہنا ہے کہ وہ کسی فلم میں ہم جنس پرست کا کردار ادا کرنا چاہتے ہیں۔ ان کا کہنا ہے کہ انہیں اس کی تحریک پاکستانی اداکار فواد خان سے ملی۔

رنبیر کپور آج کل اپنی فلم ’اے دل ہے مشکل‘ کی پروموشن میں مصروف ہیں جو رواں برس اکتوبر میں ریلیز ہونے جارہی ہے۔ فلم کا ٹیزر اور ٹائٹل سانگ شائقین میں بے پناہ مقبولیت حاصل کرچکا ہے اور لوگ بے چینی سے فلم کی ریلیز کا انتطار کر رہے ہیں۔

ایک بھارتی فیشن میگزین کو انٹرویو دیتے ہوئے رنبیر کا کہنا تھا کہ ابتدا میں انہیں ہم جنس پرست کا کردار ادا کرنے میں کوئی دلچسپی نہیں تھی۔ لیکن اب ان کے خیالات تبدیل ہوگئے ہیں اور اگر انہیں کسی ایسے کردار کی پیشکش ہوئی تو وہ اسے ضرور قبول کریں گے۔

رنبیر کا کہنا ہے کہ انہیں اس موضوع پر اپنے خیالات بدلنے کی تحریک پاکستانی اداکار فواد خان سے ملی۔

فواد خان نے کرن جوہر کی فلم ’کپور اینڈ سنز‘ میں ہم جنس پرست کا کردار ادا کیا تھا اور ان کا کہنا تھا کہ انہیں یہ کردار ادا کرنے میں کوئی پریشانی نہیں ہوئی۔

رنبیر کپور کا دعویٰ ہے کہ فواد خان نے اس ٹرینڈ کی ابتدا کردی ہے اور اب بہت سے اداکار ایسا کردار ادا کرنے میں کوئی جھجھک محسوس نہیں کریں گے۔

رنبیر اور فواد خان فلم ’اے دل ہے مشکل‘ میں ایک ساتھ جلوہ گر ہورہے ہیں اور فلم کی شوٹنگ کے دوران دونوں کے درمیان اچھی دوستی ہوچکی ہے۔

واضح رہے کہ بالی ووڈ میں اس موضوع پر پہلی فلم ’دوستانہ‘ 2008 میں بنائی گئی جس میں ابھیشک بچن اور جان ابراہام نے ہم جنس پرست بننے کی اداکاری کی تھی۔ فلم میں دکھایا گیا ہے کہ کرائے کا مکان حاصل کرنے کے لیے وہ خود کو ہم جنس پرست ظاہر کرتے ہیں اور پھر دونوں کو ہی اپنی مالک مکان پریانکا چوپڑا سے محبت ہوجاتی ہے۔

کترینہ کیف آج کل اپنی فلم ’بار بار دیکھو‘ کی پرمووشن میں مصروف ہیں اور اس کے لیے وہ اور سدھارتھ ملہوترا انٹرنیٹ پر مختلف ویڈیوز اور تصاویر جاری کر رہے ہیں۔

حال ہی میں کترینہ نے سوشل میڈیا ویب سائٹ اسنیپ چیٹ پر ایک ویڈیو جاری کی جس میں وہ ’بلی‘ بن کر فلم کا گانا ’کالا چشمہ‘ گاتی ہوئی نظر آرہی ہیں۔

Here’s Jiya taking over the #BaarBaarDekho Snapchat handle! 10 Days To Baar Baar Dekho.

A video posted by Baar Baar Dekho (@baarbaardekhothefilm) on Aug 30, 2016 at 8:00am PDT

یہ کترینہ کی اسنیپ چیٹ پر پہلی ویڈیو ہے۔ دیگر اداکاراؤں کے برعکس وہ سوشل میڈیا سائٹس کم ہی استعمال کرتی ہیں۔

فلم ’بار بار دیکھو‘ کرن جوہر، فرحان اختر اور ریتیش سدھوانی کی مشترکہ پروڈکشن ہے جبکہ اس کے ہدایت کار نتھیا مہرا ہیں۔

فلم کے گانے ’کالا چشمہ‘ کو شائقین کی جانب سے بھرپور پذیرائی ملی۔

فلم رواں سال 9 ستمبر کو سینما گھروں میں نمائش کے لیے پیش کی جائے گی۔