بنسلوچن، یہ نام شاید آپ کو عجیب لگے، لیکن یہ خدا کی دی ہوئی نعمتوں میں سے ایک ہے۔
بنسلوچن ایک قسم کی نباتاتی رطوبت ہے جو ترلا بانس سے حاصل کی جاتی ہے۔ عربی میں اسے طبا شیر کہا جاتا ہے۔
بانسوں کی مختلف اقسام میں سے ایک ترلا بھی ہے جس کے جوف میں یہ رطوبت قدرتی طور پر پیدا ہوتی ہے اور خشک ہونے کے بعد اسے بانس کو چیر کر نکالا جاتا ہے۔ اس کے لیے مختلف طریقے اپنائے جاتے ہیں۔ یہ بانس بنگال، جاوا، سماٹرا، امریکا کے بعض علاقوں کے جنگلات میں ملتا ہے۔
ماہرینِ طب کے مطابق طبا شیر بہت فائدہ مند ہے اور اسے استعمال کرنے سے ہمارے اعضا کو تقویت ملتی ہے۔ اس کا رنگ سفید ہوتا ہے۔ بہترین طبا شیر وہ ہے جو ہلکی سفید اور شفاف ہو۔
طبی ماہرین کے مطابق یہ دل کے لیے فرحت بخش ہے۔ معدے کی سوزش دور کرتی ہے۔ پیاس بجھاتی ہے۔ اس کے علاوہ طباشیر کا منجن بھی تیار کیا جاتا ہے جو دانتوں کو مضبوط بناتا ہے۔
وہ والدین جو اپنے بچوں کی مٹی کھانے کی عادت سے پریشان ہیں کسی ماہر اور مستند طبیب سے رابطہ کریں تو ممکن ہے وہ طبا شیر کے استعمال کا مشورہ دے جس کے بعد آپ کا یہ مسئلہ حل ہو سکتا ہے۔
طبی کتابوں میں اس کے جو خواص اور فوائد تحریر ہیں، ان میں سے ایک بچوں میں مٹی پھانکنے عادت ختم ہونا بھی شامل ہے۔ ماہرین کے مطابق خود اس رطوبت کا ذائقہ بھی مٹی جیسا ہوتا ہے۔ تاہم اس حیران کُن اور انسانوں کے لیے مفید طبا شیر کے استعمال سے پہلے اس کی مقدار اور کھانے کا طریقہ جاننا ضروری ہے جو ماہر طبیب ہی بتا سکتا ہے۔
