Tag: بانی پی ٹی آئی

لاہور : انسدادِ دہشت گردی عدالت نے جناح ہاؤس حملہ کیس میں بانی پی ٹی آئی کے بھانجے شاہ ریز خان کو جوڈیشل ریمانڈ پر جیل بھیج دیا۔

تفصیلات کے مطابق انسدادِ دہشت گردی عدالت کے جج منظر علی گل نے علیمہ خانم کے بیٹے شاہ ریز خان کے جسمانی ریمانڈ سماعت کی، پولیس نے 8 روزہ جسمانی ریمانڈ مکمل ہونے پر ملزم شاہ ریز خان کو عدالت میں پیش کیا اور مزید جسمانی ریمانڈ کی استدعا کی۔

تفتیشی افسر نے عدالت کو بتایا کہ شاہ ریز خان سے ڈنڈا برآمد کیا گیا ہے جبکہ فوٹو گرامیٹک ٹیسٹ بھی کرایا جا چکا ہے، اس لیے وقوعہ کی مزید تفتیش کے لیے مزید جسمانی ریمانڈ دیا جائے۔

دورانِ سماعت شاہ ریز خان کے وکیل سلمان اکرم راجہ نے مؤقف اپنایا کہ ملزم 9 مئی کو لاہور میں موجود نہیں تھے بلکہ دوستوں کے ہمراہ چترال گئے ہوئے تھے۔ اس سلسلے میں شاہ ریز خان کے دوستوں کے بیان حلفی بھی عدالت میں جمع کرائے گئے۔

وکیل کے مطابق عمران خان کے بھانجے ملک کے بہترین ایتھلیٹ ہیں اور انہیں صرف بانی پی ٹی آئی کا بھانجا ہونے کی وجہ سے مقدمے میں ملوث کیا گیا ہے استدعا ہے کہ شاہ ریز خان کو مقدمے سے ڈسچارج کیا جائے۔

عدالت نے فریقین کے دلائل سننے کے بعد عمران خان کے بھانجے کو 14 روزہ جوڈیشل ریمانڈ پر جیل بھیجنے کا حکم دے دیا۔

سماعت کے موقع پر شاہ ریز خان کی والدہ علیمہ خانم، خالہ عظمیٰ خانم اور تحریک انصاف کے دیگر رہنما بھی عدالت میں موجود تھے

اسلام آباد : وزیر اعظم کے مشیر رانا ثنااللہ کا کہنا ہے کہ لگتا ہے پی ٹی آئی اگلے الیکشن سے پہلے ہی مائنس ہوجائے گی، کیونکہ بانی پی ٹی آئی جس راستے پر چل رہے ہیں لگتا ہے سزا کے چودہ سال پوری کریں گے۔

تفصیلات کے مطابق وزیراعظم کے مشیر رانا ثنااللہ نے اے آر وائی نیوز کے پروگرام خبر میں گفتگو کرتے ہوئے کہا کہ وزیراعظم کئی مرتبہ ڈائیلاگ کی بات کرچکے ہیں، ڈائیلاگ میں اختلاف رائے بھی ہوتا ہے لیکن ہم آئین و قانون کے مطابق آگے بڑھیں گے۔

رانا ثناء اللہ کا کہنا تھا کہ ایسے لوگوں کو ملک پر مسلط کیا گیا جو سیاست پر یقین نہیں رکھتے، انتشاری سوچ رکھنے والوں کا سسٹم سے مائنس ہونا ملک کے لیے بہتر ہے۔

انہوں نے کہا کہ اقتدار میں ہوں تو اپوزیشن کو ختم کرنے پر تُل جاتے ہیں اور اپوزیشن میں ہوں تو اقتدار والوں کو برداشت نہیں کرتے۔

سیاسی مشیر کا مزید کہنا تھا کہ پی ٹی آئی کمیٹیاں چھوڑے گی، اسمبلی چھوڑے گی، مگر جو جگہ وہ چھوڑیں گے وہاں متبادل آئیں گے اور آئین کے مطابق چلیں گے۔

انھوں نے کہا کہ ہمیں پی ٹی آئی کو مائنس کرنے کی ضرورت نہیں، وہ اپنی انتشاری سوچ کی وجہ سے خود مائنس ہورہی ہے۔

رانا ثناء اللہ نے کہا کہ مسلم لیگ (ن) نے جلاوطنی کے باوجود 2002 کے انتخابات میں حصہ لیا، ہمیں مائنس کرنے کی کوشش کی گئی مگر ہم کامیاب ہوئے۔ جبکہ پی ٹی آئی تو خود مائنس ہونا چاہتی ہے اور ہم انہیں مثبت راستے پر لانا چاہتے ہیں۔

انہوں نے الزام عائد کیا کہ بانی پی ٹی آئی نے 9 مئی کی مذمت نہیں کی، وہی اس کے آرکیٹیکٹ ہیں۔ لگتا ہے پی ٹی آئی اگلے انتخابات سے پہلے ہی مائنس ہوجائے گی کیونکہ بانی پی ٹی آئی جس راستے پر چل رہے ہیں اس سے یہی لگتا ہے کہ وہ سزا کے 14 سال مکمل کریں گے۔

راولپنڈی: پاکستان تحریک انصاف کے بانی کی ہمشیرہ علیمہ خانم نے ان سے ملاقات کے بعد کہا ہے بانی پی ٹی آئی کی صحت بہت اچھی تھی۔

اے آر وائی نیوز کے مطابق علیمہ خانم نے اپنی دوسری بہنوں کے ہمراہ کئی ماہ بعد جیل میں بانی پی ٹی آئی سے ملاقات کی ہے، علیمہ خانم کا کہنا تھا کہ عمران خان کی صحت اچھی ہے، تاہم بانی پی ٹی آئی کو آنکھ پر تھوڑا پریشر محسوس ہورہا ہے۔

علیمہ خانم نے کہا کہ جیل میں بانی کی آنکھ کے معائنے کیلئے عدالت میں درخواست دینگے، بانی نے میرے بچوں کا پوچھا کہ کیا انھیں بھی جیل میں ڈال دیا گیا۔

انھوں نے مزید بتایا کہ بانی نے قومی اسمبلی کی کمیٹیوں سے پی ٹی آئی ارکان کو فوری نکلنے کا کہہ دیا، بانی پی ٹی آئی نے پارٹی کو قائمہ کمیٹیوں سے مستعفی ہونے کی ہدایت کی ہے۔

بانی پی ٹی آئی کی ہمشیرہ کا کہنا تھا کہ عمران خان نے سیلاب سے تباہ کاریوں پر دکھ کا اظہار کیا، بشریٰ بی بی کو قید تنہائی میں رکھا گیا ہے، بہنوں کی 4 ماہ بعد بانی پی ٹی آئی سے ملاقات کرائی گئی۔