حکومت پاکستان نے 1200ارب روپے کے بانڈز کا تاریخی اجراء کردیا، 1200ارب میں سے 47ارب روپے زیرو کوپن بانڈ کی مد میں جاری کیے گئے ہیں۔
وزارت خزانہ کی جانب سے جاری اعلامیہ کے مطابق حکومتِ پاکستان کا 15 سالہ زیرو کوپن بانڈز کا اجرا تاریخ ساز ہے۔
بانڈز کا کامیاب اجرا سرمایہ کاروں کی بھرپور دلچسپی، معیشت پر اعتماد کا اظہار ہے، زیرو کوپن بانڈ کو سرمایہ کاروں کی جانب سے زبردست پذیرائی ملی۔
وزارت خزانہ کا کہنا ہے کہ زیرو کوپن بانڈ سالانہ شرح منافع کی بجائے ایک ہی بار رقم فراہم کرتا ہے، سرمایہ کاروں کو15 سال بعد ایک ہی بار مکمل رقم کی ادائیگی کی جائے گی۔
اس طریقہ کار سے حکومت کو قلیل مدتی ادائیگیوں میں آسانی ملتی ہے، بانڈ دلچسپی سرمایہ کاروں کی معیشت اور اصلاحات پر اعتماد کا ثبوت ہے۔
وزارت خزانہ اعلامیہ میں کہا گیا ہے کہ پاکستان کا قرضہ اب پہلے کی نسبت زیادہ مستحکم ہورہا ہے،
اندرونی قرض کی اوسط ادائیگی مدت2.7سال سے بڑھ کر3.75سال ہوگئی۔
اس سے قرض کی فوری ادائیگیوں کا دباؤ کم ہوگیا ہے، بینکوں کے علاوہ پنشن فنڈز، انشورنس کمپنیاں بھی بانڈز میں سرمایہ کاری کررہی ہیں۔
یہ اقدام مالیاتی نظام مضبوط اور مستحکم بنانے کی طرف ایک بڑا قدم ہے، ہم قرض لینے کے نئےاور اسمارٹ طریقے متعارف کرا رہے ہیں۔
اعلامیہ کے مطابق یہ طریقے خطرات کو کم کرتے، سرمایہ کاروں کو بہتر مواقع فراہم کرتے ہیں، ہمارا مقصد عوامی قرضوں کا ذمہ دارانہ انتظام، اسلامی مالیات کو فروغ دینا ہے۔
ہمارا مقصد طویل مدتی سرمایہ کاری کے فروغ سے معیشت کو سہارا دینا ہے، وزارتِ خزانہ عام شہریوں کے لیے بھی مزید مصنوعات پرکام کررہی ہے۔
وزارت خزانہ کو مزید کہنا ہے کہ عالمی غیریقینی صورتحال کے باوجود آج کی نیلامی میں دلچسپی واضح رہی، ظاہر ہوتا ہے کہ ملکی معیشت سرمایہ کاروں کا اعتماد حاصل کررہی ہے۔
