لاہور : انسداد دہشت گردی عدالت نے جناح ہاؤس حملہ کیس میں بانی پی ٹی آئی کے بھانجے شیر شاہ خان کو جوڈیشل ریمانڈ پر جیل بھیج دیا گیا۔
تفصیلات کے مطابق لاہور کی انسداد دہشت گردی کی عدالت میں جناح ہاؤس کیس کی سماعت ہوی، بانی پی ٹی آئی عمران خان کے بھانجے شیرشاہ کو عدالت میں پیش کیا گیا۔
پولیس نے استدعا کی کہ ملزم کی حسان نیازی کےساتھ کھڑے ہونے کی ویڈیو ہے، فوٹو گرامیٹک ٹیسٹ کرانا ہے اس لئے30 دنوں کا جسمانی ریمانڈ دیا جائے۔
وکیل سلمان اکرم راجہ ایڈووکیٹ نے دلائل میں مزید جسمانی ریمانڈ کی مخالفت کی اور نشاندہی کی کہ ویڈیو میں نظر آنے سے کوئی جرم ثابت نہیں ہوتا ہے، پہلے ہی پولیس 5 دنوں کا جسمانی ریمانڈ لے چکی ہے اور اب مزید جسمانی ریمانڈ کی ضرورت نہیں ہے، کمرہ عدالت میں علیمہ خانم اورعظمی خانم بھی موجود تھا۔
انسداد دہشت گردی عدالت کےجج منظرعلی گل نے پولیس کی جسمانی ریمانڈ دینے کی درخواست پر محفوظ فیصلہ سناتے ہوئے عمران خان کے بھانجے کی جسمانی ریمانڈ کی استدعا مسترد کرتے ہوئے جوڈیشل ریمانڈ پر جیل بھیجنے کا حکم دے دیا۔
یاد رہے شیرشاہ خان کو جناح ہاؤس پر حملے اور دیگر پُرتشدد کارروائیوں میں مبینہ کردار کے الزام میں گرفتار کیا گیا تھا۔
ذرائع کے مطابق ایف آئی آرز میں انکشاف کیا گیا تھا کہ علیمہ خان کے دونوں بیٹے، شیرشاہ خان اور شہر یز خان، 9 مئی کے واقعات میں ملوث تھے، شیرشاہ نے پولیس وین جلانے، سیکیورٹی اہلکاروں پر حملہ کرنے اور سرکاری املاک کو نقصان پہنچانے میں حصہ لیامویڈیو شواہد اور جیو فینسنگ ڈیٹا بھی اس کی موجودگی ثابت کرتے ہیں۔
تحقیقات میں بتایا گیا تھا کہ ملزم ہنگاموں کے بعد بیرونِ ملک فرار ہو گیا اور تقریباً دو سال لندن میں مقیم رہ کر ڈیجیٹل پلیٹ فارمز کے ذریعے مبینہ طور پر ریاست مخالف پروپیگنڈا مہم چلاتا رہا، اسے پاکستان واپسی پر 22 اگست 2025 کو گرفتار کیا گیا۔